Shillong: Ka JSU War Jaintia ka la buh jingujor sha u Teritorrial Officer ka Bharat Petroleum Corporation Limited, namar ka jingsniew palat ka jaka iaid kali sha ka jaka ba theh umphniang ka ba kyrteng ka Public Refill centre.

Kane ka jingleh bym suidniew na ka liang ka BPCL ka lah pynlong ban wanrah jingeh ia ka jingiaid ki kali naduh ki Trok kit mar, ki kali shimet bad ba kamai bad kaba long ka jinglehrain ia kiba wan jngoh kai pyrthei.
Kane ka Petrol pump ka dei tang kawei kaba don naduh na Shkentalang bad ka JSU kumta ka dawa ban shna noh mardor,khnang ban long ka jingsuk ia ki kali.

Nongstoiñ: Ka jingialang ba la khot pynlong da ka Hima Nongstoiñ land Owners Coal Traders and Producers Association (HNLOCTPA) ban iakren halor ka jinglong trai mantrai ia ka khyndew ka shyiap, kan long ha ka 7tarik Nailar 2019, ha Mandiwat Parking Lot, Upper New Nongstoin.

Katei ka jingialang, ka dei halor ka rai jongka Supreme Court dang shen ha kaba iadei bad ka mukotduma khangtih dewiong ha ka jylla Meghalaya
Katkum ka kyrwoh khubor na u Secretary ka HNLOCTPA u bah Apsharailang Syiem u la ong ba ha katei ka jingialang, yn iadon ryngkat ruh u Myntri Rangbah badon burom bad u Symbud Myntri Rangbah badon burom, yn iadon lang ruh kiwei ki MLA, ki Riew Rangbah jongka Dong ka thaiñ.
Shuh shuh u la ong ruh ba ha katei ka sngi yn wan pynshit pynshngaiñ ruh ia katei ka jingialang da ka kynhun Nongrwai jong ka KHMIH CREATIVE SOCIETY bad ki khynnah pule jong ka Nongstoiñ College Music Department ki ban pynshoh mynsiem da ki sur rwai ba sngewthiang.
Kumta na ka liang jong ka HNLOCTPA ka khot sngewbha ia ki paidbah ban iawan khnang khnang, ban pynshngaiñ ia katei ka jingialang na ka bynta ban ioh jingshai ia ka jinglongtrai jong ngi ka jaidbynriew ia ka khyndew ka shyiap.

Shillong: Myn hynnin ka sngi, u Rupang dalade hi u la hiar khnang sha ka shnong Mawskei bahap hapoh ka Patharkhmah Block, ba don ha them Ribhoi ban leit wad khnang ia u heprit badon ka sap kyrpang ban rwai wat lada u don hapdeng ka jingduna ha ki dkhot met, namar ka jing bymlah jong u ban iohi ki khmat naduh na kpoh jong ka kmie.

