Shillong: Ka seng JSU seng kmie hapoh ka jingialam u President ka seng kmie u Lawyerson War bad u President Shillong Circle u samla Treiborlang R Suchen nad ki dkhot ka seng,mynta ka sngi ki lah leit kynduh ia ka HR jong ka GVK, ka kong Amanda Warjri bad ia kiwei pat ki heh ka GVK. Ka seng hadien ba lah dep ban aipor shitaiew ia ka kompany GVK ban pynphai noh ia ka tulop jong ki nongtrei kiba lah shah khate ha ka por ba ki nongtrei hapoh ka lama MEMRIWU ki dang khot ia ka jing iakhih, kaba neh kumba 3 sngi ei ei .

Ka seng JSU hadien ba lah ioh ban iakren bad ka HR bad ki heh jong ka GVK ki lah pdiang ia ka jingdawa ka seng ba kin pynphai beit noh ia ka tulop ba lah ot bad khate ha ka por ba iakhih ki nongtrei 108 bad ka seng ka lah ai por thik ha duh 20 tarik jong une u bnai ban pynphai lut sha baroh kiba lah sha khate ha ka por strike jong ka synjuk MEMRIWU ban pynsgew ia ka jingeh jong ki sha ka sorkar.

U President Lawyerson War u lah ong ba ka seng ka dawa na ka GVK dei ban pynphai lut ia ki tulop kiba sah sha baroh ki nongtrei shuwa ka GVK kan mih noh nangne na jylla bad u lah pynsngew ruh ba ka GVK ka sdang ban leh bha ia ki nongtrei mynta ynda ki nongtrei ki lah ia khih kane kaba mut ba ka GVK ka shim kabu ia jinglong lui lui ki nongtrei 108.

Na ka liang u President Shillong Circle u Treiborlang R Suchen u lah ong ba ka HR ka lah pynpaw shai ba ka GVK ka ap sa tang ka order, na ka sorkar jylla ban mih noh nangne ka jylla, hynrei u samla Suchen u lah ong wat lada ka GVK kan mih noh na ka jylla kum ka seng kim kwah pat da kiwei pat ki agency kiba na bar ba kin wan shane ban pyniaid ia ka EMRI 108, hynrei u ong ba kum seng kaba peit ia ka jingeh u paidbah kam kwah ia ka sorkar ban tyrwa lilam sha ki kompany ia ka tnat kiba ia dei bad ki kam ka koit ka khiah (Health Department)bad ka kam pule puthi (Education Department) hapoh ka jylla bad ka seng ka dawa na u myntri ka tnat ka koit ka khiah U Bah A.L.Hek ba u dei ban pyneh ia ka EMRI 108 bad dei ban pyniaid hi noh da ka sorkar bad ka sorkar ka dei ban pynbiang ia ka jingdonkam jong kane ka service bad ka sorkar ka dei ban pyntikna ban pynbiang ia ka rukom bei tyngka ia kane service ban lait na ka jingdkoh treikam jong kane ka EMRI 108 service.

Shillong: Ka We For Shillong bad ka New Age Welfare Society Jail road, ka la pynlong ia ka jing pynkhuid shnong, ha ki jaka jong ka Jail Road ha ka 10 Nailar 2019.

Ha kane ka jingpynkhuid ki la wan shim bynta da ki nong shong shnong ki nong shong dukan jong ka Jail road.

New Delhi: Ka Sonia Gandhi, ka la shimti biang hynnin ka sngi, ban ialam shipor ia ka seng Congress bad katei ka dei hadien, ba ka la ialam kham mynshwa, na ka bynta 19snem kynthih ia katei ka seng sain pyrthei.

Kham mynshwa, ka Sonia, ka la aiti na ka bynta 20 bnai, ia U Rahul Gandhi, u khun phrang sngi jongka, ba un ialam ia ka seng Congress, hynrei haba U Rahul, ula kyntait ban dang iai bteng ia katei ka kam, ka Sonia, kaba 72snem ka rta, ka shim biang ia katei ka kam, ha ka jing iakynduh jong ka Congress Working Committee (CWC), kaba long hynnin ka sngi.

Da U Ma Nangai Sutnga,
Iooksi WJH

Kane ka dei ka jingkylli kaba nga kwah ban buh sha ki para ri baroh ban ia jubab hi ia ha la ka jong ka jong ka jingshem bad hala ka jong ka jong ka jingsngew. Tharai la jan baroh ngi lah iohi hi ba kumno ka jaitbynriew ka long mynta, bad mano ban long trai, mano ba synshar, mano ba pyniaid , bad mano ba bat ia u shabuk jong ka khaii ka pateng.

