Shillong: “Kino kino ki trai ing ki ba ai wai ing ban sah ne ki Hotel lane ki ingbasa (guesthouse) kiba ai wai kulmar khlem da tip ia ki briew lada ki lap ba ki don ha kano kano ka kam khaii drug ne ki sniew kin ngat lang ha ka ain” la ong ka S.P jong ka East Khasi Hills District ka kong Cluodia Lyngwa mynta ka sngi haba iakren bad ki nong pathai khubor ha ophis trei kam jong ka.

Kane ka jing bthah ka long hadien ba la lap ba ia ka jing khaii drug ka la jyllei palat ha ka Jylla ha kaba hynnin ka sngi 23 tarik u Naitung ki pulit ka ANTF team ki la ioh ban kurup ia u drug u ba 5.29grm bad u ba shong dor 1klur na kawei ka long kmie kaba kyrteng Kimnei Khol kaba dei na Manipur bad ka ba sah wai ha Madanriting.
Ka S.P ka la ong “Ngi na ka liang ka tnad pulit ngi la ialeh shitom ban teh la kham ia ka jing khaii ia ki drug, hynrei ka long kaei kaei kaba jynjar tang na ka tnad pulit ba ngin teh lakham ia ki,kumta na ka liang ka tnad pulit ka kwah ban don ka jing iasnoh kti lang jong ki paid nong shong shnong bad ki rangbah shnong”.
” Ka jingsngap mynthi jong ki briew kiba iohi ne shan khmat ia ka rukom iaid rukom ieng jong kine ki briew ruh ka wan rah ia ka jing eh ia ngi” la bynrap ka S.P
“Ki briew kim sngewthuh ba ki dei ki khun jong ki hi ki ban jot, lada ki ialeh ban sngap ia kine ki jingjia; kumta ki dei ban sngwthuh ba kine ki nong dih drug ki la bun palat, dei tang namar ba kim peitngor bad ia snoh kti lang bad ngi.”
Ka kong C.Lyngwa ka la ong “Kawei ka jingeh ka long ba ngim don ki nongsakhi lada ngi la ioh ban kem ia kine ki nong khaii ruh ngi kwah ia ka jingsnoh kti lang na ka liang ki Rangbah Shnong bad ki nong shong shnong khnang ba ngin lah ban teh lakham ia kine ki nongdie drug.
Na ka liang ki tnad pulit ka la iathuh ba ka Madanriting,ka Mawlai, ka Mawiong ka Jaiaw,ka Polo,ka Nongmynsong, ki dei ki jaka kiba la khlain bha ka jingkhaii drug.

Shillong: U Bah Paul Lyngdoh EM ba dei peit ia ka tnad khaii pateng hapoh jong ka KHADC, haba jubab ia ka jingkylli jong ka kong GM Kharpuri, haba ia dei bad ka jingkhaii benami, na ka liang jong u EM u la ong ba ka EC ka la shim bun ki lad ki lynti ban khang ia kane.

U Bah Paul u la iathuh hapoh ka iing dorbar ba kala don ka ain Benami Transaction Act, 1980 bad ka ain ban teh lakam ia ka jingkhaii da ki bor jylla ia kaba la tip kum ka “Regulation of Trading by Non Tribal 1954, halor kitei ki ain la khanglad ia ka jingia leh benami.
Na ka liang jong u EM u la pynshai shuh shuh ba wat la kitei ki ain kila don, hynrei haduh mynta kam pat don kano kano ka jingshah pynshitom ia kito kiba khaii benami bad kane kala pynshlur ban trei ia kane ka kam beain namar ym don ka jingpynshitom ia ki.
U Bah Paul u la kdew ba kane ka jingkhaii benami ka jyllei bha kum ha Majai, ki jaka ba la shong khleh. Na ka liang jong ka EC ka la trei shitom ban lap ia kiba trei benami bad kyrmen ba ha kine ki khyndiat bnai kin sa lap bad kin sa shah pynshitom ruh katkum ka ain.