Ha kane ka jingleit kynduh u Rupang ia u ne u heprit, ba kyrteng Rupari Nongrum 9 snem ka rta, u ba 5 napdeng ki 6 ngut shipara, la lap ba u pule ha ka Kyrdan class ii ha ka skul shnong ha Gov.LP&UP School Mawskeithem bad u dei ruh na ka longiing khunswet namar ka jing khlad noh ka kmie bad ka jing iehnoh u kpa ia katei ka long iing. Mynta ia ka tei ka long iing la peit la sumar da ka mei ieid ha ryngkat ka jing pyndap pynbiang u hynmen ba nyngkong duh napdeng ki tei ki shipara.
Haba pyrshang kylli na u hymmen ba kyrshan ia katei ka long iing ia ki jingeh kiba ki ju shem, u tei u hymmen u la iathuh ba haba wan ka pang ka shitom ki ju shem jingeh bha khamtam kum u hynmen ba pyndap ia ka long iing da kaba shu bylla sngi.
Haba phai khmat sha u tei u heprit wat lada ym lah ban iohi ki khmat hynrei u Rupang dalade hi u la ioh sngew ia ka sur jing rwai jong u tei u heprit kiba sngewtynnad bad ka kit jingmut shibun.
Ha ka tei ka sngi ba u Rupang u leit hi sha ka tei ka shnong ba don ka longiing u la kynduh ruh ia ki katto katne ngut ki samla Khasi na Rilum jaiñtia kiba la ialam da u bah Manangai Sutnga bad ka kynhun “Shillong Choice” ba la ialam da u samla Max Marbaniang ba ki la poi sha ka tei ka jaka ban ia wan jngoh sngewlem ia u tei u khynnah ha ryngkat ka jing ai sngewbha. Bad haba pyrshang ban kylli ia ki tei ki briew ba na kaei ka daw ki wan poi sha katei ka shnong, ki la iathuh ba ki wan sngewbha da ka mynsiem sngewieid bad sngewlem ia u tei u heprit namar ba kim kwah ba kum ki parari kim hun ban shu peit ki khmat ha ki sawkynroh ka mobile phone ne ki tyndong jingsawa hynrei ki kwah ban ia shakri lem ia ka jaitbynriew da kaba ai mynsiem ia kum kitei ki riew donsap ba kin poi sha ka thong wad la ki dei ban mad ia ki dieng pyngkiang kiba bun, bad ka khubor kaba kitei ki briew ki pynsngew ba ki kwah ban kyntu jur ia ki bor sorkar ba kan phai khmat sha kum kitei ki riewlanot ba don ka sap ka phong ba kyrpang kum u tei u heprit bad ba kin plie ki lad ki lynti ia ki kum kitei ki briew ki bym biang ha ki dkhot met ba kin ioh ka hok bad ka jing shakri ba kham kyrpang.

La ju tip ia U Steve Jobs, ba u dei uwei na ki proh jabieng jong ka pyrthei ha kine ki sngi bad ka daw, ka long ba u lah ban wan rah ia ka iPhone, lyngba ka kompeni jongu ka Apple.

Ha ka kot, kaba dang shu pynmih da U Brian Merchant, u iathuh ba katei ka jingshem jong U Steve, ka la dei shisha kaba pynlong ia u briew, ba un khluit khlieh, ban pynmih ia ka jingtieng ha ka jingim bad nangta kaba ialam ruh sha ka jing ia phet tnga jong ki nongtrei kiba don ha katei ka kompeni.

Ha katei ka kot, la iathuh lut ia ka jingkhia jong ka kam jong ki nongtrei ka Apple, ka jingtih jingtip kaba bun rukom bad katei ka la ktah shibun eh ia ka jingim jong u briew shimet, ha kaba iadei bad ka kam iing kam sem ruh.

La iathuh ba la bthah ia ki nongtrei jong ka iPhone project ba kin hap ban pynlut por, lada dei mynmiet ne mynsngi ne mynstep, na ka bynta bun snem, ban pynlong ia katei ka projek kaba jop bad katei ka projek, ka la long shisha kaba trei kam pura.

U Andy Grignon, uba dei engineer ba rangbah jong ka iPhone, u ong “Kane ka dei ka kam, kaba la pynjot shi syndon ia ka jingim jongnga” bad u ong “Kane na kane ka iPhone ba nga duh syndon ia la ka jong ka lok ruh bad mynta nga la ia pyllait sanshyieng bad ka”.

Hynrei katei ka jingshisha, kam dei tang ia U Andy bad ki don bun bah ki nongtrei jong ka Apple, kiba pdiang ia katei ka jingshisha ba kiba bun na ki, ki la ia pyllait noh ia la ki jong ki tnga.

Ka jingtrei ia ka iPhone, ka don ar kynhun, ha kaba ki ong P1 and P2, bad katei ka dei ban ia bynta la ka jong ka jong ka kamram, ban pynlong ia katie ka phone kaba trei kam bha.

New Delhi: U Farooq Abdullah, nongialam jong ka National Conference, uba dei ruh u dkhot jong ka Lok Sabbha, ula iathuh ha ki telebishon channel mynta ka sngi, ba ula shah set phatok ha la iing bad u iathuh ba ym don ba shah ia u, ba un mih mynta la ar sngi kynthih.

