Nongpoh: Hadien ba la ioh ia shibun ki jingujor na ki paidbah nongshnong shnong ka thain Nongpoh, kiba la wan ban ud sha ka seng halor ka jingshah pyndik namar ka jinglip bording ba khah khah, mynta ka sngi na ka liang ka HNYF, Northern Region, ka la maham tyngeh pyrshah ia ka MeECL, da kaba byrngem ruh ban khang tala ia ka ophisa treikam, lada kim lah ban pynbiang ia ka bording ha ka thain Nongpoh.

Haba pyntip sha ki Nongthohkhubor, u Bah Donroy Kshiar, u la ong ba ka seng kam lah khlem da pynpaw ia ka jingsngewkhia ban iohi ia kane ka jingeh kaba la iakynduh da ki paidbah halor ka jingthut ha ka jinglip bording, ha kaba kane hi ka la wanrah jingeh ym tang ia ki paidbah, hynrei kaba kham sngewsynei eh ka dei ia ki khynnah skul, kiba donkam ban pule kot bad khamtam eh ha kaba kum kane ka por ba la jan ka Eksamin kut snem.

Utei u nongialam ka HYNF, u la pynpaw ruh ia ka jingsngewlyngoh halor ki jingiadaw da ka MeECL, namar ha ka por Tlang ki aidaw ba lip bording namar ba duna Slap bad ha ka por slap pat ki aidaw ba Slap palat ba sa thut ka Bording bad halor kane ka jingeh ka dei ia ki paidbah, ha kaba ha ka por Tlang bad por Lyiur kum ju ioh ia ka bording kab thikna.
“Sngewlyngoh ba wat hapdeng ba ki paidbah kim da ioh ban pyndonkam bha ia ka Bording Ilektrik namar ka jinglip ba khah khah, hynrei na ka liang ka MeECL ka iai pynkiew pat ia ka bai bording katba nangmih ki sngi, kumta haba ka long kumne shaei kata ka hok jong ki paidbah” ong u Bah Donroy Kshiar.
Namarkata, halor kitei ki mat ba la kdew haneng bad khamtam halor ka jingthut khah khah ka bording, na ka liang ka seng ka dawa na ka tnat MeECL ba ka dei ban pynbiang ia ka bording sha baroh ki shnong kiba don ha ka thain Nongpoh bad lada kam lah ban pynbiang, kam banse ia ka seng ba kan leit khang tala noh ia ka ophis jong ka MeECL kaba don ha Nongpoh.

Shillong: U kyrtong ka BJP ban iakhun ia ka elekshon shiteng samoi na Shella, u bah Joshua Warjri, u la pynpaw ka jingkyrmen ba un poi sha ka thong ka jingjop da ka jingialam u blei nakhmat.

U bah Joshua u la thep kyrteng mynta ka sngi kum u kyrtong ka BJP ha ophis u SDO (Civil) Sohra u bah L Kynjing, ba la synran lang u MLA bah Sanbor Shullai bad kiwei ki nongialam ka party.

“Nga kyrmen ba u Blei un ialam na khmat, nga ngeit ka jingjop ka thong ngan jop. Nga kyrmen ba ngan jop 100 percent ha kane ka elekshon”, la ong u bah Joshua.
U la ong ba lada un jop ruh un sah beit man ka sngi ha ka konstitwensi khnang ban iakynduh ia ki briew, ym ban sah shabar.
” Hadien ba nga la jop ngan nym mih na konstitwensi bad lada ngan leit shano shano hynrei ngan wan phai ban sah beit ha ka konstitwensi ba ki paidbah kin wan iakynduh ia nga ha kano kano ka por”, u la ong.
U bah Joshua u la khublei ia ka BJP mandal bad khamtam ia u bah Jrop Sing Nongkhlaw uba la pynsuh thied ia ka BJP ha Shella.
U la buh thong ba ki kam ba hakhmat eh ka long ka surok, watla bun kiwei ki mat tangba yn sa peit hadien ba la jop ia ki jingdonkam namar ba kila bun palat.
“Ki kam ba hakhmat duh ka long ka surok, bad kiwei bad ngin sa peit hadien ba la jop ia ki jingdonkam namar ba kila bun na ka bynta ka bha ka miat ki paidbah ba duk ba suk”, u la ong.
U la ai khublei ia ka mandal BJP Shella, ia bah Jrop Sing Nongkhlaw uba la pynsuh thied ia ka BJP ha Shella.

Shillong: Myn hynnin ka sngi, ki don saw ngut kiba thep kyrteng, kum ki kyrtong jong ka elekshon shiteng samoi na Shella Constituency bad kitei ki long ka kong Grace Mary Kharpuri, ka ban ia khun kum ka kandidet shimet, U Bah Batyngshain Laitmon Ryngnga, u ban iakhun na ka seng Congress, U Bah Joshua Warjri, na ka seng BJP bad U bah Mosjo Rock F Wanswett, kum u kandidet jong ka seng PDF.

Lyngba ka jingthep kyrteng jong kitei ki saw ngut, kumta ki kandidet baroh, ki ban iakhun ha ka 21tarik Risaw 2019, ki don hynriew ngut bad kitei ki kynthup ia U Bah Balajied Synrem, u kandidet ka seng UDP, U Bah Komen Laitmon, u kandidet shimet.