La jan baroh ngi la sngewthuh hi iaka jingmut jong ka kyntien “Long trai” , kumta ym donkam ban batai shai ne batai bniah iaphi iaka jingmut katei ka kyntien.
Haba ngi phai sha ka jinglong trai jong ngi iaka khyndew ka shyiap, hooid ymlah ban len dei ka jingdon ka Land Transfer Act laba pynkupbor iangi ban dang ioh ban long trai halade ia la ka khyndew ka shyiap ka jong ngi. Hynrei watla katta ruh mynta ngi la iohi bun ki jaka jong ngi lah thied da ki Company bad ki Bar jylla haka kyrteng ki trai muluk. Kane ka buh ka jingma kaba khraw iaka Jaitbynriew jong ngi.
Ban kam ba ngi dang lah ban long trai Ha la ka Ri lajong nga sngew ban ong ba ngi lah bakla, namar mynta sah satang ha kyrpong iing lajong hi ba ngi dang lah ban kam ba ngi dang long trai hynrei kiwei kiwei ki kam lah long trai da u bar jylla suda .
Lada ngi phai sha ka KHAII KA PATENG, ngi iohi ba lah knieh lut u Mynder shi sngi. U mynder u shong haki Iing paki Dulan, katba ki Khasi pat haki Madan bad ki jaka iaid kjat (footpath).
Iaki mar rep kiba wankit sha Iewduh bad sha kiwei kiwei ki iew na kylleng ki shnong, dei u dkhar Marwari ba buh dor iaki nongrep jong ngi, u khniot katba u mon, bad ka dor katba u sngewbit u shim. Ki nongrep bapli jong ngi ki shu hun katba buh dor u Marwari khaii jhur namar ba lada ym ai ruh , u jhur u shu pyut ei. Kiwei ki jaitbynriew kiba wan shangkai shapoh ka Jylla jong ngi ki la ong ba pleng kata ka Ri Khasi ki nongshong shnong ki dei ki Dkhar suda namar lada sah Hotel ruh la pyniaid da u dkhar, leit thied jingthied ha ki dukan ruh la die da u dkhar, ymlap dukan Khasi shuh khamtam ha Khyndai Lad.
Haba phai pat, sha ka KAM SORKAR, ngi iohi ba lah bat lut u Mynder, la haki kam pulit, kam ophis khamtam haki Bank ngi la iohi ba dap da u dkhar suda. Ki post ba heh ba heh lah bat lut u Dkhar u Lyngkien , na kata ka daw u dkhar hi u ailad tang ia u para dkhar hi ban trei haka ophis jong ki. Dang hakine ko khyndiat sngi ng dang shu dep iohi haki kotkhubor ba ka KHNAM ka dang pyrshah iaka jingpynbna khot thep kam ka NEIGRIMS, hakaba na ki 264 tylli ki post la ai bhah tang 17 tylli iaki ST. Kane ka jingleh ka NEIGRIMS ka pynduh lad iaki samla Khasi ban ioh kam hakatei ka Hospital bah.
Haki FACTORY CEMENT COMPANY ruh la iohi ba naka 100% kiba trei hapoh Company, ki jong ngi ki don tang hapoh 10% kata ruh kam barit baria suda. Man ka sngi ki wan tuid ki Mynder na kylleng ki jylla ban wan wad kam sha ki Cement Company, katba ki jong ngi pat katba apply ruh kim juh ioh shu kut ha kaba phah ap por beit. Kaba sngewphylla ka long ba dei kito ki Local Director kiba long ki dalal ki Company hi kiba ym ailad iaki para Khasi ban trei haki Company.
U PUD U SAM, la iohi ba ngi dang shah knieh shah knieh katba dang iaid ki por. Lah lut ki khappud pynthor na border Bangladesh, mynta shah knieh na border Assam. Dang hakine ki bnai ngi la iohi ba ki heh ka Karbi Anglong kila wan kam pud shaduh ka Wah Myntang. Ynnai ong sha kiwei kiwei pat ki jaka lei , kum ha Block 1, Langpih bad kumta ter ter. Ymslem shuh ba ka Ri Khasi Jong ngi kan sah satang ka shynrong suda. Wat ia u dohnud (Sor Shillong) bah jong ka Ri Khasi jong ngi ruh , ki mynder ki lah long trai lut, peit shaka Them Metor, ngi la iohi ba ki khar Punjab ki leh meng shisha bad kila nud shisha ban pyni bor wat iaka Sorkar jylla bad ruh iaki paid ka bri u Hynniewtrep. Ngi la iohi ba da u Khar Sikh u ba na Jylla Punjab uba la wan ban tuklar iaka Jylla jong ngi .Ban ia kren lei ia ki kita ki ktem shipai, ka pynduh jingkyrmen shisha wat ia ngi kiba dang ieng rangbah ban iada ia ka jaitbynriew namar kumba ngi la sakhi dalade ba haki Ktem shipai I kumba khambun pyrton ki shipai bad ki bahaiing bahasem jong ki ban ia ki Khasi basah ha Shillong. Ka jaka shipai naduh Happy Valley, Laitkor, Shillong Peak, Upper shillong, Laitumkhrah, Polo, Mawroh, Mawiong, Umroi (Bhoi Rymbong), Bishapur, terter ym lah jer kyrteng la tap da ki bar jylla shisha, ka lad ka dei tang lada ka sorkar jylla ka lah ban shimti noh ia kine ki jaka shalade ka jaitbynriew ka dang don jingkyrmen. Lada ngi phai sha ki thaiñ South West Khasi hill naduh Mawsynram, Ranikor, Balat wat shaduh kyndong badon u Uranium ngi iohi kum ban kamtrai lut ki jaitbynriew Garo. Ban ia kren ia ka Ribhoi kam don jingmut shuh shaduh kyndong kynshrot ka jaka ba don ka shnong Zero point, kyrdem kulai la iohi kumba ladei ka Langpih, ka Byrni ruh la Kamtrai ka Assam haduh shilliang ka wah bad ngi iohi shuh shuh ruh ba u myntri barim ka Sorkar Assam u Tarun Gogoi u lawan thaw iing shongkai pyngngad haduh ka jaka Khasi jong ngi.
Ha ka SHONGKHA SHONGMAN ruh la iohi ba la roi ka shongkha khleh, bun satang ki khun shipiah suda, kine ki khun shipiah ki shim lut thik ia ka dur ka dar ka jingim jinglong na u kpa jong ki bad kaba sngewsih shisha ruh ba ma ngi ki snam KHASI PAKA ngi shah pyniaid kylla ha kine, teng teng ngi ju iohi ba haba don ka jing iakhih mynder bunsien dei kine ki khun shipiah badon ha u lakam shynshar ki ju dung kylla nadien jong ngi. Kane ka dei dawbah ba kum ka jaitbynriew kam lah shuh ban khie khlieh lada ym lah ban weng namar lada iakren ia kiwei ki phang ruh ka ialam beit sha kane ka bynta hi. Ban shu bsut ia ka jingkren u wei u rangbah da kaba u Ong “Sngew ban btei ki kynroh namar ka jing kyang ILP ki samla khasi, Bapli ki mih ha surok ban pyrshah mynder, phewse u mynder ba shyllak u ioh rung syndon ha dpei”. Wat la katta ngim lah ban ia shim iathew eh ia kaba ladep hynrei lada ngi kum ka jaitbynriew ngi don shisha ka jingkitkhlieh ngi hap ban shimkhia kaba nangne sha khmat.
Ka jingkam ba ngi long trai iala ka Ri lajong ka shu long khlem nongrim namar wat iaki thied snam jong ka Ri jong ngi la ioh kjit da u Mynder Ri.
Haba kumta ngi dang lah mo ban ong ba ngi dang long trai hala ka jong ka Ri, katba iaki kam ki jam, ka khih ka kamai bad khamtam ki Kur ki jait jong ngi baroh la kamtrai lut lut da u Mynder ri?