“Ka jingong jong u myntri kam poh iing shaphang ka jingpep dorbar jongnga, ka dei ka jingthok suda. Nga la shah set phatok. Ki buh da u pulit DSP ha khmat ka iing sah jongnga. Ngam lah wat tang ban leit rung ha iing ka khun jongnga, kaba don tang khyndiat metre na iing jongnga. Ka don ka tala ha ka jingkhang jongka” ong U Farooq, uba kren da ka jingjaw ummat, ha khmat ki telebishon channel.

U Amit Shah myntri kam poh iing, u kam mynta ka sngi ha Lok Sabbha, ba U Farooq Abdullah, u kam ba U Farooq Abdullah, u don ha la iing, u lah ban iaid ban ieng katba mon.

Ka jubab jong U Shah, ka long halor ka jing kylli ka Supriya Sule, ka dkhot jong ka NCP, ha kaba la kylli ia ka jing bym don U Farooq Abdullah hapoh ka iing dorbar mynta ka sngi, hynrei na ka liang U Amit Shah, u kam ba U Farooq, u don ha la iing bad um shym la shah kem satia bad ula ong shuh shuh ruh ba ka sorkar kam lah satia ban wan rah ia u, da ka pynap suloi.

New Delhi: U Amit Shah, myntri kam poh iing ka sorkar India, ula kren shai mynta ka sngi ha Lok Sabbha, ba ka Pakistan occupied Kashmir (PoK) bad ka Aksai Chin, ki long ki bynta jong ka Jammu and Kashmir bad ula ong “Ngi long kiba la kloi ban iap na bynta kata” bad u da ther tyngeh ia ka seng Congress, ba ka pyrshah halor ka jingweng noh ia ka article 370 na Jammu and Kashmir.

Haba leit rah ia ka mat ban weng noh ia ka article 370 bad ka Jammu and Kashmir Reorganisation Bill, 2019, U Shah, u ong ka don ka jing dawa kaba la slem bha ban pynioh jylla rit ia ka Ladakh bad ia katei la pynurlong da ka sorkar jong U Narendra Modi.

“Ka Kashmir, ka dei ka bynta jong ka India, ym don jing artatien eiei ia kata. Haba nga ong ia ka Jammu and Kashmir, nga kynthup ia ka Pakistan Occupied Kashmir bad ka Aksai Chin, kiba hap ha u pud u sam ka Jammu and Kashmir,” ong u myntri kam poh iing. “Ka Ladakh, ba kynthup ia ka Aksai Chin, kan dei ka Jylla rit. Baroh ar tylli ki Hill Council, kin iai trei kam hi kumba ju long” ula ong shuh shuh.

Haba jubab ia ka jingkylli, la katei ka ain kaba thymmai, kan kynthup ia ka POK, U Shah u ong “Ngin pha ia la ka jingim, namarkata”. Ka Aksai Chin, ka dei ka jaka kaba heh bha jong ka thain Ladakh, kaba don mynta ha ka jingpeit jong ka China.

U Shah, ula ong shuh shuh “U President, ula soi hynnin ka sngi, ia hukum jong ka jing pynkylla ia ka riti synshar ri 2019, kaba pyni ba baroh ki jingbatai jong ka riti synshar ri, kiba dei ia ka Jammu and Kashmir, la pynduh lut bad kaba mut ba ka article 35A la weng noh”, ong ka khubor, kaba la pynmih ha ka CNN News 18.

Shillong: Ka Hynniewtrep Youth Council ka la leit buh dorkhas ia u Supervisor jong ka Karuna Trust Company, halor ka jingdawa ban pynbiang doctor MBBS ia ka Public Health Center ha Warmawsaw Ribhoi District.

U bah Alfred Lyngdoh secretary ka HYC Ri-Bhoi Sepngi Circle, u la ia thuh ba la don shibnai ba kane ka PHC kam don doctor ban sumar ia ki paidbah ka thain. Kane ka wan rah shibun ki jingeh ia ki nongpang ym tang ia ki nongshong shnong ka Warmawsaw, hynrei ia baroh kiba don khap shnong ki ba hap ban wan shim ban wan phah sumar na ka tei ka PHC.