Shillong: U Amit Agarwal, u trai jong ka Samsung Smart Café, GS Road, Shillong ula ujor sha ki pulit, ba ha ka 29tarik Nailur 2019, ha ka por antad kumba 3.30 mynstep haduh 5 baje mynstep, ki runar, ki la leit rung ha ka dukan die mobile jongu bad ki la ioh rong tuh ia 36 tylli ki mobile phone, kiba shongdor T.11lak bad ka pisa kaba don T.25hajar.

Shillong: U kyrtong ka Congress na Shella u bah Batyngshain Laitmon Ryngnga u la kam ba ka jingiakhun ha kane ka elekshon shiteng samoi ha Shella, kan ka jingkyrmen ia u namar ba ha ka elekshon MDC ba la dep, u la shah rem salit tang 200 vote tam ha u kyrtong ka UDP u bah Teinwel Dkhar.

U bah Batyngshain u la thep kyrteng myn hynnin ka sngi ha ophis u SDO (civil), Sohra bah L Kynjing hapdeng ka jingwan synran ki nongialam ka party kynthup katto katne ki MDC ka KHADC.

“Ha kaba iadei bad kane ka elekshon ban wan, nga la iakhun ia ka MDC ha kane ka elekshon bad ka jingiakhun jong nga kam long ia u bah Teinwel hynrei ka jingiakhun jong nga ka long bad u Dr Donkupar Roy namar ba u la trei shitom bha ia u bah Teinwel. Nga la shah rem tang 200 vote tam bad nga shah rem tang na ka thain khappud hynrei na ki jaka Khasi nga la jop”, la ong u bah Batyngshain.
U la ong ba u don ka jingkyrmen ha kane ka kynti ban poi ha ka jingjop. “Nga kyrmen ba ha kane ka kynti ngan ioh ia ka jingjop”.
U la ong ba ka jingioh vote jong u ha ka MDC na kane ka thain Shella, kan ktik ia ki paidbah na ka thain Umniuh, Nongjri bad kiwei kiba hap ha ka Nongshken konstitwensi ha ka MDC, ba kin ai ka jingkyrshan khamtam ba ka Shella ka kwah ia ka jingkylla.
Ha kajuh ka por, u bah Batyngshain u la kyntait ba ka jingmih madan ka kong Grace M Kharpuri ban iakhun naba ka duh tiket na ka Congress, kan nym ktah satia ia u namar ba ka dei ka mon laitluid jongka.
Halor ka jingkylli ba kan ktah nem ia u hadien ba ka Kong Grace ka la mih noh na ka Congress ban iakhun ia ka elekshon namar ba kam ioh tiket, u bah Batyngshain u la ong, “Nga sngew burom ia ka kong Grace Kharuri, kaba la mih hadien ba la duh tiket. Ka jingmih jong ka, kam nym ktah. Shi bynta ka jaka ka Shella knstitwensi ka don ha Nongshken konstitwensi kaba don 4000 vote bad 25 hajar ka don sha thain Shella konstitwensi, bad ngim don eiei ban ong ia ka jingmih jongka bym ioh tiket, ka dei ka mon laitluit hynrei na ka liang jong ngi long skhem ban jop ha kane ka sien ba mynta namar ba ka vote kaba kham bun ka don sha ka thain Shella kaba nga ruh nga khlain bha ha ka MDC”.
Ha kane ka jingthep kyrteng u bah Batyngshain la wan synran lang ruh u bah Wilfred Khyllep uba khlem tiket na ka Congress nalor ki MDC ka party na KHADC.
U la ong ba u Dr Donkupar u la leh katba la lah ka bor hynrei um nym kren ia kaba la leit hynrei yn kren ia kaba shakhmat ha kaba ka Shella ka donkam shibun ki jingdonkam kum ka surok, skul bad kiwei ki kam pynroi.
“Lada ki paidbah kin pynjop ngan iakhun ban pynbha bad ban pynioh ia ka surok sha ka thain kaba long u budlum ia ka roi ka par”, u la bynrap.

Shillong: U bah Mosjo Rockfeller Wanswett u la thep kyrteng mynta ka sngi ha u SDO (Civil) Sohra bah L Kynjing kum u kyrtong ka People Democratic Front (PDF), ba la synran lang ki nongialam ka party naduh ki MLA ba kynthup bah Banteidor Lyngdoh, bah Hamletson Dohling, bah Gavin M Mylliem bad kiwei ki nongialam ka party.

Haba kren sha ki lad pathai khubor, u bah Mosjo u la phla ba watla u hymmen jong u, u bah Leston Wanswett u dang don ha ka NPP hynrei ma u, ula jied ban iakhun na ka PDF namar ba ka dei ka party kaba dang khlain bad kaba dang eh.

