Shillong: U Myntri Rangbah ka Jylla Meghalaya u Conrad K Sangma mynta ka sngi u la kular ban buh ia ka jingialang bad ki nonghikai Adhoc ha u bnai Nohprah ban ia kren shaphang ka jingeh kaba ki nong hikai Adhoc ki ia kynduh ha ka jngialang ka ba u la long kum u kongsan ba la pynlong da ka All Adhoc School Teacher ha madan Malki.

Haba ai jing kren ha kane ka sngi u la ai khublei ia ki nonghikai adhoc ki ba la wan na kylleng ki jylla ban iasnoh kti lang ban ioh ban pynpaw ia ki jingeh ki ba ki ia kynduh “Ka jing nang jing stad ka long ka thong ka ba ha khmat eh jong ka Sorkar jong nga”. Haba u kynmaw ia ki rukom pyrkhat kaba u kpa jong u, u P.A Sangma u ju hikai u la ong “u symbai jong ka jing pyrkhat ba ka jing nang jingstad ka long ka badonkam ia ka im lang sah lang la dep sara naduh ba u kpa jong nga u dang long kum u nong ialam jong ka party .”

U la iathuh ruh ba u kpa jong u, ha ba u la sdang ban trei kum u nonghikai,u kpa jong nga u shait ia ai ka jinghikai ba ka long ka kam kaba sngewhun, namar wat ha ka kam hima sima lada leh bha shibun ruh kin don beit ki jing kynthoh, hynrei haba phi long kum u nong hikai ha ba phi iohi ba ki khynnah ki ba phi la ai jingnang jingstad ki longbriew manbriew, ym don kano kano ka ban ai jinghun.
U la ong “Kumta ngi sngewthuh ba ngi dei ban pynwandur thymmai biang ia ka pule puthi. Haba ngi peit ha ka lain pule ngi iohi ia ka jing hiar jong ka pule puthi, ha higher secondary, ha kaba ki don tang 54 hajar ngut ki khynnah pule kiba dang pule ha secondary skul ki don tang 1lak ki khynnah kiba pule haba phi peit ia ka jingdon ki khynnah ki ba naduh ka snem 15 haduh 19 ki ba dang dei ban pule ki don tang 4 lak, hynrei don tang 1lak ki khynnah ki ba pule.”

Na ka liang u myntri rangbah u la kyntu ia ki nong hikai ba kin pyndep ia la ka jong ka kam ram bad u la kular ruh ba un sa shimkhia ia ka jing eh jong ki bad pynlong ia ka jingialang ha u bnai Nohprah ban iamir jingmut ia ki jingeh jong ki.

Shillong: “Lada phi kyrshan ia ka Pakistan, to khie leit sha Pakistan” la ong u union Minister jong ka sorkar pdeng ba dei peit ia ka Ministry Social Justice and Empowerment u Ramdas Bandu Athawale, haba kren ha ka jingialang jong ki nonghikai skul Adhock ha Madan Malki.

U Ramdas myntri ka sorkar pdeng, u la kren ia kitei ki ktien haba u pynshai halor ka jingpynduh noh ia ka Article 370 na ka jylla Jammu bad Kashmir da kane ka sorkar NDA hapoh ka jingialam jong u Narendra Modi.

“Bun ki briew ki la pyrshah ia kane ka jingweng noh jong ka sorkar ia ka Article 370 na katei ka jylla, hynrei ki trai shnong Jammu bad Kashmir ki pdiang ia kane ka jingleh jong ka sorkar namar ki kwah ia ki kam pynroi.”u la ong.

Ka jing weng ia ka Article 370 ha ka 5 u Nailar 2019 ha Jammu bad Kashmir ka la shong suk bad kam don jingkulmar shuh, namar ki lehnoh kiba wan dei na Pakistan, mynta lada u lehnoh u mih un nym leit phai shuh.

“Ngam kyrshan ia u Rahul Gandhi, hynrei ka party Republican Party of India (RPI) bad ka NPP ki kyrshan ia kane ka sorkar NDA ba la ialam da u Narendra Modi, kane ka sorkar jong u Modi ka ai ka jingkyrshan ia baroh, ki Hindu, Muslim, Khristan, ki Jain bad baroh ki jaitniam” u la ong.

Ha kane ka sngi ki nongtrei ka EMRI, ki nongtrei Midday meal bad ki nonghikai ki la ai dorkhas ha u mynta ka sngi bad myntri, ula ong ba un sa ia kren bad u myntri ba dei peit ia ka Ministry Human Resource Development bad un sa thoh sha u Myntri rangbah duh jong ka Ri India ryngkat ka jingiatrei lang bad u myntri rangbah ka sorkar jylla Meghalaya.

