Ka Elizabeth Hoad, kaba dei ka model kaba rim, ka la jlep shoin ban ia iaid shynrang bad ka daw, ka long ba ka la iaid bad 220ngut ki shynrang, hynrei kam hun mynsiem satia bad kam ia poi shaei shaei ruh. Kumta ka la rai ban ia poi kha noh bad u ksew jongka hi, ong ka khubor kaba la pynmih ha ka The Sun.

Ka Elizabeth, 49, ka don jingthmu ban leit ia kren ia u lyngdoh niam ba ka don ha ka kyrteng balang ha ka balang Catholic, ba un pyniathoh ia ka bad u ksew jongka, uba hynriew snem, U Logan.

Ialade kan deng da ka sati synjat bad U Logan, un deng da ka jingdeng kti, kaba rong ksiar, ka tuppia, ka putoi bad u bow tie.

La pynbeit ruh ba U Ajax bad U Bear, kin dei ki ar tylli ki ksew kiba yn shim kum ki synran, ha katei jing ia poi kha, kaba la khmih lynti ba kan long ha ka 2tarik Nailar 2019. La pynbeit ba kin wan 20ngut ki paralok kiba iajan bha bad ka Elizabeth.

Ka Elizabeth, kaba na Ascot, Berks, ka la iateh ktien bad arngut ki shynrang, hynrei ynda mut ban iathoh, ka la shu ia lait noh kumto bad ka ong “Nga la jlep ia ki shynrang”. “Nga la ia iaid bad 220ngtu ki shynrang, ha ki phra snem ba ladep, kiba nga la lap na ki hynriew tylli ki dating site, hynrei ka la shu long tang ka kam kai suda” ong ka Elizabeth. “Kumta nga la rai ba ngan ia poi kha noh bad U Logan. Um ju iehnoh ianga bad ngi ia don mar syndah, iwei ia iwei pat. Kiwei ki lah ban ong, ba nga dei ka bieit, hynrei ka dei kane ka lynti ban ia shong ia sah ryngkat baroh shi rta”.

Shillong: Ka kyrwoh na ka seng HYC lyngba u samla Robertjune Kharjahrin, President ka seng, ka dawa na ka sorkar Meghalaya ba ka dei ban pynduh noh ia kine ki jingpynlong mraw ia ki briew bad la dawa ba kan sdang da kaba ia pynbeit bad weng noh ia ki jing eh jong ki nongtrei ka GVK EMRI.

Ki nongtrei ka GVK EMRI ki la shah ban bein bad ka seng ka dawa ba ka sorkar kan ieng na bynta jong ki, ym na bynta ka nongban bein.
Lada ka sorkar ka kynmaw ban pyntreikam ia Meghalaya Essential Service Act ban pynsangeh ia ka jingiakhih, ki nongtrei ka GVK EMRI, la dawa ruh ba ka dei ban shim ia ka kam ba ki trei kum ka kam ba kongsan bad kaba kordor (essential service).

“Ngi dawa ba dei ban niew kongsan bad kordor ia ki nongtrei jong ka da kaba siew ha ka dor ba biang, thung kam khambun, phah trei kat kum ki por bad ki kynta ba ia treilang kiwei ki nongtrei sorkar bad ai ia ka hok sha ki nongtrei ka GVK EMRI kumba ioh lang kiwei ki nongtrei sorkar,” la ong u bah Kharjahrin.
Na ka liang katei ka seng, kan sa shong pyrkhat ha kine ki sngi ban wan ban ia kren sani bha halor ka jinglong jingman ka emergency & ambulance service ha ka jylla bad kumba la iohi ba ha kylleng ka Ri India, ka Judiciary ka shim khia bha ia kane. Kumta, na ka liang ka seng ruh kan sa pyrkhat ban ujor noh da ka Public Interest Limitation (PIL) sha ka meghalaya High court lane wat sha Supreme Court halor ka kam emergency & ambulance service ha Meghalaya.

Shillong: Ha ka jingjia ba sangsot ,uwei u heh shipai suin jong ka ka Eastern Air Command (EAC) ha Upper Shillong u Shailesh K. Pandey, u la duh ei kha makha ia la ka jingim namar ba u la hap na jrong ka sharing lum, katba ki dang leit iaid kai sngewbha bad ki paralok jong u ha ka jaka badon ha Laitlum haka sngi U Blei.

Ia katei ka jingjia la leit iathuh mar mar sha ki pulit, ha katei hi ka janmiet jong katei ka sngi bad mynta ka sngi naka liang ki pulit ryngkat bad ki kynhun iarap ki la sdang ban leit wad iaka met jong utei u lanot naduh ka por 9.15 baje mynstep,ha kaba ki la ioh pat ban tam iaka met haduh ka por 3.45 baje janmiet.

Jowai: ‘Kiar na ka jingdih sikret, kyiad bad drugs bad ruh kiar na ka jingpynjot ia ka mariang, kadei ka khubor kaba paw ha ka lehniam Behdeinkhlam ka Sein Raij Tuber kaba saw sngi bad kaba la kut noh hynnin ka lah sngi U Blei ha Pung Kyntang kaba khot ka Biar Blai kaba don ha Tuberkmai Shnong.