“Ka long ka jingshisha ba i bah Leston i dang don ha ka NPP bad nga la ialade nga la jied ia ka PDF kum kawei ka party ba dang eh dang khlain ban iaid shaphrang. Nga sngewsih ba ba iba pli i la don ha juk tymmen, im lah shuh ban bud ryngkat bad nga bad nga shaniah ha ki nongialam ka party ban shim ia kane ka kam”, la ong u bah Mosjo.
U bah Mosjo u la ong ba u don ka jingkyrmen namar ba u hymmen jong u u bah Leston Wanswett u la iakhun 3 sien bad u wan baar. U la iathuh ba namar ba u bah Leston u kham noh rta, um lah bha shuh ban ialeh ia ka elekshon bad u la khot ia u kum u para ban iakhun ia ka elekshon ban pyndep ia ki jingangnud jong u ban shakri ia u paidbah ka konstitwensi.
“Nga don ka jingkyrmen namar ba i hymmen jong nga i bah Leston Wanswett u la iakhun 3 sien bad i wan baar. Ha ka jingiaid ka rta, i la nang noh, im lah bha shuh ban ialeh ia ka elekshon bad ngi la khot ia nga kum u para ban iakhun ia ka elekshon ban pyndep ia ki jingangnud jong i ban shakri ia u paidbah ka konstitwensi”, la ong u bah Mosjo.
U la ong ba u Dr Donkupar Roy ba la khlad hadien ba la jop hynniew sien, u la ioh ban trei hynrei dang don bun kiba sahteng ba um shym la lah ban pyndep. U la ong ba lada un jop, kiei kiei kiba la leh u MLA mynshwa, un buddien bad ban wanrah ruh ia kiba thymmai.
U la pynpaw ba ka surok ka dei ka mat ba kongsan ba u angnud namar ba ka la sniew shaba palat ha ka thain Shella nalor kiwei pat ki mat na ka bynta ka jingbit u paidbah.

Shillong: U nongialam uba dei ruh u MLA ka BJP u bah Sanbor Shullai, u la kyntu ia ki paidbah ka Shella ba kin kyndit bynriew ban jied beit ia ka BJP kaba don ha ka sorkar ha Delhi, khnang ba ki jingmyntoi kin beit sak naduh Delhi shaduh Shella khlem da donkam ban iaid kyllain.

Haba kren myn hynnin ka sngi sha ki lad pathai khubor, u bah Sanbor u ba la wan ban synran ia u kyrtong ka BJP ban iakhun na Shella bah Joshua Warjri, u la ong ba ki ki myntri sorkar, naduh u myntri rangbah, ki nongialam ka District Council kila rah dorkhas ban pan pisa na ka dorkar BJP na Delhi, da kaba ong ai pisa ai pisa.

“Ha kane ka sorkar MDA, ki myntri sorkar, u myntri rangbah, kila rah dorkhas leit pan pisa na Delhi, ai pisa ai pisa. Tang mynta ka sngi, u Dy CEM ka KHADC la iohi ba u la leit pan pisa na ka Delhi. Leh aiu ia kine ki nongshong shnong ba ieid jong ngi ban leit sha ki Team B, Team C, pynjop beit ia u bah Joshua u kyrtong ka BJP bad ia ka skhim jong phi, yn rah naduh Delhi sak shaduh Shella bad kin sa iohi ia ki jingshai”, la ong u bah Sanbor.
Halor ka jingkynthah ka Congress, u bah Sanbor u la ong ba ka Congress ka jur tang ka kynthah briew bad dei na kane ba ki briew kila kyntait lut ia ka ha baroh kawei ka ri.
“Ka Congress ka jur tang ka kynthah briew, na kata ka daw, la shah kyntait lut ha ka ri India nalor katta snem la ailad ki paidbah ban shna sorkar ha ka jylla bad ka ri hynrei balei ki lynti syngkieng ki dang sniew haduh katta. Namar ba ka dei ka liangpyrshah kan wad lad ban kynthah bad namar ba ka tlot ka hylla katba ma ngi kiba khlain ngim hylla bad ngin shu trei beit da ka kam bad 21 tarik ki paidbah Shella kin thep beit ha u syntie lotus”, la ong u bah Sanbor.
Halor ka Citizenship Amendment Bill (CAB), u bah Sanbor u la ong ba ka BJP ka la dep pynsngew ba ka sorkar pdeng ka lah ban pyntreikam ia ka hynrei ha kane ka dong mihngi kan ailad ha ka mon laitluid jong ki jylla ban rai, la kin pdieng ne em.
“Ka CAB ka lah ban pyntreikam ha India hynrei ha North East dei ban pynlait da kaba aiti ha ka mon ka sorkar jylla ban rai. Kane ka dei kaba ngi la iakren bad ki nongialam ka BJP ha Delhi bad nga la ai jingpynkynmaw ia kane ha u Amit Shah ruh bad ki burom kum ki nongialam. Ngim kren da ktien hynrei ngi buh ia ka jaitbynriew hakhmat da ka kam ruh ngi leh, ym kiwei ki kular da ka bneng por elekshon, da la jop ki ai da ka dujok”, la ong u bah Sanbor bad bynrap, “naduh snem 1972 ka Shella konstitwensi ka la mad ia ka dujok, thep noh ia u lotus ka BJP ha ka 21 tarik Risaw ban ioh ia ka jingshai bad jingkyrkhu”.