Shillong: Ki heh pulit jong ka Meghalaya, ban ialam da U bah MK Dkhar, IPS Deputy Inspector General of Police (ER), Bah GR Kharwanlang , MPS Special Superintendent of Police (SB I) lem bad lai ngut ki kmie ki kpa, kin leit sha Agartala lashai ka sngi, ban leit wad jingtip, halor ka jinglong jingman jong ka ICFAI University, ha Kamalghat, Tripura.

Shillong: Ka Shillong Lajong FC ka la pynliem ia ka Nongrim Hills da 3-1 kol ha ka jingkahun jong ka lympung Shillong Premiere League kaba long myn hynnin ka sngi ha madan Polo.

Ha kane ka jingiakhun, ar ngut ki nongialehkai ka Nongrim Hills kila shah sei sha madan namar ka jingialehkai khluit khlieh bad kane ka la pyllong syndon ia ka Shillong Lajong FC ban pynliem noh ia ka Nongrim Hills da 3-1.
Ki ar ngut ki nongialehkai jong ka Nongrim Hills SC ba la ioh pdiang beit beit da ka red card na u referee ba la pyniaid ia kane ka jingialehkai ki long u Reymond Sutnga bad u Lennypaul Kurbah, kaba la jia ha ka khyllipmat ba ka la don ka jingiaknieh kaba shyrkhei bha ia ka bol hajan ka kol ka Nongrim Hills, bad ha kum kane ka khep ba ka jingiaknieh ban ioh shut ia ka bol ka poi ruh shaduh u pud ba ka kjat ka kum dei ruh hapdeng para player.
U referee ba la don kham hajan bha jong kane, u la pyrshang ban tem ia kane ka rukom ialehkai bad pyrshang shwa ban pyndonkam ia ka iktiar ba la pynkup ha u ban shu ai jingmaham shwa ia ki player, phewse, mih pynban ka jingleh khluit bad ruh ban sdang wat ban khynnait ne ban khanglad syndon da ka kti ia u referee bad pynlong ia u ban leh ia kaba donkam bad katta ka long ban beh beit noh shabar ia ki Reymond bad Lennypaul ka Nongrim Hills shabar ka madan iakhun.
Ha ka jingshisha, ka jingialehkai ka long ba sa shisien ka Nongrim Hills SC hapoh ka jingialam u Playerson Syiemlieh, ka la ialehkai bha tad haduh ba kan da lah wat ba kan lam shwa shakhmat ba kan tam das hi kol ba la thep lyngba da u Alem Khongwir ha ka minit 31.
U Alem u la ioh ba un thep ia kane ka kol hadien ba u la ioh ba un tehlakam ia ka bol kaba don shabar na ka kol ka Lajong bad pynshong bha iaka naka bynta ban khyrwit jam bha ia ka bol tad haduh ba kan pynkhih hi ir ia ka jar.
Ka jingioh lad ka Nongrim Hills ba kan thep ia kane ka kol, ka dei tang namar ba ka kynhun ialehkai ka Shillong Lajong FC sa shisien kim pat I long kum ka kynhun kaba la pynkhreh ban iakhun ha kane ka lympung.
Haba wan ban bteng ia ka kylla miet, ka Shillong Lajong FC ka la ioh ia ka kabu ban pynphai noh ia kane ka shi kol kaba la wan lyngba ka corner bad u Kenstar Kharshong.

Mar shi kol la iakhaid bad ka jingiakhun ka la sdang itynnad, pynban ha ka minit ba ka jingialehkai ka dang itynnad bha, mih pynban ka jingleh khluid bad shongshit da ki player ka Nongrim Hills bad ka jinghap ban iakhun noh satang 9 ngut ki player ha madan, ka la buh ia ka thongbah ia ka kynjhun ban lah ban jop ia kane ka jingiakhun.
Pynban na ka liang ka SLFC ka bok kat u prah ka la wan ba kan mih paw ha kane ka kynhun namar ba ia ki artylli ki kol kiba ka la ioh ba kan thep hadien ki la wan lyngba ka penalty, ha kaba ka penalty ba nyngkong ha ka minit ba 67 la shut ia ka da u Naorem Mahesh Singh bad ka penalty kaba ar ha ka m9init ba 82 la shut ia ka a u Phrangki Buam bad pynlong ia ka kynhun ban jop syndon ia kane ka jingiakhun.
Lashai ka sngi, ka jinngialehkai kan long hapdeng ka Langsning FC pyrshah ia ka Nangkiew Irat SC ban long ha ka por 3:30 baje nohphai sngi.

Shillong: Ka St Anthony College ka la rah ia ka nam lahduh ka NEHU Inter College Football (Men) Tournament 2019 hadien ba ka la pylliem ia ka BBS college da ka bol shut 3-1 kol hadien ba ka jingiakhun ha madan ka la iakhaid 1-1.

