Ba jyllei ki karkhana ot dieng beain, ujor ha ka DC Ri Bhoi

Nongpoh, 13 Jylliew:
Da kaba sngew khia halor ka jingjyllei jong ki karkhana ot dieng beain hapoh ka Ri Bhoi Distrik, khamtam ha ki thain Umiam bad Byrni hat, mynta ka sngi ki nongialam ka Ri Bhoi Youth Welfare Organization (RBYWO), ki la leit ban iakynduh ia ka Deputy Commissioner ka Dr. Pooja Pandey, ryngkat bad ka jingthoh kum ka jing pynsngew halor ka jing nangroi jong ki karkhana ot dieng beain.
Katkum ka jinglap da ki dkhot jong ka RBYWO, la ong ba ki karkhana ot dieng beain ki nangbun nangbun ha manla ki bynta jong ka Distrik katba nangmih ki sngi bad kane ka jingbun jong ki karkhana ot dieng ka wanrah ruh ia ka jingjot bad ka pynsniew ruh ia ka Mei Mariang.
Haba iakren bad u Bah Amberlight Masharing President ka RBYWO, la ong ba ki don tang 21 tylli ki karkhana ba don laisen ha Umiam bad 11 tylli ha Byrnihat Area, katba kiba bun pat kim don laisen satia, u la bynrap ruh da kaba ong ba ha ka jingshisha kitei ki karkhana ot dieng, ki dei ban don ha ki jaka kiba la buh kyrpang ryngkat bad ki laisen kiba biang katkum ki kyndon jong ka Meghalaya Forest Wood Based Industries jong u snem 1998.
U la pynpaw ruh ia ka jingsngewkhia bad ka jinglyngoh kaba khraw ia ki bor ba dei peit ia ki karkhana ot dieng, namar ka jingbym leh ei ei ka jong ki pyrshah ia kitei ki karkhana ot dieng beain, ha kaba katba nangmih ki sngi ki la nangroi nangroi bad ki lah ban pyntrei laitlan khlem da don kano kano ka jingshah pynwit ha ki bor ba dei peit, ong u Bah Amberlight Masharing.
Namarkata, na ka liang ka seng ka la dawa ia ki bor ba dei peit ia ki karkhana ot dieng ba kin shimkhia da kaba pynlong ia ka jingkhynra ha ha kitei ki karkhana beain bad ym lah ruh ban len ba ka jingdon jong ki karkhana bapher bapher ka wanrah ia ka roi ka par, hynrei lada kim lah pat ban leh katkum ki kyndon jong ka ain, namar lyngba jong kitei ki karkhana ot dieng beain, ka wanrah ruh ia ka jingpom pathar ia ki dieng ki siej bad ka pynjot ia ka Mei Mariang, u la bynrap.
Ha kawei pat ka bynta na ka liang ka seng ka la pynpaw ia ka jingkmen, hadien ba ka Dr. Pooja Pandy, DC ka Ri Bhoi, kala kular ban shimkhia katkum ka jingujor ba la buh da ka seng haba iadei bad ka jingbun jong ki karkhana ot dieng beain ha ka Distrik, bynrap u Bah Amberlight Masharing.