Shillong: Ki dkhot ka Seng HYC Central Body hapoh ka jingialam u General Secretary Bah Roy Kupar ki la leit ban iakynduh ia u Commissioner Transport Department, U I.W. Ingty, ban ujor pyrshah ia ka jingkhot aplikeshon da ka ophis ha kaba iadei bad ki Post Enforcement Inspector bad Enforcement Checkers ha ka tnad Transport lyngba ka Advertisement Dated 16.07.19 ha kaba la khot ban pyndap ia 6 tylli ki Posts Inspector bad 15 tylli ki posts Checkers ha katei ka tnad.

Ki dkhot ka seng ha ka dorkhas ba la ai ha u Commissioner bad ha ka jingiakren ki pynpaw ia ka jingpyrshah kaba jur, halor kane ka jingkhot aplikeshon dalade hi da kane ka Department, ym kumba ju leh ha ki snem ba ladep ba ia ki kam ba lait baroh la ju khot lyngba ka MPSC, hynrei mynta pat lah khot hi dalade, ki la kam ba ioh kane ka rukom thepkam kan nym long kaba khuid ba suba bad kan pynduhnong ia ki samla kiba dei hok shisha ban ioh ia kine ki kam.
Ki la pyrshah ruh halor ka jingbym thoh shai ha ka Advertisement ia ka polisi bhah kam (Reservation polisi) jong ka jylla, la kan treikam ne em ha katei ka jingthepkam,bad ki la dawa badei ban pynsangeh noh shisyndon bad ban khot lyngba ka MPSC.
La iathuh ba u Commissioner u la pynpaw ba ia kane ka kam u la leh lyngba ka jingbthah jong ka Sorkar Jylla bad un sa ai jubab kham kloi katba lah bad kaba kham bniah ia ka jingdawa jong katei ka Seng hadien ba u la ioh ia ka jingbthah jong ki bor ba halor sha u.
Na ka liang ki nongialam katei ka Seng ki pynpaw ba katba ym pat ioh ia ka jingpynshai bad jubab halor ki jingdawa jong ka Seng, ka Department kam dei ban iaid shakhmat ban khot ia ka Written Test ne Interview ia ki nong aplai halor kitei ki kam,bad ki la rai ban buddien bad ban pynlong ruh ki jingiakhih lada ka Department kam pynsangeh bad ai ka jingpynshai halor ki jingdawa jong ka.

Shillong: U MDC ka Rambrai u bah Bajop Pyngrope ula pyrshah jur ia ka jingthmu jong ka sorkar Assam ban den bording na ka wah Khri kaba ai kyrteng da ka Assam kum ka Kulsi Hydel Project da ka Bramaputra Board ha khappud ka Meghalaya.

Haba pyrshah jur ia kane, u bah Bajop ula kam ba lada ailad ia ka Assam ban den, palat 35 tylli ki shnong kin sa shah taplep ha ka um naduh ka jingduh ki jaka rep bym lah shuh ban batai.
“Kane ka dei ka projek ka sorkar pdeng kaba thmu ban shna hajan Kyrshai ha khappud ka Assam, ki la wan ban thew ban woh lyngba ka Brahmuptra Board bad ki paidbah ki pyrshah jur ia ka”, la ong u bah Bajop.
U la ong ba kum u MDC ula rah ia kane ha ka iing dorbar ba ka KHADC kam dei ban ai NoC.
“U CEM u la ong ba ka NoC ym pat ai bad ka dang don ha ka jingiakren bad nga la dawa ba ym dei ban ai NoC namar ba kane ka projek kam nym ai jingyntoi ia ki paidbah ka Meghalaya hynrei kan pynbiang um bam um dih tang ia ka Assam bad ban pynmih bording kaba 55 MW”, la ong u MDC ka Rambrai.
Ia kane, ula pynsngew ruh hapoh ka ing dorbar ka KHADC mynta bad na ka liang u CEM u la ong ba ka Council kam pat ai kano kano ka NoC.
Katkum ka jingong u MDC ka Rambrai, ka Assam kala thmu ban den ha ka jingjrong kaba 100 metre ka kynroh bad kane kan long ka jingma ha kaba ki shnong ka thain Rambrai bad ki bynta ka Ri-Bhoi kin shah tap um.
La ong ba ka Assam ka thmu ban pynmih bording 54MW bad ban tan um ia ka thain Kamrup na katei ka dam.
Hynrei kaba sngew lyngngoh katkum ka jingong u MDC, ka long ba u myntri tnad bording um pat tip eiei ia kane ha ka jingkynduh dang shen.