Ka jingialehkai phainal la pynlong ha madan JN Stadium, Shillong.
Ha kane ka sngi kut, u Dr. Jemino Mawthoh uba hikai ha NEHU bad uba long ruh u General secretary ka UDP, u la wan kum u kongsan bad sam ia khusnam sha ka lahduh. La sakhi lang u Dean of Student’s Welfare, NEHU u Prof. S. Umdor, Assistant Director ka Sports, u N. Das, Principal ka BBS College bad u President, Meghalaya Football Players Association bah C. Nongrum.

Nongpoh: Ki nongialam ka HNYF, Northern Region, myn hynnin ka sngi ki la leit ban iakynduh ia u Dr. M Mawrie, DM&HO ka Ri Bhoi bad ruh ia ka Grace Mihsil, Medical Superintendent ka Nongpoh Civil Hospital, kata hadien ba ki la ioh ia ka jingujor na ki katto katne ngut ki samla ki bym donkam donjam, kiba la kynnoh ba ka don ka jingthung kam sopsop da ka sorkar jylla hapoh ka Trauma Centre, kaba don ha Nongpoh.

Ha kaba leit ban kynduh ia utei u DM&HO bad MS ka NCH, la ialam da u Bah Marcus Marten, President ka HNYF, NR, u Bah Donroy Khsiar, Asst. Secretary lem bad kiwei ki dkhot ka seng.
Ha katei ka jingleit kynduh DM&HO, kitei ki nongialam ka HNYF, ki la kylli halor kano ka nongrim ba la shu thung kam ia ki katto katne tylli ki post ba lait jong ka Trauma Centre khlem ka jingpyntip paidbah lane ka jingbym iaid lyngba ka District Selection Committee, hynrei haba jubab halor katei ka jingkylli da ki nongialam ka HNYF, u DMHO bad ka MS ki la pyntip pat ba ia kitei ki post la shu thep kum ki officiating ia kaba la leh hi na ka sorkar jylla lyngba ka Directorate of Health Service lane ka DHS.
Haba iadei bad katei ka jingkynnoh thungkam sop sop ha katei ka Trauma Centre, u Bah Marcus Marten, u la ong ba ka sorkar jylla ka dei ban phaikhmat kyrpang sha ki samla jong ka them Ri Bhoi, kiba shu shong khlem kam khlem jam watla ki long kiba deihok ban iohkam katkum ki kyrdan pule ka jong ki.
U la ong ruh, ba ka jingbym ki khun samla ka them Ri Bhoi, ka la buh jingeh shikatdei ia ki samla khamtam na ka jingiaid ka por bad ka rta ka jong ki, ym tang katta ka jingbym iohkam iohjam ka la ialam bakla pynban ruh ia ki samla ban shim da ki lynti ki bym dei ha kaba ki ju ngop ha ki jingdih kiba sniew bad kiwei kiwei ki kam awria.
Namarkata, haba iadei bad katei ka jingkynoh kaba la mih, na ka liang ka seng ka kyntu ruh ia ka sorkar ba kam dei ban shu thungkam sopsop lyngba ka jingialam bakla da ki nongmihkhmat kum u MLA lane kita ki politician, u la bynrap.

Nongpoh: Ki nongrep Sla Tyrpad na ka shnong Shangbangla ha Ri Bhoi, ki la iakynduh ia ka jingeh kaba khraw, kata ka long hadien ba kitei ki Sla Tyrpad, kaba ki la sumar bha ki la shah hiar thma ki khniang khyllah bad kiba la bam tang ia kitei ki Sla Tyrpad.

Haba iadei bad katei ka jingjia, na ka liang ka Farmer Social Development Society Shangbangla ha ka jingialam da u president u Bah Baisroy Lyngdoh Mawnai, ha ka jingiadonlang u Bah Elfrinstar Umlong, Secretary Shnong Shangbangla, u Bah Bison Nongshli u ba dei u wei na ki nongrep uba la shah ktah ha katei ka jinghiar thma ha kitei ki khniang, ki la leit jurip ia ki katto katne tylli ki jaka rep kiba la shah ktah.
Ha katei ka jingleit jurip, kitei ki nongialam katei ka Synjuk lem bad ki Nongrep, ki la lap ba kitei ki khniang khyllah, ki long kum ki kynja thapbalieh, ha kaba ki wan ban dem ha ki dieng Sla Tyrpad bad ki kha pylleng, hadien ba kine ki pylleng ki san bad kylla nianglong ki sa sdang pat ban sa bam pynjulor lut ia ki sla tyrpad bad haduh ba kin da san bha bad kylla thapbalieh kin sa her pat sha kiwei kiwei ki jaka.
La iathuh ruh ba halor kaba kum katei ka jingjia, kitei ki nongrep, ki la mad mynta la 2 snem kynthih, hynrei ha kaba nyngkong, kim shem la pyntip shano shano ruh, hynrei ha kane ka kynti kaba mynta kim banse shuh ban pynpaw pyrthei, kata hadien ba ki la syllang palat na katei ka jingshah pynjulor ia kitei ki Sla Tyrpad, kiba la shah pynjulor lut ha kitei ki khniang khyllah.
Haba iadei bad katei ka jingshah pynjulor, na ka liang katei ka synjuk, ka la kyrpad ia ki bor ka sorkar jylla ba kan phah jurip ia kine ki khniang bad ruh ban pynioh ruh ia ki lad jingiarap kum ka bailutksan sha kito ki nongrep kiba la shah ktah ha kane ka jinghiar thma ki khniang khyllah.