Shillong: U Mukul Sangma, nongialam liang pyrshah, ula kyntait ia ka jingmih khubor, ba un pyniasoh ialade sha ka seng BJP.

Ka kotkhubor The Shillong Times, kaba mih mynta ka sngi, ka iathuh ba U Sangma, ula ong ba wat ha ka por ba U PA Sangma, ula mih noh ialade na ka seng Congress, hynrei, um shym la mih satia ha katei ka por. “Ka dei ka khubor thok bad nga la bthah ia ki pulit cyber crime, ba kin wad ia kane ka jingtip, namar ba ka dei ka jingthmu ban pynjah burom suda” ong U Sangma ha ka tweet jongu hynnin ka sngi.

Ha kawei pat ka khubor, U Ma Vincent Pala, MP, ula thoh hynnin ka sngi, ha ka peij facebook jongu, ha kaba u ong “Ngi la ia kynduh mynta ka sngi bad ka jingbna khubor ban don ba pyniasoh BJP, ka long kaba bakla (We are all had a fruitful meeting today and the news spreading our NE leaders joining BJP is wrong”.

Shillong: Uwei u khar Rajasthan, ula ngam jyllop mynta ka sngi, ha Wah Umngot, ong ka khubor.

La iathuh ba utei u briew, uba kyrteng U Pramod Sharma (32), ula noh sha um ban jngi, ha ka jaka, kaba don haneng ka jaka pyniaid lieng ha katei ka Wah bad mar kumta hi, ula ngam jyllop syndon shapoh Um.

Ki bor pulit lem bad ki pulit NDRF, ki dang wad ia katei ka met jong utei uba ngam jyllop, ong ka khubor.

Chandigarah: Ka Sneha Lata, ka kurim jong U Om Prakash Chautala, myntri rangbah barim ka Haryana, ka la im biang, hadien ba la pynbna ba ka la iap mynta ka sngi, ong ka khubor jong ka The Tribune.

Ka Sneh Lata, ka shah sumar ha Medanta Hospital ha Gurugram. La iathuh ba wat la ki doktor, ki la pynim biang ia ka, hynrei ka dang don hi mynta, ha ka jingpang kaba jur bha bad ka dang don ha ka jingshah sumar ha ICU.

U Abhay Singh Chautala, nongialam liang pyrshah ka Haryana, u iathuh ha ka The Tribune, ba u don ha ka jingialang paibah, ha Charkhi Dadri, ha kaba la iathuh shaphang ka jingkhlad noh jongka kmie jongu bad mar kumta, ula bthah ia u paidlang, ba don ha katei ka jingialang, ba kin ia sngap jar, na ka bynta ar minit bad mar kumta, ula leit phai noh ialade ruh sha Gurugram.
“Nga la pynpep noh ia baroh ki jingialang jongnga, nga la pynpep ia baroh ki ban sa pynlong ruh bad nga la leit sha Gurugram. Mynta mynta, nga ioh khubor biang, ba ki doktor, ki la lah ban pynim biang ianga” ula ong.