Shillong: U Bah Charles Marngar MDC jong ka Mawhati u la ia kynduh ia u Chief Executive Member jong ka Khasi Hills Autonomous District Council u Bah Teinwell Dkhar bad ha kane ka jingiakynduh u la kyntu ia u CEM jong ka KHADC ba dei ban don noh ia ka “ Committee” ban ia leh pyrshah ia u Drok.

Ha kane ka jingiakynduh na ka liang jong u CEM jong ka KHADC u la ai ka jingmynjur ban thaw noh shen ia kane ka Committee ha kaba ki dorbar shnong kin ia don bynta lang ban ia leh pyrshah ia kane ka kam dih drok kaba la jyllei haduh katta katta.

Ha kane ka jingiakynduh na ka liang jong u MDC ka Mawhati, u la kyntu ia u CEM ban pynnih ia ka jingbthah sha baroh ki Hima ki shnong bas bthah ia ki ba lada don kano kano ka jingioh kem ia ki nongkhaii drok, ka dorbar shnong ka dei ban ai ka jingkyrshan ia ki pulit ba kin long ki nongsakhi.

U Bah Charles, u la ong ba u da sngewkhia jur ia kane ka jingjyllei kane ka jingkhaii drok ban ialeh pyrshah tang ka bor jong ka ain kin nym lah shuh, ban tehlakam ia kane la don kam ban ia treilang ryngkat ki dorbar shnong ha kaba ka KHADC ka dei ban bethah ia ki dorbar shnong baroh ban ia treilang.

U la pynpaw ruh ia ka jingsngewnguh ia u CEM jong ka KHADC u Bah Teinwell Dkhar u ba la kular ba yn sa thaw noh ia ka “Committee” hapoh jong ka KHADC ban bthah ia ki dorbar shnong ban ia treilang bad ki bor jong ka ain ban long ki nongsakhi haba don ka jingioh kem ia ki nongkhaii ne nongdih Drok ha ki shnong ki thaw.

Shillong: “Na ka liang ka Association ngin ym lah ban siew ia ka pisa ba ka kong Danosha Khongsit, ka khlem pynpoi ha ngi hynrei ngin siew tang kato ka pisa ba ka la pynpoi sha ngi kata tang haduh u bnai Iaiong” la ong ka president jong ka Pynroilang Women’s Association, ka kong Privister Lyngkhoi.

Haba ia kren bad ki nongpathai khubor mynta sngi, ka president ka Pynroilang Women’s Association ka la ong “Kat kum ka jingkynnoh jong ki customer ba ngi la pynsangeh kam ia ka kong Danosha na ka liang ka Association, ngi khlem pat pynsangeh kam ia ka kong Danosha Khongsit hynrei ngi la bthah ia ka ba kan ym shim pisa shuh ia ki briew ba thymmai, hynrei pyndep tang ia ki rim, hynrei ka kong Donosha ka wan ai ka pisa tang haduh u bnai Iaiong na ka liang ka Association ngi sngewkhia ba kin don kum kine ki dkhot ha ka association kiba leh kam kai kumne.”
Kum ban shu pynkynmaw ka kong Danosha Khongsit, ka dei ka agent ban lum pisa ia ka Pynroilang Women’s Association kaba don ha Mawlai Mawdatbaki. Ka kong Danosha Khongsit ka la lum ia ki pisa na ki briew ki ba haduh 130 ing,hynrei jing bym lah ban pynpoi ia ka pisa 2 bnai ka ba dei ha u bnai Jymmang bad Jylliew ka la shah kem noh ha ka 23 tarik Naitung 2019 hadien ba ki la dep ujor da ka ejahar.