Nongstoiñ: Ha ka miet jong ka 27 tarik mynta u bnai ha ka por kumba 11:00 PM ki Pulit ka Special Cell Nongstoiñ hadien ba ki la ioh ia ka jingtip kaba tikna ki la ioh ban bat noh ia ar ngut ki snar nongkhaii drok na kawei na ki jaka kaba don ha jan Wahriat.

Katkum ka tyllong khubor ba la ioh lum, la ong ba ia kitei ki ar ngut la ioh ban bat hadien ba ki briew shnong ha Mawbyrshem ki la suba jur ba ki lah ban dei ki nongkhaii drok bad kumta ki la pyntip noh sha ki pulit.
Hadien ba ki pulit ki la ioh ia ka jingpyntip halor katei ka jingjia ka kynhun pulit bala ialam da u bah H.K Kharkongor MPS SDPO Mairang ha ryngkat u bah T.S Mawdoh bad ki nongtrei ka Special Cell, ki la hiar sha katei ka jaka ha ryngkat ki nongsakhi laitluid ban lap ia ki jingshisha.
Shuh shuh ki pulit ka Special Cell hadien ba ki la leh ia ki kyndon katkum ka NDPS Act bad haba ki la pynlong ia ka jingtalasi ia u wei na kitei ki ar ngut kata ia u bala tip kyrteng ruh kum u Waltarsius Kharbani, ki la ioh ruh ban kurup ia u drok ba la suba Heroin na ka met jong u ha ka jingkhia kaba 0.43 gram.
Ym tang kata la ong ruh ba u tei u Waltarsius Kharbani, u la phla ruh ba dang don sa u wei u briew u bala tip kyrteng kum u Marshall Marwein u bana ka shnong Mairang Lumsohkhlur bad u ba shong ba sah shipor ha Mawbyrshem ba u lah ban don ia u drok Heroin ha iing sah jong u.
Ki pulit ha ryngkat ki nongsakhi laitluid ki la leit ruh ban khynra ha katei ka iing sah jong u tei u Marshall Marwein ha kaba ki la lap ruh ia u drok ba suba Heroin u bala khia haduh 0.27 gram bad kitei bnaroh ar ngut ki nongkhaii drok kila phla ruh ba u Londor Lyngdoh Mawlong u la ai jaka ia ki hapoh ka jaka sah ka jong u da ka jingiatip lang ban ia buhrieh ia u droks na ka bynta ban khaii.

Shillong: U Shri M. Ahmed, Superintending Engineer, MTDC Ltd., ula ujor sha ki bor pulit ba naduh ka 30tarik Jylliew 2019 bad haduh ha kine ki sngi, ki don ki para nongtrei jongu, kiba kynnoh ba u donkti ban pyniap ia ka kong Iohbianghun Sahkhar, lyngba ki jingthoh bapher, kiba ki la buh ha ki social media.

Ula ong shuh shuh, ba kitei ki thmu ruh ban pynngat ia u, ba u dei uba donkti ruh ha ki kam khaii kynthei.

Shillong: Hadien ba ki paidbah nongkhaiï ba die lilam ia u dewiong, ki la pynpaw ia ka jingeh kaba khraw halor ka jingrem dor palat ka shalan ban khaii ia u dewiong ba ka sorkar ka die lilam; kumta ki nongialam jong ki lai tylli ki seng kiba peit ia ka khia ka shon bad ka jingeh jong u paidbah kiba kynthup ia u Sambormi Lyngdoh President EJNC, Ency Shadap President HANM East Jaiñtia, u samla P.S. Phawa GS JSM, ki la leit sha ophis u District Mining Officer (DMO) jong ka Directorate of Minerals Resources (DMR), West Jaiñtia Hills District, Jowai, ban wad jingtip halor u dewiong die lilam la u dei ia u dewiong ba la iohkem ne ia u dewiong ba la dep lum thup ne uba la deptih kumjuh ruh halor ka jingkiew dor palat jong ka shalan, hynrei ha katei ka sngi, 26.08.2019, u ophisar jong katei ka ophis um don ha ophis trei kam.