Na ka liang ka HYC ki la kyntu ia katei ka Company ba kan pynbiang noh mardor ia ki Doctor MBBS, khnang ba ki paidbah katei ka thain kin ioh ia ka jing sumar ka ba biang.

Haba kren ha ka dorbar Lok Sabbha mynta ka sngi, U Asaduddin Owaisi, u dkhot na Hyderabad, ula buh jingkylli ia ka sorkar BJP, da kaba ong “Phi iakren ia ki Naga, kiba dawa ia ka bor kaba kham heh shibun, kiba kwah ia ka umphniang lajong ia ka lyer shet jingshet la ka jong, hynrei phim kwah iakren ia ka Kashmir”. U Owaisi, u ong ba la pynlong ia ka Kashmir mynta kum ka West Bank. “Nga dawa ban pyllait mar mar ia ki Kashmiris. Kumno kan jia ia ki, ha ka lehniam Eid, ka dei ha ka Lah Sngi U Blei” ong U Owaisi.

New Delhi: Ka China, ka kynthah jur halor ka jingthmu jong ka India ban pynkylla ia ka Jylla jong ka Jammu and Kashmir, da kaba kynnoh ba ka New Delhi, ka khein kai ia ka jing synshar jong katei ka ri, khamtam, ha kaba iadei bad ka Ladakh, kaba dei ka jaka, kaba don hapdeng ka Tibet bad ka Pakistan.

La ong shuh shuh ba ka Beijing, ka ju pyrshah ia ka jing tuh jaka jong ka India sha u pud jong ka India bad ka China, ong ka tnat bar ri jong ka China, ha ka jing pynmih khubor mynta ka sngi, ka Hua Chunying.

“Ka jing pynkylla ia ki kyndon poh iing jong ka sorkar India, ka pyni ba ka khein dewthala ia ka jingsynshar jong ka China bad katei ka long ka bym lah satia ban pdiang bad ka bym don jingmut eiei ruh em” ong ka Hua.

Na ka liang ka Pakistan ruh, ka kren pyrshah jur halor kane ka rai jong ka India, da kaba ka ong ba ka long kaba kloi ban shim ia kano kano ka rai, ban khanglad ia ka jingleh jong ka India.

• Kumno ban sumar ia u shniuh ha ka por lyiur(summer): Ban ioh ia u shniuh uba koit ba khiah ka dei ka jing kwah kaba hakhmat eh jong ngi ki briew. U dei uba kongsan tam ha ka jingim jong ngi bad uba pynwandur ia ka met ka phad jong ngi.

Ka por lyiur ka dei ka por ba u shniuh u phuh itynnad bha bad jlih hi khlem da pyndonkam ia ki jing sleh khemikal (conditioner)bad uba phi lah ban pynwandur i tynnad la ha kino kino ki rukom teh ne khun (sleek hairdos),hynrei ka pynduh mynsiem shi katdei eh lada ngi duh noh ia kita ki jingitynnad, lada ngim sumar bha ha ka por kaba biang.Ka jinghapshniuh ba man ka por, ka wallam sha ka jingsngewsih, pyn khuslai jingmut bad pynduh noh ia ka jingbhabriew. Kane ka jing thoh ka pyn sngewthuh ba kumno ngin sumar bha ia u shniuh mynta ki por.