Shillong: The Shillong Traffic Police (STP) intended to change the existing traffic route from Civil Hospital Point going towards Anjalee Petrol Pump in National Highway 40 on trial basis w.e.f. 27th July, 2019 Am.

In the new route, all the Light Motor Vehicles (LMVs) from Civil Hospital Point going towards Anjalee Petrol Pump, will have to take left turn at Rhino Point towards Bishnupur road and will join back the highway after a semi-circle turn at Rhino Point. However, all the Heavy Motor Vehicles (HMVs) can proceed straight on the road as usual. No Entry will be affected only for the LMVs. Vehicles coming from Anjalee Petrol Pump and wanting to proceed towards Bishnupur road will merge in the same road as usual. All the vehicles coming from Bishnupur road and wanting to proceed towards Civil Hospital – IGP Point will not have to proceed to Anjalee Petrol Pump for a right turn but can turn on the Rhino Point itself and merge in the highway.
“It is therefore requested that the above instructions be adhered to and inconvenience cause is regretted” said the statement of the Traffic Branch.

Shillong: Ki ophisar jong ka State Bank of India ryngkat bad ka jing ia trei lang bad ka Pasteur Institute Shillong, ka la pynlong ia ka jing ai snam mon sngewbha ban rakhe ia ka jing dap Golden Jubilee jong ka bank (SBI) ha ka ri India.

Kane ka jing ai snam mon sngewbha ka long ruh ban ia jan bad ki briew ka Meghalaya bad ban iarap ruh ia ki briew kiba duk bad kiba donkam snam ki bym ioh pisa ban thied snam.
Ha kane ka sngi ladon haduh 41 ngut ki nong ai snam mon sngewbha ki ba wan ban shim bynta sngewbha.

Ka sorkar India, ka iakren bad ka sorkar Nagaland, halor ka jingthmu ban nang pyniar shuh ia ka jing trei kam ka Inner Line Permit (ILP) sa sha Dimapur.

“Ka jingthmu jong ka sorkar Jylla ban nang pynjlan shuh ia ka Inner Line Permit sha Dimapur, ka don mynta ha ka jingiakren” ong u myntri khynnah ka tnat poh iing, U G Kishan Reddy.
U myntri kam poh iing ka sorkar India, U Reddy, u ong ba ka Inner Line Permit (ILP), ka hap ha ka ain jong ka Bengal Eastern Frontier Regulations (BEFR), 187.
“Kat kum kitei ki ain, ki nong India, kiba kwah ban leit sha Arunachal Pradesh, Mizoram, bad Nagaland lait noh ka Dimapur, ki donkam ia ka Inner Line Permit” ong U Reddy.

Shillong: U MDC ka Mylliem u bah Ronnie V Lyngdoh u la ujor hapoh ka iing dorbar ka KHADC mynta ka sngi, ba uwei u myntri ka Hima Mylliem u la kyntait ban ai sanad ia u Rangbah Shnong ka shnong Umsaw kaba hap ha Mylliem konstitwensi tang namar ba u la kynnoh ba u la shah ujor ejahar ne FIR.
“Nga kwah ban wanrah ha ka iing dorbar ba ka shnong Umsaw ha Mylliem konstitwensi, ka la jied ia u Rangbah Shnong hynrei ynda la leit pan sanad, uwei u myntri ka Hima Mylliem u la kaweh da ka Ejahar (FIR) da kaba ong ‘ia me ym lah ban ai sanad ba la shah ujor ejahar’.
U bah Ronnie u la ong ba kane ka dei ka jingleh kaba sniew kaban wanrah ka nuksa kaba sniew. “Kumba la iakren wat ki myntri ki syiem ruh ki don ki jingiadei bad kano kano ka seng sain pyrthei, te tang da kaba shu shah kynnoh, ban nym ai sanad ka long kaba bakla”.
U bah Ronnie u la ong ba ka Executive Committee ka dei ban bthah ia ka Hima ba ka dei ban ai noh ia ka Sanad ba la jied bad lada don ka ain kaba pynshisha ba u don ka jingshisha, lah ban leh da kumwei pat namar ba da kaba leh kumne hadien habud, ki syiem ki lyngdoh ki lah ban pynduh tang ba la shu kynnoh.
Halor kane, u Dy.CEM u bah Pyniaid Sing Syiem u la ong ba ym lah ban kyntait ia kum kata ka jingjied kaba la iaid beit iaid ryntih bad ka ophis kan shim khia. “Ngan pan jubab na ka Hima Mylliem ha kaba iadei bad kane”, la ong u bah Pyniaid.