Kumta na ka liang ki lai seng ki la ioh ban ia kren bad ki nongtrei katei ka tnat ha kaba na ka liang jong ki la ong ba ki shu ap ia ka hukum jong ki bor ba nalor kum na u myntri rangbah, ne ki bor sorkar ban leh ia kaei kaba ki phah, katba ha ka jingiadei bad ka dor jong ka Chalan na ka liang ka ophis ki la ong ba katkum ka ka dor ka long 1160 (Khadwei spah hynriewphew) tyngka shi ton, katba ia kiwei de ki jingdonkam lah ban ioh na u DC EJH ki la ong.
Na ka liang u samla S. Lyngdoh, u la ong haba ka dor ka long 1160 tyngka kaba mut kan poi haduh 23 hajar tyngka na ka bynta 9 ton u dewiong, hynrei ki nongthied Chalan ki la hap ban thied haduh 70-75 hajar tyngka na ka bynta 9 ton bad shi lak sawphew hajar na ka bynta 19 ton u dewiong, te halor kane ruh na ka liang jong ka ophis kam lah satia ban ai jingshai.
Na ka liang ka seng ha ka jingiadei bad kane kan sa leit ban ia kynduh ia u Deputy Commissioner ka East Jaiñtia Hills District, ha kajuh ka por ka pynrem jur ia une u ophisar kane ka tnat halor ka jingbym wan trei jong u, kumjuh ruh ia ki nongtrei jong kane ka ophis ba kim lah ban iathuh ia ka kyrdan ba ki trei haba ki nongialam seng ki kylli na ki.

Shillong: U Executive Member jong ka KHADC u Bah Titosstarwell Chyne mynta ka sngi u la leit ban ia kynduh ia u myntri ba dei peit ia ka khyndew ka shyiap jong ka sorkar jylla u bah Kyrmen Shylla halor ki kam khyndew.

Haba kren ha ki lad pathai khubor, ha dien ka jingiakynduh ia u myntri ka sorkar jylla u Bah Titosstarwell u la ong ba kane ka jingiakynduh ka long ban ai jingmut sha ka sorkar halor ka Land Transfer Act, ha ki lai bynta.
Kawei ka long ha ka jingiadei bad ka rukom bad khyndew ha kaba ia dei bad ka Land Tranfer Act, kaba don ka long ba ki bym dei khasi kim lah ban thied jaka, ka District Council ka don ia ka bor tang ban buh jingthoh ia ki jaka hynrei ban ai pateng pat kam lah. Kumba ka paw mynta dei tang ki Deputy Commissioner kiba don ia ka bor.
Ha kane ka jingiakynduh na ka liang jong u EM ba dei peit ia ka khyndew ka shyiap u la kyrpad ban pynthymmai biang ia ka Land Tranfer Act khang ba baroh lai tylli ki District Council ki dei ban don langia ka bor ha kaba ia dei bad kane ka bynta.
Ha kane ka ia kynduh la ong ba dei ban pynthymmai biang ka ka kyntien, Tribal, namar kumba ka long mynta la khang ia bor jylla ban thied jaka hynrei ia ki riewlum palat la shah ban thied jaka, ka jingkwah ka long ba ia ka kyntien riewlumd ei ban long tang u Khasi Garo bad Jaintia.
Kawei pat ka long ha kaba ia dei bad ka jingai jingbit jong ki shnong ia kano kano ka jaka, ka sorkar kala shim, hynrei ban long kaba da ia tip lang ki paidbah ka long ba dei ban don ka jingbishar paidbah khang ban ia tip lang da baroh la ka jaka ban ain kan long katno.
Haba ia dei bad kane na ka liang jong u myntri u la ong ba halor kane ka ynsa khot ia ka jingialang jong ki ophsiar ban ia kren bad ban ia bishar bniah la ong u myntri u u EM jong ka KHADC.

Shillong: Ka surok Maweit, kaba naduh u snem 1962 haduh mynta ym shym don ka jing maramot ba thikna.

Ka HYC Maweit Circle ka pynkynmaw biang ia ka Sorkar Jylla halor ka jingkular u myntri Sorkar Jylla u Bah Prestone Tynsong u myntri ba dei peit ia ka tnad PWD, ha ka jingiakynduh myn ha ka 20tarik Jylliew 2019, ha kaba u la kular ban sdang noh ban thung ia u consultancy bad hadien kata yn sdang noh mardor ia ka DPR ia ka surok arliang kaba na Nongstoin-Maweit-Kulang-Nongjri, hynrei haduh mynta ka jingkular ka dang sah tang ha ka ktien khlem ki kam ong u President ka HYC Maweit Circle u samla Jeremiia Dkhar.
Kum ban pynkyn-maw ba ka HYC Maweit Circle myn ha ka 27tarik iaiong 2019 ka la iaid kjat shah thngan na Maweit shaduh Nongstoin, ban pynpaw sha ka Sorkar Jylla na ka bynta ka jingiehnoh beiñ bad ka jingsahdien ha ki liang baroh, khamtam ia ka jingsniew palat ka surok na Nongstoin-Maweit bad ha ka juh ka por ban dawa ia u surok arliang na Nongstoin-Maweit-Kulang-Nongjri kaba don tang 75km ha kaba ka sorkar ka la kular.
Ka HYC Maweit Circle ka phah ia ka khubor kaba shai sha ka sorkar jylla mynta ka sngi lyngba ka kyrwoh jong ka Seng ba ka sorkar ka dei ban sdang noh mardor ia kaba ka la kular lyngba u myntri, ba dei peit ia ka PWD u Bah Prestone Tynsong myn ha ka 20tarik jylliew 2019 ha ka ophis treikam jong u.