Shillong: U Bah FM Mawphniang president jong ka seng United Ri Bhoi People bad Framers Association (URBPFA) u la phah da ka jingthoh sha u myntri rangbah ka jylla u Conrad K Sangma bad sha u Bah Banteidor Lyngdoh myntri ba dei peit ia ka tnad rep ban dawa na kane ka sorkar ba ka dei ban pyntrei kam pura ia ka Meghalaya State Agriculture Producers bad Live Stock Marketing (Promotion bad Facilitation) Act 2017.

U bah Mawphniang, ha ka shithi kaba la phah sha u myntri rangbah ka jylla u la ong ba ha ka jingshisha ka sorkar kala dei ban pyntrei kam ia kane ka ain la slem bha hynrei namar ka jingbym don jingkit khlieh jong ka sorkar kane ka ain na ka bynta jong ki nongrep kala shu sah ha suin khlem pyntrei kam haduh kine ki sngi.

Na ka bynta ka bha ka miat jong ki paidbah na ka liang jong ka URBFPA ka dawa na kane ka sorkar ba ka dei ban pyntrei kam ia kane ka ain khnang ba ki nongrep kin ioh ia ka jingmyntoi ha ka rep ka riang la ong u Bah FM Mawphniang president.

Shillong: Ka KSU Jowai Circle, ka pynrem jur, halor ka jingthmu bat tnga jubor jong u Roshan Kumar ia kawei ka khynnah skul, kaba dang 9 snem ka rta, kaba don ha kawei ka skul ha Jowai.

Ka seng hapoh ka jingialam u President samla Morningstar Pasi President KSU Jowai Circle, ha ka jingiadon lang u President Jong ka District Samla Ohibait Dkhar mar syn ioh jingtip ia kane ka jingjia mar mar la leit ban ia kynduh ia u Principal jong katei ka skul bad haba ia kren bad u Principal u la ong ba da ka jingkloi jong ki bor jong ka ain la lah ban shimti mardor ia u tei u riewpoh bad la pynkit ia u sha Jowai police station.

Ha ka jingbatai jong u principal ia ka jingjia baroh u la ong ba u tei u dkhar la wan ban leh wiring ha ka kamra painkhana jong katei ka skul bad ha ka por ba katei ka khynnah ka thmu ban leit shabar ha ryngkat bad ki para kynnah skul u la patan jubor ia ka shapoh bad donbok da ka jingiarap jong kitei hi ki para khynnah skul la lah ban pynlait ia katei ka khynnah na ka jingthmu ba sniew jong u tei u riew poh.
Ka Seng mar syndep ban ia kren bad u principal ka la leit buh jingthoh bad dawa na ki bor jong ka Ain ba dei ban pynshitom da kaba tyngeh bad ban pynhap ia u ha ki kyndong ain ba tynngeh ha kaba iadei bad ka ain ai jingiadei ia ki khynlung khynnah.
Ka Seng ka tip ba ia katei ka kam wiring ha kKatei ka skul la shim contract da u ma Welcome Lyngngi. Ka Seng haba ka la ioh ban ia kren bad utei u contractor, u la phla ba u dei u nongtrei jong u bad um ithuh ia u namar ba la wanlam ia u da u head misteri jong u ba kyrteng u Ram Babu Sah.
Kaba sngew lyngngoh shuh shuh ba ki tei ki dkhar kiba wan trei beain khlem da don ia ki kot ki sla kiba biang. Kumta Ka Seng da kane ka khubor ka maham jur ia kino kino ki contractor kiba wan rah nongtrei da ki bar jylla bad kin kynmaw “Kum u bsein hadien ba la dep pynsyaid u la puh kylla ban ia ngi”.

Shillong: U MLA jong ka Mawkyrwat u ba dei ruh u General secretary jong ka seng sain pyrthei HSPDP u bah Renikton L Tongkhar u ba ia don ha kane ka Sorkar synrop jong ka MDA, u la pynpaw ba ka jingiakhih ka MEMRIWU ka la ktah ia ki paidbah bad ula pynsngew ba ka sorkar ka dei ban pynbeit ia kane ka jingeh.

U Bah Renikton u la ong ba lada ka GVK Company kaba peit ia ka jingpyniaid ia ki Ambulance 108 kam lah ban pyniaid ha ka rukom kaba dei, ka sorkar ka dei ban aiti noh sha kiwei pat, khnang ba ki paidbah kin nym jynjar.

Haba ia dei bad ki jingeh kaba ki nongtrei ka EMRI ki la buh ha khmat ka Sorkar, na ka liang ka sorkar ka dei ban peit bad dei ban ia pynbeit khnang ba ki paidbah kiba don kam ia ka jingshakri jong kine ki 108 Ambulance ha kaba kit ia ki ba pang ba shitom kham tam ha ki nongkyndong kin nym ia kynduh jingeh.

Na ka liang jong u kum u nongialam jong ka seng HSPDP ba don lang ha kane ka sorkar u kyntu ia ka sorkar ba ka dei ban pynbeit kloi lan ia kane ka jingeh kaba ki nongtrei ka EMRI, ki la iakhih mynta la ar sngi na ka bynta ka jingmyntoi jong ki paidbah bad lada ka GVK kam sngap ia ka sorkar dei ban weng bad aiti noh sha wei ban pyniaid ia ki 108 Ambulance.