Katto katne ki mat ba kongsan kaba ngi lah ban sumar hi ha iing ban lait na ka jing hap shniuh ha ka por lyiur: 1:Tap ia u shniuh:Pyndonkam da ki jain tapmoh ne tuppia ban iada ia u shniuh ha ka por baphi don sha ki jaka ba don sngi.Kane ym tang ba ka iada ia u shniuh na ka jing shah thang ha ka sngi (Ultra violet), hynrei ka iarap ruh ia ka snieh khleh ban ym tyrkhong. Ka jingtap ia ka khlieh ka iada na ka jingpynsniew jong ka lyer ne ka sngi, khamtam lada dei u shniuh uba sohkyrdot bad iada ia u shniuh uba ai rong. 2)Kaba teh synjor ne kylluid ia u shniuh:Ka jing teh skhem ia u shniuh ruh ka dei ka daw bah kaba pyntlor noh, haba phi tan ne law ia u shniuh khamtam lada u shniuh jongphi u la tyrkhong lypa na ka jing shah thang ha ka sngi. Ka jingteh pynkylluid ia u shniuh ka iarap shibun ia ka snam ban tyllun sha ki thid, khnang ba u shniuh un heh bad san bha. [phah ia ki jingthoh ne jingai jingmut jongu ha rupangnews@gmail.com]

Nongstoiñ: Ka West Khasi Hills District Badminton Association ka la plie pyrda iaka 12th District Open Cum Inter Schools BadmintonTournament kaba la sdang naduh myn hynnin ka sngi ha kaba u bah S. Lyndem President ka Synjuk u la long kum u kongsan.

Ha kane ka sngi sdang la wan iashim bynta da ki skul bapher bapher jong ka District kumjuh ruh ki samla kynthei bad shynrang kiba ia shim bynta ha ka Open Category.
Haba ai jingkren kum u kongsan u President jong ka synjuk u bah Lyndem u la kyntu kynpham bad kitbok kit rwiang iaki rang bad ki thei ba kin ialehkai daka mynsiem bym ju pyndem naduh ba sdang ka ktien plaay haduh ka point ba khaduh.
Shuh shuh u la ong ruh ba haba ialehkai dei ban pyni iaka akor ialehkai (Discipline) bad la bynrap ruh baki player kiva ia lehkai bha nangne kin shah jied ban leit ia shim bynta haka 36th state level badminton ha Jowai mynta u bnai

New Delhi: Ka Sushma Swaraj, myntri bar ri barim jong ka sorkar India, kaba dei ruh ka nongialam ba rangbah jong ka seng BJP, ka la khlad noh hynnin ka miet sngi hat majai. Ka la don 67 snem ka rta.

La leit rah ia ka Swaraj, sha AIIMS, ha ka por 9.30 hynnin ka miet, hynrei ka la khlad noh, na ka jingpang kyndeh shadem, ong ka khubor.
Ka Swaraj, ka la shah sumar ban bujli khyllai ha u snem 2016 bad ha kane ka sien ruh kam shym la iakhun satia ia ka elekshon MP 2019, namar ba ka don ha ka jingbym shait bym khlain bha.

Shillong: Ka Smit ka la pynliem ia ka Sawmer da 1-0 kol ha ka jingiakhun ha ka lympung 1st division ka SSA kaba long myn hynnin ka sngi ha madan Polo.
Ia kane ka kol ka Smit la thep da u B.Khriam 54″, katba ka Sawmer SC kam lah ban leh eiei.

Ha kawei ka jingialehkai ka 2nd division, ka Sohryngkham SC ka la shah pylliem ha ka Sohiong SC da 0-2. Ia kine ki kol ka Sohiong la thep da u B.Jana 83′, 85′.

Riki Mukhim

Ban kren ia ka hok bad ka jingshisha shibun ki jingkynthoh, hynrei ban pynpaw ia ka jingshisha ym banse hap hi ban pynpaw iaka jingshisha

Ki kombiraij ba sumar bad ai dawai kynbat khasi kat kumba la sakhi naka por shaka por mynta ki sngi naka jingsdang ka jingduhnoh ki khlaw ki btap ba rben ki dawai kynbat ki lasdang ban duna ne ki lah ruh ban duhjait noh.Balei kita ki Dawai kynbat kila sdang ban duna ne ban duhjait? Hato ngi ju buh jingkylli ne em ialade ban wad iaka hok bad ka jingshisha?