Shillong: Ka seng JSU bad ka seng HANM hapoh ka jingialam u samla Treiborlang R Suchen bad U Bah Lamphrang Kharbani bad lah synran lang ruh da ki nongialam ba ha khmat jong ki ar seng, hynnin ka sngi ha nongbah Shillong ki lah ioh ban kynduh bad u Myntri khynnah jong ka Sorkar India u Ramdas Athawale u ba bat ia ka tnat Social Justice and Empowerment jong ka Sorkar India.

Kine ki ar seng ki ai sha u da ka dorkhas ha kaba ia dei ban pynthymmai ia ka bhah kam, ha kaba ia dei ban bhah kham bun ia ka hok thung kam thung jam bad ki khynnah pule kiba dei ki trai ri trai muluk jong ka jylla Meghalaya kiba kynthup ia ki Khasi,Jaintia bad u Garo ha ki ophis, hospital bad jaka pule kiba hap bad pyniaid da ka Sorkar pdeng ne Government of India.Khamtam ban bhah kham bun ki post nurse bad Doctor ha hospital NEIGHRMS bad NEIAH,jaka pule kum ka NEHU khamatam ia ka post Lecturer bad Professor bad ki kam ophis, NIT ne National Institute of Technology ka ban sa plie thymmai ha Sohra ka jaka pule suh jain phong bad tiar phong ka NIFT ka ban sa plie shen ha New Shillong ne Mawdiangdiang bad khamtam ruh na bynta ka bhah thung kam hapoh ka Meghalaya Rural Bank (MRB) ban thung noh kham bun ki ST ne trai ri trai muluk kiba kynthup ia ki Khasi,Jaintia bad Garo na bynta ka post scale -1 officer bad kiwei kiwei ki post ba kham heh.

U President seng kmie jong ka HANM u lah ban jur ba dei ban dawa ia la ka hok long trai bad u lah ong ka sorkar jylla ka dei ban ia leh ban pynioh ia kane ka jingdawa ban bhah kham bun ia ki trai ri trai muluk bad ban pynthymmai ia ka Reservation policy ha poh ka jylla ha kaba iadei bad ki ophis, hospital bad ki jaka pule jong ka sorkar pdeng bad u lah bynrap shuh shuh da kaba ong wat ki company shimet kiba seng kam hapoh ka jylla ruh kidei ban ai lad ban rung kam da ki samla Khasi,Jaintia bad u Garo.

Nongpoh: Na ka bynta ban tehlakam ia ki Nongkhaii bar jylla, kiba la wan ban kamai jem shapoh ka jylla bad khamtam eh ia kito ki bym shym la pynbiang ia ki kot ki sla kiba donkam, kum ia ki Trading License lem bad kiwei, hynnin ka sngi u Bah Paul Lyngdoh, EM ka Trade hapoh ka KHADC, u la leit ban plie ia kawei pat Trade Branch ha ophis treikam u Syiem ka Raid Marwet kaba don ha Baridua, Ri Bhoi District.

Ha kaba plie ia katei ka Trade Branch, nalor u Bah Paul Lyngdoh, la sakhi ruh da ka jingdonlang kiwei pat ki MDC, kiba kynthup ia u Bah Victor Ranee, u Bah Latiplang Kharkongor, nangta u Paiem Ainam Syiem, Acting Syiem ka Hima Mylliem, Ken Syiem Syiem ka Raid Marwet, u Bah Rayonald Kharkamni, Vice Vhairman ka Meghalaya State Planning Board, ki Basan, ki Lyngdoh lem bad kiwei kiwei.
Haba kren ha katei ka sngi, na ka liang u Syiem ka Hima Mylliem, u Syiem ka Raid Marwet lem bad kiwei kiwei, ki la ai ia ka jingiaroh kaba khraw ia u Bah Paul Lyngdoh, namar ka jingshimkhia ka jong u ban pynurlong ha ka ban buh ia katei ka Trade Branch jong ka District Council ha katei ka jaka, kaba dei ruh ka thain kaba bun bha ki bar jylla, kiba la wan ban leh ia ki kam khaii pateng, hynrei bun na ki pat kim shem la don ia ki kot ki sla kiba biang, kata la ka long na ka District Council, Hima, Raid bad shnong ruh kumjuh.
Na ka liang U Syiem ka Raid Marwet, u la ong ba kum u nongpeit jong ka Raid kaba bun bha ki bar jylla, ha kaba la slem bha ki la ap khmieh lynti ia kaba kum katei ka kabu ban ioh ia ka jingpynkup bor na ka District Council, kaba long ruh kum shibynta ban tehlakam ia ki nongkhaii bar jylla, kiba la wan kamai jem shapoh ka jylla khlem da pynbiang ia ki kot ki sla kiba donkam, khamtam eh halor ki kot na ka District Council.
Halor ka jingurlong jong katei ka Trade Branch, na ka liang ki nongilam jong katei ka Raid, ki la ai ka jingiaroh kaba khraw eh ia ka District Council bad khamtam eh ia u Bah Paul Lyngdoh, EM ka Trade, uba la shimkhia ban pynurlong ban buh ia katei ka Trade Branch ha katei ka jaka.
Ha kaba kut jong katei ka jingialang, u Bah Paul Lyngdoh, u la aiti ia ka kot sha u Ken Syiem, Syiem ka Raid Marwet, kaba dei ruh ka kot kaba ka District Council, ka la pynkup bor ia u Syiem ka Raid Marwet ba un long kum u Khlieh, haba iadei ban peit bad ban iarap ia ka District Council halor ki kam ban ai jingbit ha ki kam khaii pateng sha ki bar jylla.