Shillong: Na ka liang jong ka CoMSO hadien ba ka la leit ia kynduh ia ki nongtrei jong ka GVK EMRI (108 ambulance) kiba mynta ki don ha ka jingiakhih; ka la sngewdei ban ai ka jingkyrshan ia ki mat dawa jong ki nongtrei, namar la iohi ba ki mat dawa jong ki, ki long kiba don nongrim . Ka CoMSO, ka dawa na ka sorkar ba kan khot ia kren ia kine kiba iakhih bad ka sorkar ka dei ban sngap ia ki mat dawa jong ki.

La iathuh shuh shuh, ba ka company GVK ka la leh bun kiei kiei ki kam ki bym lah ban pdiang. Kane ka company ka la shu buh jingmut beit thik tang kumno ban ioh nong bun bad ka pyntroin (compromise) noh ia ki jingdon kam ki nongtrei bad ki kali kit nongpang . La dawa na ka sorkar ba kan thung da ka kynhun tohkit ka bym ia shah liang (independent enquiry) lane ban aiti noh sha ka CBI ban tohkit ia kane ka kam.

“Ka emergency bad ambulance service ka don ka kamram ban iada ia ki jingim ki briew bad ngim sngewiahap ba ia ka kamram ban iada ia ka jingim ki briew (life saving agency) ban ai contract sha ki nongkhaii ( businessman) kiba shu pyrkhat beit ia ka nongioh bun. Kumta ngi dawa na ka sorkar ba ka dei ban shimti hi noh ia kane ka kam ban ban sangeh noh ka ai wai sha ki nongkhaii” pynkut ka kyrwoh na U Bah Treiborlang Suchen, uwei na ki nongialam ka CoMSO.

Shillong: Lyngba ka bor, kaba la bynshet, katba kum ka sub-Section(1) of Section 3 jong ka Meghalaya Essential Services Maintenance Act, 1980 (No.23 of 1980), Amendment Act 2003 bad na bynta ka bha ka miat jong u paidbah, kumta U Additional Secretary jong ka sorkar Government of Meghalaya, Political Department u pyntip ba ka sorkar Meghalaya, ka la khang pyrshah ia ki jing ia khih jong ki nongtrei kiba kit nongpang (field staff) jong ka GVK Emergency Management and Research Institute (EMRI).

Kane ka hukum, ka trei kam noh mynta hi bad kan bteng, na ka bynta hynriew bnai.

Nongstoiñ: Ka Joint Action Committee (JAC) jong ki 8 tylli ki sengbhalang jong ka thaiñ Mawshynrut ha ryngkat ka jingiasnohkti lang ka Synjuk ki Nongsynhsar Shnong Umdang Area, mynta ka sngi ki la hiar sha ka thaiñ Shalang ban leit pynsangeh noh ia ka jingtreikam jong ki karkhana thang dewiong kiba don ha katei ka thaiñ.

Ha katei ka jingleit pynsangeh noh ia ka jingtreikam jong kitei ki karkhana thang dewiong ha Shalang na ka liang jong ka JAC, ka la khang tala ruh ia ki jaka treikam jong ki Manager jong kitei ki karkhana bad phah leit phai ïing noh ia baroh ki nongtrei kiba trei ha kitei ki karkhana kiba dei ruh ki briew kiba na bar jong ka Jylla.

Katei ka jinghiar jong ka JAC ki Sengbhalang ban leit phah sangeh noh ia ka jingtreikam ha kitei ki karkhana ka dei ruh hadien ba ka jingaipor kaba 15 sngi ia kitei ki karkhana ba kin sangeh noh ka la kut bad namar ka jingbymsngap jong ki trai karkhana ia katei ka jingdawa, kumba ki la pynpaw ruh ha ka jingialang ban pyrshah ia ka jingdon jong kitei ki karkhana kaba la long ha ïew Shahlang ha ka 12 tarik u Nailur 2019.

Ia katei ka jingleit pynsangeh bad khang ia kitei ki karkhana la sdang na Swangre kaba don kham harum ia ka ïew Shahalang ter ter shaduh ka shnong Lampar, Kyllonmathei, Nongdaju bad kumjuh ha Nongdagong bad ha katei ka jinghiar pynsangeh jong ka JAC ia kitei ki karkhana la lap ruh ba nalor kiba la don lypa, dang don shuh shuh shibun kiba dang shna bad ki ba dang thmu ban shna bad haba kheiñ kyllum ka jingdon jong kitei ki karkhana ha katei ka thaiñ kan ym duna shuh ia ka 20 tylli.

Haba iakren bad ki nongthoh khubor hadien bala dep ban pynsangeh ia ka jingtreikam ha kitei ki karkhana, na ka liang jong u President ka JAC u Samla Eveningstar Nongsiang u la ong ba ka JAC kaba kynthup ia 8 tylli ki Sengbhalang jong ka thaiñ Mawshynrut ryngkat ka Synjuk ki Nongsynshar Shnong, ki la shim ia katei ka sienjam ban phah sangeh noh shi syndon ia ka jingtreikam jong kitei ki karkhana ka dei hadien ba ki trai kim shym la sngap ia ka jingai por ka jong ki ba kin khang.