Mumbai: Ka la don ka jing ia kren wohnia kaba jur bha, halor ka jingshongdor ar tylli ki kait sha ka T.442 ha ka hotel JW Marriott Hotel, ha Chandigarh.

Mynta pat ka la mih sa kawei ka khubor bad kata ka long ba ar tylli ki pylleng, ba la dep shet pynih, ki shongdor T.1,700 ha Four Seasons Hotel, ha Mumbai.

U Kartik Dhar, ula thoh ha ka twitter jongu, da kaba ong “2 eggs for Rs 1700 at the @FourSeasons Mumbai (ar tylli ki pylleng, ki shongdor T.1,700 ha Four Seasons Mumbai). Ym tang katta, la iathuh shuh shuh, ba na bynta ar tylli ki omelette, ka dor ka long hi kumjuh, ong U Dhar, haba pyni ia ki bill, ba la ai ia u.

U Aadhaar card, uba don 12 dak, uba don jingthmu ban pyntrei kam ha baroh kawei ka India, mynta ka sorkar India, ka don jingthmu ban pyntrei kam noh ia ki masi bad ia ki muid ruh kumjuh.

Katei ka dei ka jingthmu jong ka Information Network for Animal Productivity and Health (INAPH), kaba la pynkhreh shakhmat da ka National Dairy Development Board (NDDB).

La iathuh ba utei u number, uba ia syriem hi ia u Aadhaar card, yn buh ha kawei pa kawei ka masi lane ka muid bad katei ka long ban wad jingtip lane ban ioh jingkhein ia ka jingdon jong kitei ki mrad ha ka Ri.

Ha kaba sdang, yn pynioh ia utei u number ia 94 million tylli ki masi kynthei, kiba don ha kylleng ka ri bad hadien kata, yn sa ai ia utei u number ia ki masi shynrang bad ia kiwei de ki mrad, kiba la shu pyllait ba kin iaid lyngkar.

New Delhi: Ka khubor, ba la pynmih mynta ka sngi ha ka The North East Today, ka iathuh ba ka tnat Income Tax jong ka sorkar India, ka la lap ia shibun ki jingdon ki petrol pump benami ha Meghalaya, lane kiba ki kyrteng ki dei ki Khasi bad ia ka kam pat la pyniaid da ki dkhar.

La ong shuh shuh ba nalor kaba pynduh ia shibun ka khajna, kaba ki dei ban siew, la lap ruh ba kito kiba pyniaid petrol pump, ki la pyndonkam bakla ia ki kyndon trei kam khaii, kiba mut na bynta ki trai Jylla bad kitei ki long kum ka kyndon 10(26) jong ka Income Tax Act, 1961.

Ha katei ka jingwad, ka tnat lum khajna, ka lap ia ki kot ki sla bad ki pisa, kiba la buhrieh ha shibun ki jaka bad wat ha ki jaka pyllang um ruh.
Ka kyrwoh na katei ka tnat, ka pynsngew ba kane ka dei ka jing trei kam, kaba la donkam la slem, namar ba ki don ki briew, kiba shim kabu ha ka kyrteng ki trai Jylla bad ki bym siew khajna, da kaba ki pyndonkam da ki trai shong, ban lait ka jingsiew khajna. La iathuh ba katei ka jingwad bniah, ka la bteng mynta la shisnem tam eiei.

Shillong: Opposition leader Dr.Mukul Sangma dismissed reports of him leaving the Congress party and joining the BJP. According to the Shillong Times, Dr.Sangma said,”I did not leave the party even when late P.A. Sangma left the Congress party to form the NCP long ago.” Further he also says that he will report to the Cyber crime cell of the Meghalaya police to investigate and trace the source of this misinformation with defamatory intentions.

In another news we find that Mr.Vincent Pala, the M.P. from Meghalaya, wrote in his Facebook page yesterday which said “We all had a fruitful meeting today and the news spreading our NE leaders joining the BJP is wrong.”

Shillong: A man from Rajasthan called Pramod Sharma (32) was reported to be drowned in Umngot river yesterday.

As reported,the incident happened when Pramod was swimming in the river further away from the boating site. The local police and the NDRF are still in the search for his body,as per our correspondence.

Shillong: U Rangbah Shnong ka Mawlai Iewrynghep, uba long ruh u nongialam ba la rim ka KSU ha ki por ba dang long President u (L) Bull. N. Lyngdoh, mynta lah kumba 30 snem eiei, u Bah Herlambok War, ula kyntu ia ki nongialam ba thymmai ka seng Meghalaya Indigenous People Front (MIPF) ba kin ialam ia ka ri bad ka jaitbynriew shakhmat da ka jingthmu ba sotti ba khlem thohbria, naba haba rung hapoh ka iing thymmai donkam ban nang pynbha shuh shuh (Finishing Touch) bad haba dang sdang hap ban kynduh shibun ki jingeh bad kaba sdang ban jam yn sa iohi kiei kiei ki jingshem kiba long kiba eh.