Shillong: Ka jingai phom (form) ia kiba kwah iakhun ia ka elekshon shiteng samoi ha Shella, na ka Congress kan kut mynta ka sngi.

Haduh mynta, kiba la dep pan tiket ki long u bah Bantyngshain Rynga bad ka kong Grace Mary Kharpuri.
U bah Bantyngshain u dei u president ka Block Congress Shella katba ka Grace Mary Kharpuri ka dei ka MDC ka Nongshken.
Haba pyntip ia kane, u bah Bantyngshain ula iathuh ba haduh mynta ka sngi, dei tang ma u bad ka kong Grace kiba la pan tiket bad kaba sah kan shong ha ka party ban ai ia ka tiket.
Ula iathuh ba ka Block Congress Shella, kan long shen na ka bynta kane ka elekshon kaban sa long shen ha ki bnai ban wan.
Ka elekshon shiteng samoi ha Shella hap ban pyllong hadien ba la khlad kyndit noh u Dr Donkupar Roy dang shen.

Nongpoh: Ka la long ka jingkmen kaba khraw ia ki paidbah nongshong shnong bad ki samla ka shnong Umsawnongbri, ha kaba hynne ka sngi u Bah Mayraldborn Syiem, u la leit ban plie paidbah ia ka Auditorium Hall jong katei ka shnong, kaba la tei lyngba ka skhim kaba la pynmang da u MP ka Shillong Parliamentary Seat u Bah Vincent H Pala ha ka jinglut kaba long 4 lak tyngka jong u snem 2016-2017.

Ha kaba plie paidbah ia katei ka Auditorium Hall, la sakhi da ka jingiadonlang u Bah Balajied Rani, MDC ka Nongpoh, u Bah B.D Mawphniang, Rangbah Shnong ka Umsawnongbri, u Rev. B.R Pamshong, ki ophisar na ka tnat PWD bad PHE lem bad kiwei.
lyngba jong katei ka sngi, u Bah Mayral Born Syiem, u la pynkhamti ruh ia ka work order kaba 4 lak tyngka lyngba ka SRWP skhim, kaba dei ruh na ka bynta ban nang pynheh ia katei ka Auditorium Hall bad ruh la pynmang na ka bynta ka C.E Society jong kane ka shnong kumba 80 hajar tyngka lyngba ka skhim IACDP na ka bynta ban thied ia ki tiar pyndonkam jong ki khun samla.
Nalor kata, u tei u MLA, u la kular ruh ban pynurlong ia ka jingangnud ki paidbah kata halor ka lynti ka synkien kaba paka bad kata ka long hadien ba u la pynbna ba shen yn sa sdang noh ban tei ia u surok naduh na Lailad Marngar shaduh sha Kbet kaba long kumba 14 KM.
Haba kren ha katei ka sngi, u Bah Mayral Born Syiem u la pynpaw ia ka jingkmen kaba khraw ban ia don bynta lang bad ki paidbah nongshong shnong ka Umsawnongbri, kaba dei ruh ka sngi kaba ki paidbah jong katei ka shnong ki kmen bha ba ki la ioh ban plie ia katei ka Auditorium Hall.
U la ong ruh, ba kum u nongmihkhmat ka thain, u la ai ka jingkular ba un trei shitom na ka bynta ka jingmyntoi ki paidbah nongshong shnong ka Nongpoh Constituency.
Khadduh eh, utei u nongmihkhmat ka Nongpoh, u la ai khublei kyrpang ruh ia u Bah Vincent H Pala kum u MP bad ruh ia u Dr. D.D Lapang, Chief Adviser ka sorkar jylla, kiba la phaikhmat bad iarap shisha na bynta ka roi ka par ha ka them Ri Bhoi hi baroh kawei.