Shillong: Ka Khasi Students’ Union War Jaintia Circle, ka pynrem jur ia ka jingioh lad ki shipai Border Guard of Bangladesh ban wan rung shapoh India, khlem da ioh bor na ka sorkar India ban khanglad ia ki nongshong shnong ban shna maramot ia ka surok Muktapur kaba la jia ha ka 20 tarik janmiet mynta u bnai. Kane ka dei ka kam kaba kongsan ba ka sorkar jylla kadei ban tuklar namar na ka liang ki Border Security Force kim trei kam bad kim lah ban ai ka jingiada ia kane ka shnong ba don ha khappud Meghalaya bad Bangladesh. Ka jingjynjar bad sohsat ki paidbah ka la nangjur sha kine ki shnong border namar ka jingbymshim khia ki bor ba dei peit, ki lah shuh ieh, sah tang katno tharai ki shnong ki thaw jong ngi ha ki thain border yn wan leh donbor da kiwei ki jait briew. Ka Seng ka kyntu ia ki bor district ban phah briew ban leit tuklar mar mar khnang ba ki shnong border kin ioh biang ka suk ka sain bad ban shna pyndep ia katei ka surok. “Ka seng ruh kan sa leit jurip ia katei ka jaka bad lada kam don kano kano ka jingtreikam na ka liang ka bor district, ngim banse ban tuklar hi noh da ka seng na ka bynta ka jingbha jingmiat u paitbah ka thain War” ong ka kyrwoh ba la phah da u General Secretary Samla Lurman B. Talang.

Nongstoiñ: U wei u rangbah u bala tip kum u bah Adkar Kharshandi 43 snem na ka shnong Nongstoiñ u la leit ban ujor sha ki pulit Nongstoiñ halor ka jingshah pied ka ïing sah ka jong u bad rong tuh ruh ia ka pisa bad ki ksiar.
Katkum ka tyllong khubor na ki pulit la ong ba katei ka jingjia kala jia ha ka 24 tarik mynta u bnai ha kipor 9:30 AM haduh 3:30 PM kaba dei ruh kipor bym don briew ha katei ka ïing sah ka jong u kaba don hajan ka ophis DTO Nongstoiñ.
Shuh shuh la ong ruh ba kitei ki runar kila khura ia ka ïing jong u bad pied ruh ia ki almari ha kaba kila ioh ruh ban rong tuh noh ia ka pisa kaba T.50 hajar tyngka lem bad ia u wei u sati ksai bad ar tylli ki soh skhor ksiar.
Kumta na ka liang jong ki pulit ki la register ia ka case bad ki dang pynlong ruh ia ka jingtohkit ban lap ksai ia kitei ki runar kiba la don kti ha katei ka kam.

Shillong: U Deputy CEM ka KHADC u bah Pyniaid Sing Syiem, u la ong ba ka kynhun na ka Executive Committee ka la dawa na ka sorkar ba kan pynjem ia ka kyndon ka Minor Mineral Concession Rule (MMCR) 2016, khnang ban ailad ia ki nongtih shyiap nongtih maw kiba rit baria ba kin ioh ban trei ban ktah da kaba pyndonkam tang da u tyrnem bad u shniah.