Ia kitei ki kyntien ula kren hadien ba ula pyntian smai ia ki 5 ngut ki nongkitkam ka CEC ka seng kum u kongsan ha ka prokram ba la pynlong ha Indoor Sport Hall, Mawlai Datbaki ha ka sngi saitjain.
Kitei ki nongkitkam ki kynthup ia u President ba thymmai u Bah Aiborsing Iawphniaw, Vice President Bah Kitboklang Lyngdoh, R.T.I Secretary Bah I.S. Iawphniaw, Assistant Organising Secretary Bah Marshal Wahlang, Organising Secretary Bah Pynshngain Diamai.
“Tang hadien ba la seng ia ka MIPF ha ka 10 tarik u Jymmang 2019, bad tang 3 bnai thik ba lah suit lah shor lah ioh ban pynskhem ia ka EC bapura, kumta ki nongkitkam kin hap ban iakhun tyngeh khlem map ia ki jingeh bad ban jop ia kane don kam ka jingialong kawei, ka jinglong adkar, ban burom markylliang, kumba ka phang bad jingthmu ka seng ka long ban iada ia khyndew ka shyiap, ka long trai ri trai muluk, ka ktien ka thylliej, ka riam ka beit, ka akor burom bad kiwei,” ong u Bah War haba ai mynsiem ia ki nongialam ka MIPF.
Katba u President ka Hynniewtrep United Awakening Movement (HUAM) u Bah Gilbert G. Kharraswai, ula ong ba ka sorkar ka la pulom lut ha ka ban iada ia u pud u sam. “Ngi peit sha ka Raid Marwet mynshwa dang dei jong ki Khasi, mynta pat ka Assam ka kam trai, ki bar jylla kiba don jaka kiba hap ban die tang sha ki Khasi hynrei ki leit thoh kyrteng pynban sha Assam ba ka sa ioh ban kyntur pud sha Meghalaya,” ula ong.
Ula kyntu ruh ba baroh ki dkhot, khamtam ki dkhot ka CEC ba ki donkam ban long Rangbah, ki paia ba skhem, ban ia khun na ka bynta ka ri bad ka jaitbynriew. “Haba long nongialam shiliang ka kjat ka don ha surok shiliang pat ha phatok. 80% hap kynduh ki jingeh bad kum ki nongialam hap long kum ki dieng shain doh, kumta hap long kiba iaishah ban shakri jaitbynriew,” ong u Bah Kharraswai.
Katba u Vice President ba thymmai ka MIPF u Bah Kitboklang Lyngdoh, ula ong ba ka jaitbynriew ka shah ktah ha ki 3 bynta, ha ka synshar khadar, ka khaii ka pateng bad mynta uba ma tam dei u Drok uba ym poi pyrkhat ban poi ha ri Khasi, kumta kum ka seng yn mih shakhmat ban dawa ia ka sorkar ban thaw ki ain ban tehlakam ia une u jingdih ba sniew. “Dang lah 10 ngut ki Sing ban ia 100 tylli ki kada, kumta donkam ka mynsiem ba shynrang,” ong u Bah Lyngdoh.
Ha kawei pat ka bynta, kum u President uba dang shah jied thymmai, hadien ba u President barim u Bah Dari Dunai, ula pynpaw ba ula bun ki kam bad ba long Adviser bad kiwei pat ki seng bad ula ong ban aiti noh shawei ia ka kam President bad da ka jingiasngewthuh jingmut lang, na ka liang u Bah Aiborsing Iawphniaw ulah pdiang ban ialam ia kane ka seng kaba dang shu suit shor thymmai.
Ha ki jingkren kyntu kynpham jong u President ba thymmai, u Bah Aiborsing ula ong, “Lada ngam ieid ia ka jaitbynriew nga sngew ba nga dei u nongleh beain.”
Haba kren da kaba shai ba kum kiei ki mat treikam ba un ialam ia ka seng nangne shakhmat, u Bah Aiborsing ula ong, “Ngam kwah ba ka seng kan shu lap miet tang ha ka shna Receipt Book ban leit dawa pisa, namar dei na kane ba mynta bun ki paidbah ki bein ia ki sengbhalang, naba dei tang na ka bynta ka pisa. Ngim dei ban long ki nongialam ban pynriewspah ia lade, hynrei kane kam mut pat ban klet ia ka kpoh la jong. Ngim dei ban long kum ha ki por jong u David Scot, kumba lah iathuh da mano re mano, ba bret pisa sbai khar noh ki shipai u Tirot Sing. Ban thaw sengbhalang ym dei ban pynriewspah ia lade, ban thied kali, thied jaka bad lada long kumta, nga dei uba nyngkong ban iehnoh kam.”
“Ngin trei hok, ngin kyntu ia ka sorkar ban shna shuh shuh ki ain ban iada ia ngi ki trai ri,” ong u Bah Aiborsing da kaba pynpaw ba ki kam ka seng nangne shakhmat ka long ban rung sha ki shnong ban ai ki jingpynsngewthuh ha kiba bun ki jingdonkam.
Ula ong ba kum ki Khasi dang dei ban pahuh kam, namar u mynder u wan hangne ban kit lut ka spah bad ki kam ki jam. “Ngin hap ia treilang bad ki riewshemphang ban lah pyntyllun ia ka seng ban trei katkum ki kyndon ka ain bad ngim dei ban sngew sarong hynrei ngin pdiang ia ki jingai jingmut ki paidbah,” ula ong.
Ia ka jingialang lah pyniaid da u Secretary Bah Donboklang Khongsit, la ai jingkren da u Political Secretary Bah Steward Malngiang uba lah maitphang ia ki mat treikam ka seng, la kren ruh da u Bah Blosdingwell Wanniang President barim ka KSUSWKHD, na u Health Secretary SSSS Bah Bok Syiem, bad ki jingduwai kyrkhu kyrdoh na u Bah S. Shylla. La iathuh ruh ba lah don kiwei pat ki dkhot ka Hynniewtrep People Front kiba la rung dkhot sha ka MIPF ha kane ka sngi.