Kat kum ka jingshisha kaba paw pyrthei dei naka jingkhwan spah palat jongngi hi ki briew ngi la long ki nongpynjot pynpra iaki jingaisngewbha ka Mei Mariang iangi. Haoid ban pyndap iaki jingdonkam ha iing hasem ym banse ban wad lad hynrei ngim dei pat ban long kita kiba khwan palat ia u pud haduh ban da kylla long nongpynjot pynpra iaka Mei Mariang, namar dakaba pynjot pynpra iaka Mei Marriang ngi ioh tang kawei ka jingmyntoi kata ka dei ka spah ka phew hynrei kynmaw shisien bala jot lapra ka Mei Mariang shibun ki jingduh myntoi ngi lah ban duh, kita ki long katkum ka jingpyni lyngkot kumne harum :

(1) Ka jingsdang ban duh noh iaki tyllong umbam umdih.

(2) Ka jingkiew ka jingshit bad nangne shakhmat haki snem ban sa wan kan nangjur nangjur bunshah.

(3) Ka jingduh noh iaki sim ki doh ki mrad ki mreng.

(4) Ka jingduh noh iaki jhur khlaw ba jyrngam.

(5) Ka jingduh iaka lyer khuid (Oxygen) ban ring mynsiem.

(6) Ki jingpang balai phewjait u briew u ioh naka jingduh noh iaki khlaw ki btap ba jyrngam.

(7) Ka jingduh iaki Dawai kynbat bad kumta ter ter kiba ym lah shuh ban batai kat kumba ki dak ki shin baka jingeh iangi ki briew ngi la sdang ban mad naka jingpynjot Mariang.

Kumta ka por iangi kam ap shuh namarkata ladei ka por ban kyndit bynriew noh ioh ba ka Apot Sepsngi kan lam ianga iaphi sha ka jingjot ka jingim bymjukut.

Shillong: Ka la don ka jingpyrshang ban iawer lang ia ki MLA ka HSPDP sha ka kynhun United Progressive Front (UPF), hynrei kam pat poi sha ka jingthmu, namar ba ka HSPDP ka dang rai ban neh ha ka Regional Democratic Alliance (RDA) bad ka UDP.

Haba kubur ba ka la don ka jingiawer na ka UPF, u bah Samlin Malngiang u MLA ka HSPDP ba long ruh u myntri sorkar, u la ong mynta ka sngi ba ka la don shisien ba u la shah khot ha ka jingialang jongki, tangba um shym la treh ban iadon lang ha kane ka kynhun thymmai, namar ba u sngew biang ban don beit shwa ha ka RDA bad ka UDP.
“Hooid, ka don ka jingiawer ha kaba nga la shong jingialang shisien hynrei na ka liang jong nga, nga la ong ba ka dang kloi palat. Ngim pat sngew dei ban leh da kumwei, ngi sngew ban don shwa ha ka RDA”, la ong u bah Samlin.
U la ong ba katkum ka jingiathuh jongki, kaei ka jingthmu jongki ka long kumno ban pynkhlain ia ka jingiadei hapdeng ki MLA ban iadon ka jingiasngewthuh jingmut lang baroh.
Ha kajuh ka por, u bah Samlin u la ong ba ha ka por ba dang don u Dr Donkupar Roy, u la thrang ia ka jingiatylli ki seng riewlum, hynrei ka jingkhlad noh jongu, ka la pynkyndit.
“Nga la iohi ba u Dr Donkupar u dei uba thrang ban don ka jingiatylli, hynrei kane ka jingkhlad jongu, ka lah ban long da kumwei pat kaba lah ban pynjngai ne ioh lehse kan wanrah pynban ka jingiajan kham bha shuh shuh”, u la ong.
U la ong ba ka jingiadon ka UDP bad HSPDP ha ka RDA, ka pynskhem ia ka sorkar.
U la ong ba ia kam President ka UDP, ka shong ha ka UDP bad um don eiei ban kren.
U la ong ba ka HSPDP ka pdiang ia u bah Metbah Lyngdoh kum u nongialam ka RDA bad kam pat don eiei ban ong halor kane.