Katba na ka liang jong u General Secretary jong ka JAC u bah K. Kharmutee u la ong ba ka jingdon jong kitei ki karkhana ka la nang bun nang bun katba nang mih ki sngi bad u la ong ruh ba ka JAC kam bishni ia ka bylla ka sngi jongno re jongno, hynrei u la ong pat lada kata ka kam bylla jong ki ka ktah pynban ia ki paidbah ba bun balang, ym banse ban hap ban leh eiei.

Shuh shuh u bah Karmutee u la kyntu ruh ia ka sorkar ba kan shimkhia ha kaba iadei bad ka jingmih jong kitei ki karkhana ha ha thaiñ Shalang, namar kala ktah shisha ia ka koit ka khiah jong ki paidbah khamtam ka tdem kaba sma iw tung kaba mih na kitei ki karkhana bad ha kajuh ka por u la wer ia ki paidbah ba kin iatreilang bad ka JAC, khnang ba yn lah ban rat dyngkhong ia kiba kum kitei ki jingpynsniew khamtam ia ka koit ka khiah bad ia ka mariang ruh kumjuh bad u la pyntikan ruh ba katei kamdei kaba kut, hynrei na ka liang jong ka JAC kan sa dang iai buddien ia katei ka kam.

U bah R. Ryntong General Secretary ka Synjuk ki Nongsynshar Shnong Umdang Area u la iathuh ba kiba bun kiba la kynnoh da kaba ong ba ka Synjuk Nongsynshar Shnong, ka dei ka nongpyrshah ia ka jingwan jong ki kam pynroi ha ka thaiñ bad haba pynshai ia kane u la ong ba kum ka Synjuk, kam don ia kano kano ka jingpyrshah ia ka jingwan jong ki kam pynroi, hynrei lada kita ki jingpynroi ki wanrah pynban ia ka jingsniew ym banse ban hap ia pyrshah namar ba ka Synjuk ka kwah ba ki paidbah kin im bad ioh mad ia ka lyer kaba khuid, ki um kiba khuid kumba ka ju long ha ki por ba la leit.

Ym tang kata u la iathuh ruh ba na ka liang jong u Deputy Commissioner jong ka West Khasi Hills, u la phah ia ka shithi sha ki shnong ban bthah ba lada ki don ka jingsngew pyrshah ia ka jingdon jong ki karkhana ki dei ban ujor da ka jingthoh sha ka ophis u DC hapoh 30 sngi bad na ka liang jong ka Synjuk ka la leh ia kata ban ai da ka jingthoh ban ujor ia ka jingpynthut jong kitei ki karkhana ia ka khuid ka suba bad ia ka koit ka khiah jong ki paidbah katei ka thaiñ.

Shillong:Ki saw ngut ki MLA kiba kynthup ia u bah HM.Shangpliang u MLA ka Mawsynram Konstituensi, u bah S.K Sun MLA ka Mawphlang Konstituensi jong ka East khasi Hill District, u Bah Renikton Tongkhar MLA ka Mawkyrwat Konstituensi bad u bah Pius Marwein MLA ka Ranikor Konstituensi jong ka Southwest Khasi Hill District ki la wan ban ia kynduh ia Myntri rangbah ka Jylla u Conrad K Sangma mynta ka sngi ban dawa ban pynlong Highway noh ia ka surok na Lad Mawreng sha Ranikor kaba long ka surok single lane bad ka dei ruh ka surok ka ba la rim tam.

Ha ba ia kren bad ki lad pathai khubor hadien ka jing ia kynduh bad u myntri rangbah u bah SK Sun u la iathuh ba ia kane ka surok na ka liang ka National Highway Indian Development Corporation Limited (NHIDCL) ka la dep khot ia ka tender ban shna ia ka Detail Project report (DPR) ha u snem 2018, hynrei kaba lyngngoh ka long ba haduh mynta pat kam pat khot ia ka tender ban sdang ia ka jingtrei.

U bah Sunn u la bynrap ruh ba na ka jingiakren bad u myntri rangbah mynta ka sngi ka la pawshai ba ka jingbymkhot ia ka tender ban trei ka long ba ka NHIDCL haduh mynta kam pat ioh ia ka jingshai na ka tnad shna surok jong ka sorkar pdeng ia ka rukom bei pisa ha kaba ia dei bad kane ka surok.

Na ka liang jong kitei ki saw ngut ki MLA ki la ban jur ia u myntri rangbah ba ka sorkar jylla ka dei ban shim khia ha kaba ia dei bad kane ka surok, ki la ong ruh ba lada ka sorkar jylla kam shim khia na ka liang jong ka sorkar pdeng kan pynslem. Kane ka surok ka long kaba don kam ia ki briew namar ka poi sha duh Baghmara.

Na kane ka jingiakynduh ka long ban dawa na sorkar ba ka dei ban ithuh noh ia kane ka surok kum ka National Highway, na Lad Mawreng sha Ranikor ba iaid lyngba ka Mawkyrwat, katba ia ka surok na Weiloi sha Balat ka sorkar dang phah ia ka skhim sha ka sorkar pdeng kum ba la ai jingmut da u MLA jong ka Mawsynram u bah H. Shangpliang.

Ha kane ka jingiakynduh na ka liang jong u Myntri rangbah ka jylla u Cornad K Sangma u la ai ia ka jing kular ba ka sorkar jylla ka la shim khia ia kane ka surok bad ka jingiakren bad ka Sorkar pdeng ha kaba ki kam ki dang iaid bad haduh mynta ka jingeh ka dei tang ia ka rukom bei pisa.