Jowai: Ka Star Cement Limited ha kane ka sngi Saitjain ka la thung haduh 10, 200 tynrai ki dieng kiba don haduh 50 jait kiba dei ki dieng trai ri ka ri lum Khasi Jaintia na ka bynta ban pynjyrngam ia ka par mawshun jong ka kaba don ha Lumshnong East Jaintia Hills.

La thung ia kitei ki tynrai dieng ha ka jaka par kaba heh haduh 70 hactre kaba dei ka par mawshun katei ka Company kaba la ai kyrteng kum ka ‘Lumshnong Limestone Mine’
Kane ka jingthung ia kitei ki tynrai dieng ka long na ka bynta ban pynjyrngam bad ban iada ia ka jingtuid ka kyndew bad kumjuh ruh ban pynkhuid ia ka mariang kaba don sawdong katei ka jaka.
Ka rukom thung ia katei ki dieng ka long katkum ka stad Japan kaba la tip kum ka Akira Miyawaki Model of Environmental Forest Plantation.
Bad ia kane ka stad thung la lam khmat da u Dr Shantanu Dutta, uba dei u Additional Director, Central Pollution Control Board, uba dei ruh u dkhot jong ka 3 Committee kaba la thung da ka NGT katkum ka case OA NO 110THC/2012- ha kaba iadei bad ka jingpynbha biang ia ka mariang na ka daw ka jingtih dewiong ha ri lum Garo bad Jaintia Hills.

Shillong: Ki nongrep ‘Niangryngdia’ kiba don ha ka thain Warmawsaw, ki la iakynduh ia ka jingeh kaba khraw haba iadei bad ban pynbiang bam ia ki ‘Niangryndia’ kaba ki ri, namar ki jingthung kaba ki la thung kyrpang tang na ka bynta ban bsa ia ki Niangryndia bad kiba la tip kum ki ‘Sla Khniang’, ki la shah pynjulor lut khait ha ki khniang kynsha bad kiba la wan ban bam lut ia baroh kitei ki ‘Sla Khniang’.

Ia kitei ki Khniang, ki nongrep ki la khot ia ki kum kita ki ‘Niangsaiddho’, ha kaba katkum ka jingiathuh da kitei ki nongrep, la ong ba kitei ki khniang ki bym lah shuh ban niew, ki la hiar ha man la ki jaka rep bad ba don utei u Sla Khniang bad kaba kham jur eh ka dei ia kito ki jaka rep kiba don sha Shiliang ka Wah Khri.
Katkum ka jingiathuh da u Bah Foller Doloi, u riew rangbah jong katei ka thain Warmawsaw, u la ong ba kitei ki nongrep Niangryndia, ki la pyrshang ban pyniap ia kitei ki Khniang da kaba synreit da ki dawai pyniap khniang, hynrei kitei ki khniang kim iap satia bad la iohi pynban ba ki nangkharoi bad nangbun nangbun pynban.
Tang namar ka jingwan kitei ki ‘Niangsaiddho’ ban bam lut ia u Sla Khniang, uba ki la thung khnang ban bsa ia ki Niangryndia, ka la pynlong ia ki nongrep ba kin jynjar ban bsa ia u Niangryndia bad kaba la pynlong ruh ia ki katto katne ngut ki nongrep Khniang ba kin hap bret noh ia u Niangryndia uba ki la ri, iathuh utei u Rangbah.
Shuh shuh, u la iathuh ruh, ba ki la don ki nongrep kiba la iam sngewsih, namar katei jingwan pynjulor da kitei ki khniang ‘Niangsaiddho’, ka la pynlong ia ki ba kin jynjar bad khamtam eh ha kaba kum kine ki por, kaba ki ap ban pyndap ia ki jingdonkam ha iing lyngba kaba die ia utei u Ningryndia sha Iew sha hat.
U la iathuh ba ha ki por kiba mynshwa, ka la don ka por kaba kitei hi ki jait khniang, ki la wan ban pynjot ia utei u Sla Khniang ban aibam ia ki Niangryndia, hynrei mynta la katto katne snem kim shem la wan shuh bad dei tad mynta u snem kaba ki la wan biang ban bam lut khait ia kitei ki jingthung kaba ki nongrep ki la thung khnang na ka bynta ban bsa ia ki Niangryndia.
Lada ka long ha kane ka rukom, la kut artad ka kam rep Niangryndia ha ka thain Warmawsaw, namar kitei ki jingthung kaba la thung khnang ban bsa ia ki Niangryndia, la wan bam lut da kitei ki khniang kynsha, ha kaba ki la don ki nongrep kiba ka ong ba ka dei ka Nemsniew na bynta ki nongrep Niangryndia, namar kitei ki khniang ki bym lah shuh ban niew ki la leit ban hiar ha manla ki jaka ba don kitei ki Sla Khniang bad ban bam lut ia ki.
Namarkata, na ka liang kitei ki nongrep Niangryndia, ki la kyrpad jur ia ki bor ba dei peit ba kin sngewbha ban shimkhia lane ban leit jurip sha kitei ki jaka ba don kitei ki ‘Niangsaiddho’, khnang ban lap ia ki jingshisha baroh bad khamtam eh na ka bynta ban wad ia ki lad ai jingiada na kitei ki ‘Niangsaiddho’, khnang ba ka kam rep Niangryndia kan dang bteng ha katei ka thain.