Shillong: Ka kynhun nongpyniaid jong ka jingiakop shad arngut (Duet Dance) kam banse ban pynjlan noh ia ka Online Audition lyngba ka WhatsApp’s Number 8259967432/81319 34923/6033144187.

Yn pynkut noh tang haduh ka 25 tarik u bnai Nailar, na ka daw ka jingud jingnam jong ki riewdonsap shad duet ba kiba bun ki don ha ki exam bapher bapher.
Ha kajuh ka por na ka liang ki nongpyniaid jong ka Shillong Entertainment ka khot ka wer ia baroh ki riew donsap shad la ka long ha ka rukom shad actor actress, phlim Khasi ne ka rukom shad Hindi, English bad kiwei kiwei de. La iathuh ruh ba ki don ruh ki nongpynhikai ia kito kiba kwah ban shah pynhikai pyntbit ha kane ka jing iakob. Ka khusnam na bynta ki nongjop ia baroh kan long Rs. 1,80,000/- (shi lak phraphew hajar) ka bai rung kan long Rs. 1,000/- tyngka shi duet (Shijur). Ia kane ka jing iakob la jer kyrteng da ka Open Northeast Duet Championship, ha kaba ia kiba jop nangne kin ioh contract ban rung ha ka Album Shad ki ban sa mih noh shen. Yn pyrshang ban pynrung ha ki National Level Show, ong ka kyrwoh khubor na ka kong kong Ridalin Sohtun General Secretary Shillong Entertainment.

Shillong: Ki nonghikai skul Deficit, ki la jem mynsiem, hadien ba ka Directorate of School Education and Literacy(DSEL) kala pyllait ia ka tulop ka bynta ba ar ne 2nd quater na bynta 3 bnai.

Kane ka jingpyllait ka sorkar ia ka tulop, ka long hadien ba la buddien ki nonghikai na ka por sha ka por.
Haba pyllait khubor mynta ka sngi, u president ka KJDSTA u Babu Kular Khongjirem ula ong ba ka sorkar lyngba ka ophis u director ka DSEL, ka la phah ia ka hukum ban pyllait ia ka tulop sha baroh ki 11 tylli ki DSEO ha ka jylla.
Ka KJDSTA bad ka GHDSTEA kala pynpaw ka jingsngew nguh ia ka sorlar khamtam ki ophisar ka tnad pule puthi kiba la shah shkor ia ka jingud ki nonghikai.
Hynrei ha kajuh ka por, ki nonghikai ki la pynkynmaw ba ka sorkar kan bat ia ka jingkular ban pyllait noh sa ia ka 25 percent ka arrear kaba dei ka bynta ba ar ne 2nd installment shwa ka sngi rakhe ia ka sngi ki nonghikai ne ka Teachers’day 2019 khnang ba ki nonghikai kin ioh ban lehkmen ha ka rukom kaba shongkun, la ong u president ka KJDSTA.

Nongpoh: Haba pynpaw ia ka jingpyrshah kaba jur halor ka jingthmu ki shipai ka Umroi Military Station ban tei khyrdop ha shnong 4-Kilo, ka shnong kaba don harud ka surok Shillong By-Pass hajan Umiam, mynta ka sngi ki nongialam ka KSU Eastern Border Area bad Umiam Circle, ki la phah da ka dorkhas sha ka DC Ri Bhoi, na ka bynta ban kyntu ia ka ba ka dei ban tuklar lem bad ban iakren ia kitei ki Shipai ba ki dei ban sangeh noh ia katei ka jingthmu tei Khyrdop ha katei ka jaka.