“Ka EC ka la shim khia ia kane hadien ba la ioh ia ka jingud na ka kynhun ki briew ba ju trei ia kane ka kam, bad ka la iakynduh ia u Dy. CM bah Prestone Tynsong ban ailad ia kiba tih da u shniah ne tyrnem ym ia kiba pynkhyllem ia ki lum da ki kor ki mashin”, la ong u bah Pyniaid haba jubab ia ka jingkylli ba la wanrah da u bah Ronnie V Lyngdoh u MDC ka Mylliem mynta ka sngi ha ing dorbar ka KHADC.
Katkum ka jingong u bah Pyniaid, ka sorkar ka la ai jingpynthikna kan leh katba lah ban pynjem ia ki kyndon ban ailad ia ki nongtrei barit ban tih shyiap da u briew, ym da ki kor ki bor.
U bah Pyniaid u la ong ba ka dei ka jingshisha ba ha ki katto katne bnai ba la don kiba la wan ud na ki kynhun ba ju im ha ka tih syiap ba shah khang ha ka sorkar kaba la pynmih ia ka jingpynbna ia ka MMCR 2016 ha ka 12 tarik Nailur, 2016 ka la khang ia ki jaka tih shyiap, tih maw.
“Ka don kawei ka bynta ban iaid shakhmat ia ka jingtih maw lada bud ia kane ka kyndon ne ka rule bad kata ka long ba ka KHADC ka don kawei ka bynta ban ai NoC ha Non Forest Land ne ha ki jaka bym don khlaw bad ka bai license ne syrnot ia kane la buh ba kan long T. 1010 ban siew sha ka Council”, la ong u Dy.CEM.

Ka jing jubor jong ka khieshoh bad ka jingpang dengue, kaba la jia ha kine ki sngi ha Bangladesh, ka dei namar ba ki la kharoi palat ki skain pyrjong, kiba la ai kyrteng da u myntri ka koit ka khiah jong katei ka ri, kum ki Aedes, ong U Zahid Malegue, myntri ka koit ka khiah.

“Kine ki skain pyrjong, ki dei kiba satar bad kiba don ruh ka bih kaba khlain bor shibun. Ki shong ki sah ha ki iing briew bad katei ka dei ka jubab kaba shai bha” ong u myntri, ha ka jingialang ban iakren halor ka khieshoh denge ha Dhaka Medical College Hospital hynnin ka sngi.
“Ka mih ka jingeh, ba ngin pynduh jait, namar ki la kharoi than, la kumba kharoi ki jaitbynriew Rohingya ha kane ka ri. Kan jin da la hiar shibun ka jingpang dengue, lada ngi lah ban pynduh jait ia kine ki skain pyrjong Aedes” ong u myntri.
La iathuh ba kiba pang iap na ka jingpang dengue, haduh mynta ki long phra ngut, wat la ki don kiwei pat kiba ai jingkhein ba ki la poi sha ka 19ngut. Kiba ioh pang dengue haduh mynta, ki don 5, 637ngut ha U Naitung 2019, uba long u bnai, uba bun duh kiba ioh ia katei ka jingpang.

Kiba bun ki ju buh dur ha ka instagram, na ka bynta ban pyni briew ia la ka jong ka dur ka daw, hynrei ka Priyanka Chopra, ka khlur jong ka bollywood bad U Virat Kohli, u snar ialehkai kriket ka India, ki da ioh ia ka dor kaba heh shi katdei, haba ki buh dur ha katei ka peij.

Na kito kiba kamai spah bun tam, ki long ka Kylie Jenner, ha kaba ka ju ioh $1.266 million lane T.8.74 klur, da kaba buh dur ha Instagram, katba ka Ariana Grande, ka nongrwai ba pawnam, ka ioh $996,000 lane T.6.87 klur.
Ka Chopra, la iathuh ba ka ju oh dor $271,000 lane T.1.87 klur, na bynta ban buh dur ha Instagram. Ka Chopra, ka don 43 million ngut ki nongbud jongka ha ki social media. U Kohli, u ju oh dor $196,000 lane T.1.35 klur, na bynta ki dur jongu ha Instagram.
U nongialehkai ka Portugal, U Cristiano Ronaldo, u don ki nongbud jongu haduh 172.8 million bad u ju oh dor $975,000 lane T.6.73 klur na ka bynta shisien ban buh dor ha Instagram.