Shillong: Ha ka por kumba shibaje ka noh phai sngi ki paidbah ki ba iaid ba ieng ha jan ka pung Nanpalok (ward lake) ki la iohi ia kawei ka metiap jong uwei u rangbah briew ka ba per ha sla um jong ka pung Nanpalok.

Mar sien iohi ia kane na ka liang ki paidbah bad ki nongtrei ha Nanpalok (wardlake) ki la pyntip mar mar sha ki tnad pulit.

Na ka liang ki tnad pulit mar mar ki la wan ban khwai noh ia ka ne ka metiap jong une u rangbah na ka ne ka pung Nanpalok.

Hynrei kat haduh mynta na ka liang ki pulit kim shym la tip ia ka kyrteng ne ka jaka sah ne na kano ka jait bynriew jong une u briew, ia ka met jong une u rangbah la pynkit noh sha civil hospital ban leh ia ka ba donkam.

Halor ka heading kaba ong “Iakynduhlang ki riewrangbah jong ka shnong mawsaw” kaba la pynmih da uwei u briew ba kam ialade kum u riew rangbah ka shnong mawsaw uba thrang iaka jingsuk hapoh ka shnong, ngi dap da kajingsngew lyngoh bakhraw ban iohi haki lad pathai khubor ba kila pynlong ia ka jingiakynduh lang sopsop khlem tarik ne kano kano ka jingtip hapoh shnong, Shuh shuh naka liang jong ngi, ngi kwah ban pynshai ba dei utei u briew bala kam ialade kum u riew thrang jingsuk uba ia sylla sop sop bad u bistoran iawphniaw ban pynkulmar iaka shnong mawsaw naduh ba u bistoran iawphniaw ula thung jubor ialade kum uta u myntri kur iawphniaw mawsaw khlem da jied daka dorbar kur iawphniaw mawsaw.

Kaba lyngoh ka long ba kumno utei u bah khlurlam jingshai lyngkhoi u batai stad iaka synshar kur shynshar jaid jong ka kur iawphniaw mawsaw haba ialade um dei satia naka kur iawphniaw, imat une ruh u la kwah long rangbah kur iawphniaw jubor kum u bah bistoran bad ula klet ialade ba udei naka jaid lyngkhoi. Halor ka jingpyrshang jongphi ban pynsngewthuh iaki paitbah, yn ym don mano mano ruh ban ngeit ne bud iaphi namar baka lynti baphi ialam ka long kaba bakla bad kan ialam sha ka jingjot bad pait arliang ka shnong ka thaw. Ka long kaba shisha kumba phi pynpaw baki paitbah kim bud iaphi bad u bistoran iawphniaw namar ba ngi la tip lypa phi dei ki jaid briew kiba kumno haka imlang sahlang.

Ka jingpan sanad thymmai jong u bah krally iawphniaw sordar mawsaw watla ka por kam pat kut ka long halor ka nongrim baka shnong hadien ba kala sngewthuh ba u bistoran iawphniaw u pynmih shibun ki kynrum kynram kum u secretary shnong, kala weng noh ia u bistoran iawphniaw kum u secretary shnong, hynrei dei u syiem uba kwah thung bad pynneh secretary shnong jubor ia u bistoran iawphniaw bad um sngap shuh iaka rai u paitbah shnong mawsaw. Halor ka jingleit tur jongki paitbah mawsaw sha district council bad office u syiem nobosohphoh ngi don ka hok ban leit pynpaw iaka jingpyrshah namar ba ngim kwah ba u syiem un weng jubor ia u Sordar khlem kino kino ki daw ba biang bad ruh ka shnong kam kwah ba u Bistoran Iawphniaw un long Acting Sordar hapoh shnong Mawsaw namar ba u dei u briew ba wan rah iaki kynrum kynram ym tang haka shnong hynrei wat haka Kur iawphniaw bad wat haka hima Nobosohphoh baroh kawei.Halor ka jingkam Myntri Kur Iawphniaw da u Bistoran Iawphniaw ka Durbar kur Iawphniaw kaba la long haka 2tarik August 2018 kala rai bad ujor sha ka office u Syiem Nobosohphoh ban pyrshah iaka jingkam Myntri jong u khlem da jied ne mynjur daka Durbar kur Iawphniaw Mawsaw bad baroh kawei.Hynrei kaba lyngoh ka long baka office u Syiem Nobosohphoh kam shym sngap wat tang shilliang ka skhor ne ai jubab halor katei ka ujor.

Halor ka jingkynnoh jong u khlurlamjingshai Lyngkhoi ba u syiem u la khot bunsien ia u Bah krally Iawphniaw ban wan mih hapoh office jong u syiem ngi pynshai ba kam ju don kaba kum kata ka jingkhot daka office u syiem bad naka liang u Sordar Bah Krally Iawphniaw u khlem ioh jingtip ne ioh pdiang wat tang kawei ka shithi kaba wan na office u syiem Nobosohphoh.Kumta lada phi kynnoh ba u Sordar um ju leit mih ngi kwah ba phin ai da ka sakhi ba shai halor ka jingkynnoh khlem nongrim jong phi ne lada u syiem u phah rah haphi kita ki shithi balei phi set khlem wan ai ha u Sordar.