New Delhi: Ha ka jingpynshlur ban kyntiew ia ka jingthung dieng bad ban kot sha ki jingthmu jong ka jingjyrngam jong ka ri, u Myntri sorkar pdeng ba dei khmih ia ka tnad Environment, Forest and Climate Change, Prakash Javadekar, myn hynnin ka sngi u la aiti T. 47,436 klur ka CAMPA funds sha ki jylla bapher bapher, ha ka jingiadonlang u Myntri khynnah, MoEF&CC, Babul Supriyo.

Ha ka jingialang jong ki myntri ba dei khmih ia ka tnad Forest jong ka jylla bad ki bor ba dei khmih kaba la long ha New Delhi, u Myntri Environment u la ong, “Ka state budget na ka bynta ki khlaw kan iaineh khlem jingktah bad ka pisa ba la phah kan long nalor ka State Budget bad la khmih lynti ba baroh ki jylla kin pyndonkam ia kane ka pisa na ka bynta ki kam khlaw khnang ban kot sha ki jingthmu jong ki Nationally-Determined Contributions (NDCs) ban kyntiew ia ka jingdon ki khlaw bad ka jingdon ki dieng, ka ban wanrah shuh ka carbon kaba iaryngkat sha ka 2.5 haduh 3 billion tonne ka carbon dioxide hapoh u snem 2030”. U Myntri Environment u la ong shuh shuh ba ym lah ban pyndonkam ia ka CAMPA funds ban siew tulop, bai siew bai leit bai wan, bai sumar bad kiwei kiwei.
U Bah Lahkmen Rymbui, Myntri ba dei khmih ia ka tnad Border Areas Development, ka tnad pule puthi, Forests& Environment, sorkar Meghalaya u la iadonlang ha ka jingialang ha kaba ka Meghalaya ka la iohpdiang T. 163.31 klur.

Shillong: Ka HYC-Jaintia Hills District, ka HNYF-West Jaintia Zone bad ka kynhun Fight Against Corruption Team, ha ka Committee kaba la long myn hynnin ka sngi ki la pynkhreh ban kiew iinglieh iingsaw halor ka kam beain ba la leh da ka Jaintia Hills Autonomous District Council, ha kaba iadei bad ka jingthungkam sop sop iaki 56 ngut ki nongtrei khlem kano kano ka jingpyntip paidbah bad la leh sop sop tang da ki katto katne ngut ki MDC ba rim bad lai ngut ki sahep jong ka Council ki bym kwah ban pynpaw kyrteng.

Shuh shuh na ka liang jong u nongai ktien jong ka HYC-JHD,HNYF-WJZ bad ka FACT u bah Mewat-hi Suchiang ula ong ba kane ka jingiaidlait jong ki briew ka Council ia ka Service Rule 1981, ka long kaei kaei ka bym lah ban pdiang bad ka jingpynslem bad tohkit da ka Administrative Enquiry Committee, ka long tang ka buit barieh jong kitei ki Officer ba don kti ha katei ka kam.

Shillong: Ka Dorbar u Syiem ka Hima Mylliem lyngba ka shithi kaba No.DC.II/Genl/110/2019/14(a) tarik kaba 21st August 2019, Shillong, ka la pynbna iar ia baroh ki nongshong Iew Basa, ki dukan Iew ha Iewduh, ba yn khang noh ban pyndonkam ia ki plastic ha baroh kawei ka iewduh.

Ka Dorbar ka la pynbna ruh ba yn pyntreikam ia kane ka rai naduh ka 1st September 2019 bad naduh katei ka tarik shakhmat yn tip noh ia ka Iewduh kum ka “No Pastic Zone” katkum ka Environment (Protection) Act, 1986 bad ka Plastic Waste Management Rules, 2016. Da kane ka jingpynbna ka Dorbar u Syiem ka Hima Mylliem ka ai hukum ia baroh ki dukan bad ki basa ha Iewduh ba la khang pyrshah ban pyndonkam ia ka Plastic naduh ka 1st September 2019. Hynrei tang ha ka Basa Doh Masi, Dohsniang, Doh Blang, Dohkha bad Doh Syiar la shah ban pyndonkam ia ki plastic kiba ym duna ia ka 50 Micron tad ynda un ai hukum da kumwei pat. Ka Dorbar u Syiem kan peit pyrman bha ha kaba iadei bad kane ka jingpynaid thymmai bad lada lap ia kino kino kiba leh pyrshah un pynshitom katkum ka ain jong ka Environment (Protection) Act, 1986.

Shillong: Ka Executive Committee ka Shnong Nohwet kan pynlong ia ka Dorbar Kut Snem ha ka 31tarik Nailar 2019 por 9.30 ei ei mynstep bad kan kut ha shwa ka por 3 baje ei ei janmiet ha ing dorbar Shnong Nohwet. U Rangbahshnong u khot bad kyrpad ban ia poi biang por katba lah.