Ki shijur ki samla, ka Alia Bhatt bad U Ranbir Kapoor, ki la paw bha ha ka jing khmih lynti kiba bun, ba kin lah ban ia poi kha noh shen ha ki sngi ban sa wan. Don kiba iathuh ruh ba ka Alia, ka la leit phah suh jain ialade, na ka bynta katei ka sngi ba kyrpang ha ka jingim jongka.

Ka khubor jong ka Times of India, ka iathuh ba ka Alia, ka la leit sha ka nongsuh jain ba pawnam, ka Sabyasachi Mukherjee, ba kan suh ia ka lehenga jonka, ha kaba la iohi ruh ba ka la leit sha dukan jong katei ka nonguh.

Hynrei u kni ka Alia, U Mukesh Bhatt, ula kyntait ia katei ka khubor, da kaba ong “Kane ka dei ka khubor thok suda. Mano ba pynmih, kum kane ka khubor kai?” ong U Mukesh ha katto katne ki nong pathai khubor.

Shillong: Ka KHNAM State Youth wing, ka la leit ai jingthoh sha u myntri ka koit ka khiah Bah AL Hek mynta ka Sngi, ban phah tuklar ia ka sorkar jylla, halor ka jingbym khein kor jong ki bor ka NEIGRHIMS ia ngi ki trai jylla, kumba la paw lyngba ka advertisement ba la pyllait paidbah da katei ka department ia ki 231 tylli ki kam, ha kaba la mang kyrpang tang 17 tylli ki kam, ia ngi ki ST nalor ba ngi dei ka jylla ha kaba bun bha ki ST, katba ia ki SC la mang kyrpang haduh 34 tylli bad ia ki OBC la mang kyrpang haduh 62 tylli bad ia ki EWS la mang kyrpang haduh 32 tylli ki post.

Kane ka pynpaw ia ka jingleh shiliang im im peit peit pyrshah ia ki trai jylla bad ka jingkhanglad ia ki samla ki jong ngi, ia kaba ngim lah ban pdiang. Ka jingailad bad ka jingsngap jar jong ka sorkar jylla, ia kine kine ki ophis jong ka sorkar pdeng ban leh mon bad nion being ia ngi ha ki bynta iohkam iohjam. “Ngi la kyrpad ia ka sorkar jylla lyngba u myntri kum kita kiba don ka iktiar ban iasaid naka bynta ka hok ki samla jong ngi bad ngi la ai jingmut ruh ban pynduna noh naka bhah jong ki SC bad OBC ban kyntiew noh ia ka bhah ki ST sha ki 70 seat lane tam” ong katei ka kyrwoh.
“Ngin sa kynduh ruh ha ryngkat ka jingthoh ia u Director jong ka NEIGRHIMS halor kane bad ba ki dei ban bud ryntih ia ka circular bala pynmih daka ministry of Home Affairs jong ka sorkar pdeng lyngba ka shithi No. 35/1/72-R. U(SCT.V) tarik 02 May 1975 ha kaba la kdew shai ba ia bhah jong ki ST ka dei ban leit tang sha ki ST kiba na kato ka jylla ym ia kiwei pat ki ST na kiwei pat ki jylla, ia kane ka jingpyntip la phah ruh sha ki Chief Secretary jong baroh ki jylla da ka MHA, na kata ka daw ka dei ruh ka kamram jong ka sorkar ban pynthikna ba ka NEIGRHIMS ka dei ban pyntrei kam ia kane” pynkut ka kyrwoh na U bah Thomas Passah, President KHNAM, State Youth Wing.

Shillong: Ka Khasi Students’Union(KSU),ka pynpaw ia ka jing sngew kyndit haba la iohi lyngba ki lad pathai khubor, ba ki jaka ba don ki karkhana kin nym donkam shuh ban dang ioh jingbit na District council (NOC) ne wat na ki dorbar shnong bad ba kata ka jing pynbna (notification) kan nym hap shuh ha u pud u sam jong ka Distrcit council ne schedule area.