Kumta ngi kyrpad iaphi bah Khlur Lamjingshai Lyngkhoi ba phin sngewbha ban kham tyngkan ban padiah ia u thylliej khlem shyieng jongphi ha kaba katkum ka jingthoh jong phi ngim sngewthuh shuh la phi dei u ta u riew rangbah ka shnong Mawsaw,U Rangbah Kur Iawphniaw ne u Deputy Syiem jong ka Hima Nobosohphoh namar ba phi la batai lut iaki kam Kur iawphniaw,kam shnong bad ka kam hima.

Ha kaba kut ngi pynpaw ka jingpyrshah bad iai pyrshah ban thung ia u Bistoran iawphniaw kum u Acting Sordar ka shnong Mawsaw bad ngi kyntu iaki bor ba dei khmih kum ka office u syiem Nobosohphoh bad ka District council ba ki dei ban pynbeit noh ia kane ka jinghuri hura ha Shnong Mawsaw khnang b aka ka imlang sahlang ne ka suk ka sain kan wan phai pat hapoh kane ka shnong bad ngi kwah ba ia u sordar shnong un jied hi da u paidbah bad ngi long kiba la kloi ban ia shim bynta haki meeting ba pynbeit da u syiem ne District council.

Nongpynshai:

Shri. Primmistar Paliar

Shri.Skingland Iawphniaw (Manager Kur Iawphniaw)

Shillong: Ka khubor pulit, ka iathuh ba ka don ka jingtwa khyndew ha Barapani View point(Ryndangbriew) GS Road bad ka leit ka wan, ka la sahkut na baroh arliang.

Ki pulit ki ai jingmut ia ki paidbah, ba kin iaid noh lyngba ka Umroi/Diengpasoh, ha ka jaka ban iaid na Umiam. Ka jingtrei haduh ba thoh ia kane ka khubor, ka dang iaid shakhmat.

Nongpoh: Ha ka jingjia aksiden kaba la jia mynta ka janmiet ha ka por 7 baje eiei ha Umling, uwei u rangbah briew uba la tip kyrteng kum u Kynsai Mawiong na ka shnong Umling, u la duh noh ia la ka jong ka jingim bad khlad hashen, hadien ba u la shah iuh ha kawei ka trok 12 shaka kaba don ia u number WB-67-3400.

Ka jingtip kaba la ioh lum da u nongthoh khubor, la iathuh ba katei ka trok, kaba kiew na Guahati sha Shillong, hynrei haba la poi ha katei ka jaka, ka la kum iuh ia utei u Rangbah tad haduh ba un da khlad noh hashen.

La ioh jingtip ba ka daw hi kaba la pynlong ia utei u rangbah ba un shah iuh ha katei ka trok, ka dei namar ba u nongniah jong katei ka trok um shem la iohi ia utei u Rangbah, namar ha katei ka por ki don bun ki kali kiba ieng thied jingthied harud jong katei ka jaka bad utei u rangbah u la mih na jan jong kitei ki kali, kaba la pynlong ia utei u nongniah trok ba um iohi bas kum iuh ia utei u Rangbah briew.

Shillong: Ki 4 ngut ki MDC jong ka seng Congress, kiba mih khmat ha Garo Hills District Council, ki la mih noh na katei ka seng ban iasoh ialade sha ka liang synshar, kaba la ialam da ka National Peoples’ Party (NPP).

Ki saw ngut ki MDC, kiba leit pyniasoh NPP, ki long U Ismail Marak, U Mark Goera B Marak, U Kenadic S Marak bad U Rupert Sangma.

Da katei ka jing pyniasoh NPP jong kitei ki 4ngut, ka seng synshar jong ka NPP bad ka kynhun jongka, ka la poi sha ka 25ngut ha ka iing kaba don 30ngut bad ka seng Congress, ka don mynta 4ngut ki dkhot ha katei ka Council.

Mumbai: Ka Punjab bad ka Maharashtra Co-operative Bank (PMC) ka pyndonkam haduh 21,000 tylli ki account ba shu thok, na ka bynta ban buhrieh ia ka jing ai ram pisa buhrieh jongka sha ki briew kiba ki nong pyniaid jong katei ka Bank, ki iahap jingmut.

Katei ka dei ka jing ujor jong ka Economic Offences Wing (EOW) jong ki pulit Mumbai, ka iathuh ba ka jing ai ram jong ki bor pyniaid jong ka Bank, ka poi sha ka T.4,355.46 klur.

La iathuh ba kawei ka kynhun, ka ioh ram haduh 44 tylli.

Kito kiba la shah ujor ki long U Waryam Singh, Chairman jong ka Bank, U Joy Thomas, Managing Director bad sa shibun kiwei pat ki nongtrei jong katei ka Bank. Ka jing ujor, ka long ruh pyrshah ia ka Housing Development and Infrastructure Ltd (HDIL), ha ryngkat bad ki nong pyniaid jongka, kiba kynthup ia U Sarang Wadhwan bad U Rakesh Wadhwan, kiba ioh ram ialade na katei ka Bank.