U Juber Ahmad, U assistant commissioner of Sylhet Metropolitan Police, ula khlad noh hynnin ka sngi, namar ba u hap na tnum iing lajong, katba u dang pynher kot kudi. U Ahmad, u dei uba trei ha ka Detective Branch jong ki pulit ha ka nongbah Sylhet.

La iathuh ba U Ahmed, ula kum bakla ha ka por ba u dang pynher kot kudi bad ka jinghap jongu, ka la pyn mynsaw jur bha, namar ba u hap na ka mala kaba saw jong ka iing sah jongu.

Ki lad khubor, ki iathuh ba U Ranbir Kapoor, ula leit ia kynduh ia U Mahesh Bhatt, uba dei u kpa ka Alia Bhatt, ha kaba ula pan bor na u, ba un shah ba un ia poi kha bad ka Alia, ka khun jong U Mahesh.

La sngewthuh ba ka jing ia poi kha jong kitei, ka lah ban long ha u snem 2020.

Ka Mumbai Mirror, ka kam ba ha katei ka jing iakynduh, ka la don ka jing ia myllung mynsiem kaba khraw shi katdei, ha kaba ka la don ruh ia ka jing ia mih ummat hi brup na baroh arliang, haba ki pynpaw ia ka jing iadei jong ki ar liang mamla, ha ka jing ia poi kha poi man.

Shillong: “Ka rukom buhrieh ia ki drug ha ka bus kamai ka pyni shai ba ki don kti lang ban pynpoi ia u drug sha kane ka Jylla Meghalaya” la ong ka SP ka East khasi Hill ka kong Cloudia Lyngwa mynta ka sngi haba ia kren bad ki nongpathai khubor ha ophis trei kam jong ka.

Kane ka long hadien ba ki pulit ki la ioh ban kurup ia u drug, na kawei ka long kmie kaba kyrteng ka Veineithem Haokip ka ba la 25 snem ka rta kaba dei ka nongshong shnong jong ka Teigang,Manipur bad u khynnah ba dang rit u ba la wan lang bad ka.
Ki pulit ka Anti Narcotic Task Forces (ANTF)hapoh ka jing ia lam u SDPO Sardar Jagpal Sigh Dhanoa u la ong “Ngi la ioh jongtip ia ka jing wan pynpoi ia ki drug sha kane ka Jylla lyngba ki kali kamai ki pulit ki la pynap shrip bha ha Mawryngkneng ha ka por 12 baje, shiteng miet, ki la ioh bat ia kawei ka bus Night super kaba don ia u number kali MN04P 1451, ha kaba la ioh ban kem ia kawei ka longkmie bad u wei u khynnah na kane ka long kmie la ioh kurup haduh 930gram u drug u ba shongdor 4.5klur.Ia kine ki drug la buhrieh bha ha ki jaka buh ki bag jong ka Night Super bus ha kaba da shu peit, yn ym lah ngeit ban don sa kawei ka kamra ba lah burieh bha ia ki 3 tylli ki bag. Ha ki bag don 80 tylli ki synduk sabon. Kane ka jingshna kyrpang ia kane ka kamra ban buh bha ia kine ki drug, ka pynpaw ba u draibar bad u nongbud jong u ruh ki donkti lang ha ka jingkhaii drug sha Meghalaya.”
Haduh mynta ha Meghalaya lah ioh ban kem haduh palat 100 ngut ki nongdih drug kaba wan rah ia ka jing khuslai na ka liang ka SP ka pan ia ka jing ia trei lang jong ki nongshong shnong ban rat dyngkhong ia ka jingsniew.

( M.M.Thaiang,Chief Editor u Yutip)
Jowai: Ka Diocese Jowai kan plie sa kawei ka Parish ha Iongshiwiat ha kane ka 18 tarik mynta u bnai bad ka Parish kaba 18 jong ka Diocese Jowai, ong u Most. Rev Victor Lyngdoh, Bishop ka Diocese Jowai.