Ha ka jingshisha, kitei ki nongialam ka KSU kaba kynthup ia u Samla Banjop Maring, President ka KSU, EBA bad u samla Steven Kharkrang, President ka Umiam Circle lem bad kiwei pat ki dkhot, ki la thmu ban leit kynduh ia ka Kong RM Kurbah, DC ka Ri Bhoi, hynrei namar ka jingbymdon, ki la leit ban kynduh ia u Bah DP Kharsati, ADC ka Ri Bhoi, ha kaba ki la ioh ban pynsngew lut ia baroh ki nongrim, kiba la pynlong ia ka seng ba kan pyrshah jur halor katei ka jingthmu tei khyrdop ki Shipai.
Ha ka dorkhas kaba ki la phah sha ka DC Ri Bhoi, kitei ki nongialam ka KSU, ki la pynpaw ba katei ka jaka kaba la thmu tei Khyrdop da ki shipai, ka dei ka lynti iaid kjat ki paidbah, namar haneng jong katei ka jaka, ka don ka Iingmane bad Iing skul, ha kajuh ruh ka por katei ka jaka ka dei ruh ka jaka jong ki riew paidbah ha baroh arliang.
Nalor kata, kitei ki nongialam ka KSU, ki la pynpaw ruh ba kham shadien jong katei ka jaka, kaba la thmu tei Khyrdop ki shipai, ka don ruh ka surok PWD, kaba la pyniasoh na katei ka shnong bad mih sha Umiam.
Shuh shuh, ki pynpaw ruh ba katei ka tnat Shipai, ka la dep ban buh ia kawei ka Khyrdop ne ka (Check Gate) bad kaba don ia ka jingjngai kaba tang 1km ei ei shadien na katei ka jaka, kaba ki la thmu ban tei thymmai mynta.
Ka KSU, ka la pynpaw ba ka nongrim kaba hakhmat eh kaba la pynlong ia ka KSU, ba kan pyrshah halor katei ka jingthmu tei Khyrdop ki shipai, ka dei hadien ba ki la iai iohi ia ka jingpynibor da ki shipai pyrshah ia ki nongleit nongwan, kumba ka la iai jia ha manla ki jaka ba don ki shipai bad kaba la ktah shisha ia ka shongsuk shongsain ki paidbah nongshong shnong.
Halor kitei ki nongrim, na ka liang ka KSU, ka la kyrpad ia ka DC Ri Bhoi ba ka dei ban shimkhia bad ban pynsangeh noh mardor halor katei ka jingthmu tei khyrdop ha katei ka jaka, namar kum ka seng lem bad ki paidbah nongshong shnong ha katei ka thain, ki pyrshah jur halor katei ka jingthmu tei khyrdop ki shipai ha katei ka jaka.

Shillong: Ka jingialang ka Executive cum Zonal jong ka KJDSTA kan long ha ka 10 tarik Nailar 2019 ha Seminar hall jong ka State Central Library, Shillong por 11 am ban iakren halor bun ki mat ba donkam ka Association.

La kyrpad ia baroh ki nongkitkam, ki Executive member jong ka seng kmie lem bad ki president bad secretary jong ki 24 tylli ki zone na kylleng sawdong ka ri Khasi-Jaintia kin sngewbha ban ia poi khnang sha katei ka jingialang ba donkam ha katei ka sngi, ong ka kyrwoh na u president ka seng u Babu Kular Khongjirem.

Shillong: U Lyngdoh ka Raid Mawlieh, U Dr Firmly lyngdoh u la aiti ia ka Sanad ha U Sordar ba thymmai ka Raid Mawja, U bah Honroy Khongsdir, ba un shimti ia ka kam synshar khadar bad ban pyniaid beit iaid ryntih ia ka dorbar Raid na ka bynta ki khun ki hajar ka Hima.

U Lyngdoh, u la kren sngew diaw mynsiem da ka jingpangnud pait mynsiem, haba u la iohi jngai ia kiei kiei ka ban sa wan taplep ioh kin duhnoh ha ka jingtyllun jongka por.Shuh shuh U Lyngdoh u la bynrap, ba ka jingbym pyndep shuh iaka leh Niam Raid Niam Shnong, kan pynsynjor ia ka synshar ka khadar. U Lyngdoh u la batai shai ba ka Niam Raid Niam shnong ka dei ka hok, ka jong u khun u hajar ban pyntip shisien shisnem, sha u lei Raid ba un kynkhu,ha ka thung ka tep, ka Rep ka riang, ban biang ka shait ka nang, ban lait ka truh ka tram.