“Lada kim hap shuh ha u pud u sam jong ka district council bad jong ki Dorbar shnong te kan hap ha pud u sam jongno pat?.Ka seng kan sa wad bniah halor kane ka kam ban shai bad tip khambniah, namar kumno yn shu sloit ia ka iktiar na District council ryngkat na ki dorbar shnong!” ong ka kyrwoh na U bah Lambokstar Marngar, President ka KSU.
“Ha kano rukom bad kaei ka bynta ba la pynshong nongrim ban kdew ba ki jaka ba don ia ki karkhana kin nym donkam shuh ia ka bor ne ka iktiar na ki district council?, ia kaba ka tnad Directorate of commerce & industries jong ka sorkar jylla ka la pynmih ia ka jing pynbna,kat kumba paw lyngba ha ki lad pathai khubor” ong shuh ka kyrwoh.
Ha ka jing shisha ka District council ka dei ka nong iada ia ka khyndew ka shyiap, hynrei la nang iai sloit ia ki bor jong ka kat nang iaid ki snem, pynkut ka khubor.

Shillong: “Ka jingleh thurmur jong ka CPWD bad ki nongpyniaid jong ka skul JNV ka la wan rah ia ka jingduh nong jong ki khynnah ki ba pule ha JNV” la ong u bah Lambor Malngiang, Chairman State Planning Board, hadien ka jingialang bad ki kmie ki kpa jong ki khynnah skul, kiba pule ha ka skul JNV Mawphlang, kiba la leit ban ia kynduh ia u, halor ka jing bym pat lah ban plie ia ka skul haduh kat kine ki sngi ba mynta.

“Hangne ngi hap ban pyrkhat ia ka lawei jong ka ki khynnah bad kumjuh ngi hap pyrkhat ruh ia ka jingkhuid jong ka umbam umdih ba poi ha shillong kumta ngi hap ban pynbeit kham kloi noh ia kine ki jingeh”, la ong u bah lambor
Ia kane ka skul la dei ban plie naduh ka 1 tarik naitung hynrei ym shem la lah plie bad ka daw ka long ba hadien ba ka Environment Commitee ka leit ban jurip ha ka 25 tarik u Jylliew 2019 bad ka la lap ba ki jaboh baroh ki pyntuid sha ka wah umiew bad ka wah um iew ka tuid ha ka dam Mawphlang kaba ka sor Shillong baroh ka ioh ia ka umdih.
Na ka liang jongngi, ngin khot ia ka jing ialang ha ka sngi thohdieng hapdeng jong ka CPWD, U Reginal director JNV bad ka PHE ban pan jingpynshai ha kane ka liang, ong u bah Lambor, uba kynnoh ba katei ka jingdkoh, ka dei na ka jingleh bym kitkhia ka tnat CPWD ia ka jingtrei ia katei ka kam ha katei ka skul.

Guwahati: 3 ngut ki pulit, ki la shah kem mynta ka sngi, namar ba ki lute ia ka pisa kaba T.20lak na kawei ka longkmie, kaba wan na Mizoram.

Kitei ki pulit kiba shah kem, ki long U Johm Pathori bad U Pranjal Bora baroh arngut ki Sub Inspector bad U Bipul Hazarika, uba dei U Home Guard bad la iathuh ba kitei ki la lute T.20lak na katei ka longkmie, ha kaba ki pyn ithuh ialade ba ki dei na ka Crime Branch.
La iathuh ba ka longkmie kaba na Mizoram ha ryngkat bad uwei u briew, ka wan rah ia ka pisa sha Guwahati, hynrei kitei ki la bat ia katei ka kali bad ki la shimti ha lade ia katei ka pisa.
Ki pulit ki la kurup ia katei ka kali, ka Innova bad ki dang tohkit ia katei ka longkmie bad la sngewthuh ba ka jingthmu jongka, ba ka wan rah ia katei ka pisa, ka long ban wan bujli pisa sha Guwahati. La kem ia uwei na kitei kiba pyniaid pisa thok na Guwahati.