Ia kane ka Parish Iongshiwiat la aiti hapoh ka jingpyniaid jong ki Phadar na ka jingiasyllok Society of Divine Word, ha kaba u Phadar Antony Manoj, u Parish uba nyngkong jong kane ka Parish. Ia ka jinglehniam plie ia kane ka Parish bad pynkhamti hapoh ka jingpeit jingkhmih jong ki Phadar Society of Divine Word, yn pyndep ha ka por ka jingknia Mass bakhuid ka ban sdang ha ka por 10 baje mynstep (10.00 AM) ka ban lamkhmat da u Most Rev. Victor Lyngdoh ha ryngkat ka jingsynran ki Lyngdohsohblei (Phadar) ki ban wan na ki Parish bapher bapher jong ka Diocese Jowai bad nabar.
Na ka liang ka Organizing Committee kaba dei pyniaid ia ka kane ka prokram Plie Parish bathymmai ha Iongshiwiat, ka la khot la wer ia ki parakhristan na ki Parish bapher bapher jong ka Diocese Jowai bad ia kiba na ka Archdiocese Shillong ba kin iawan shongshit ban ia sakhilang ia kane ka jingplie ia kane ka Parish Iongshiwiat. Ha ka 1.30 nohphai sngi yn sdang ka jingiaseng nohsngi, ka jingmane Sakrament bad bud sa ka jingleh burom ia ki Lyngdoh ki ban shimti ia kane ka Parish kaba thymmai.
Ka shnong Iongshiwiat ka jngai kumba 30 Kilomiter na Jowai. U surok rong uba bha uba ym don jingwit ia ki Kali rit bad ia ki Kali heh ban iaid ban poi sha Iongshiwiat. Ia ki Kali kiba wan na Arch Diocese Shillong ban poi sha Iongshiwiat, ki hap iaid lyngba ka shnong Ummulong-Wahiajer Nartiang kaba jngai kumba 26 Kilomiter na Ummulong bad ia ki Kali kiba wan na ka Parish Mowkyndeng, Sahsniang, Phramer,Sutnga, Jalaphet, Khliehriat, Lumshnong, Umkiang, Ladlakadong bad Ladrymbai kin iaid na 4 Mer surok Nangbah- Nartiang kaba jngai kumba 30 Kilomiter na 4 Mer sha Iongshiwiat katba ia ki Kali kiba wan na ka Parish Amlarem bad Parish Jowai ki lah ban na u surok Ummulong lane na u surok 4 Mer Nangbah-Nartiang.
Ha ka juh ka por u Most. Rev. Victor Lyngdoh dd, Bishop ka Diocese Jowai ha ka jingpynlait khubor mynta ka sngi ha Jowai, u la kyntu jur ia ki Paid Khristan na ki Parish bapher bapher jong ka Diocese ba kin iawan shongshit bad ban pynkhraw ia kane ka sngi ha kaba ka Diocese ka la lah ban plie sa kawei ka Parish bad ka long ka Parish ka 18 jong ka Diocese Jowai.

New Delhi: Ka Bharat Sanchar Nigam Ltd (BSNL), ka don jingthmu ban sdang mynta sa ka beh ram bad la iathuh ba ka ram, kaba ka dei ban ioh na ki nong pyndonkam telephone bad mobile, ka poi sha ka T.3, 000klur bad ia katei kan beh tyngeh kine ki ar, lai bnai ban sa wan.

Ka jingthmu jong ka BSNL, ban beh ram, ka dei, hadien ba ka ia tyngkhuh ia ka jing kyrduh pisa kaba jur, ha kaba mynta u bnai, ka la ioh siew ia ka tulop ia ki nongtrei jongka, ha ka 5tarik, na ka bynta ka tulop jong U Naitung 2019.
“Ka don ka ram, kaba ngi dei ban ioh kaba palat ia ka T.3,000klur bad ngi dang iai wad hi khia ban ioh biang ia katei ka pisa bad ka don ka lad ba ngin ioh ia katei ka pisa” ong U PK Purmar Chairman ka BSNL.
U Purwar, u iathuh ba ka long kaba eh ban pynthikna, lano ba kin ioh biang ia baroh ka pisa, hynrei, u shim ba ka don ka lad ba kin ioh lum katto katne, ha ki khyndiat bnai ban sa wan.
Ka BSNL, ka don jingthmu ruh ban ai ram ia ki jaka bapher, kiba kam shym pyndonkam, ha kaba la khmih lynti, ba kan lah ban ioh kamai haduh T.1,000klur mynta u snem, na kaei kaba ka ioh T.200klur ha u snem ba ladep.
Ka jingduh nong jong ka BSNL, la shim ba ka poi sha ka T.14,000 klur, ha kaba ka jingioh kamai jongka, ka hiar sha ka T.19,308 klur ha u snem 2018-19. Ka jingduh nong jongka, ka nang kiew na ka T.4,793 klur ha u snem 2016-17 sha ka T.7,993 klur ha u snem 2017-18 bad nangta kaba poi sha ka T.14,202 klur ha u snem 2018-19. Ka jingdon ki nongtrei jong ka BSNL, mynta ka long 1,65,179ngut bad ka jinglut na bynta ki nongtrei ka long 75 percent na ka jingioh kamai jong katei ka kompeni.