Ka lehniam Behdeinkhlam jong ki Niamtre ha katei ka thain ka dei kaba heh tam ha Jaintia Hills. Ka kynthup haduh 29 shnong bad la wanrah haduh 67 tylli ki Rong lane ki Rot da kaba tam palat shah ia kiwei pat ki Sein Raij.
Ka Khliehriat Sein Raij kaba don shabar na ka Sein Raij Tuber mynta ka sngi ka la wanrah iala ka Rong ban iashim bynta shongsit ha katei ka lehniam Shad Behdeinkhlam lane kiba ki Tuber ki ju khot ka Shad ‘Naisan.
Mynta ka sngi ki kynrem ki lyndang kiba bun naduh ki MDC, MLA bad ki Myntri sorkar nalor ki sahep sorkar bad riew pawkhmat na ki thain bapher bapher ki la wan ban sakhi ia katei ka lehniam ha katei ka jaka.
Ki riew paw khmat ba kyrpang eh ki kynthup ia u Myntri Rangbah ka jylla u Conrad Sangma, u Myntri ka tnad PHE u ma Sniawbhalang Dhar bad u Myntri ka Social Welfare, u ma Kyrmen Shylla (local MLA) ha ryngkat u Chief Executive Member ka JHADC u ma Thombor Shiwat.
Haba kren ai khublei ia ki paidbah ka Sein Raij Tuber, u Myntri Rangbah ka jylla u la ong ba ka sorkar jylla ka la ialeh shitom katba lah ban pynneh pynsah ia ka jinglong tynrai ki paid Riewlum ha kane ka Jylla. Ki jinglehniam bapher bapher katkum ka jingngeit u longshwa man shwa kadei ka tynrai jingithuh ia ka jaitbynriew bad ka sorkar ka dang sngewsarong eh halor kum kine ki program lane ki lehniam.
Na ka liang ka Sein Raij Tuber ka la aiti ruh ia ka dorkhas jong ka sha u Myntri Rangbah hynrei na ka liang u myntri rangbah um shym la kren eiei halor katei ka dorkhas kaba kyrpad ia u ba iarap pynbha ia ki sawdong sawkun jong katei ka Pung Kyntang.
Ka Sein Raij Tuber lyngba u Longdoh uba dei u khlieh jong ka niam ha ryngkat ka jingiarap ki Maji, ki Sangot, ki Dulhia bad ki Shutia ki la pyndep ia kiba bun jait ki lehniam leh rukom ha kine ki saw sngi lai miet.
Mynta ka sngi khadduh ka lehniam la pyndep ia ka lehniam ba kyrpang kaba kynthup ia ka Iatan Bhang, – ka jingiatan tylli da u dieng ar shakap hapdeng ki paid ka phang shathie bad ki paid kiba na ka thain Shatei- lane kaba ki ong ka Phang Wah bad Phangnein.
Ha kane ka lehniam jingiatan Dieng Bhang, la jop ka Phang Nein kaba pyni (katkum ka jingngeit) ba u kba u khaw, ka rep ka riang kan kham bha sha ka phang Shathie (phang Nein).
Kaba kadduh pat ka lehniam kadei ka jingia ‘Slait’ kaba ia syriem bad ka jingiakhun Wrestling.
Ia kane ka lehniam Iaslait la pyndep hadien ba la dep bret lut ba baroh 67 tylli ki Rong kiba mut ki Rot ha ka ktien ki nong Jowai.
Ka lehniam Behdeinkhlam ka dei ka lehniam kaba ju pynlong man la u snem hadien ka rep ka riang bad la ngeit ba lyngba kane ka lehniam lah ban beh ia ki ksiud ki khrei, ki jingsniew ba har rukom na ka imlang ka sahlang bad ruh ba u Blei un da un sumar ia ki jingthaw ba kordor ban lait na ka jingpang khlam ba har rukom kiba lah ban wan lyngshop ia ki shnong ki thaw hapoh ka raid ka muluk.
Ha kine ki sngi ka Khlam ka long ka jingpynjot ia ka mariang, ka jingsarong, ka jinglalot bad khwan-myntoi nalor ki jingsniew kiba kynthup ia ki jingdih pynbuaid ba bunjait bad ruh ka jingibein ia ki ba rit bor.
Ka Behdeinkhlam ka Sein Raij Tuber mynta ka sngi ka la long shisha kaba iphuh ipheng bad la wan ban sakhi da ki paidbah na kylleng ka ri lum Jaintia bad Khasi kiba ym duna ia ka 15000 ngut eiei.
Ki Rong kiba la wanrah ban bret sha Pung ki wan ha ryngkat ki khubor bapher bapher kiban ai jinghikai ia ki khun ki raiot ba ki dei ban kiar na kita ki jingsniew kumba la sneng la kraw da ki Rongs ba la wanrah sha ka Biar Blai.

Shillong: Ki Executive Member jong ka kyntoit Mawlyndep, Sohryngkham bad ka Mawlyndep Sports & Cultural club ryngkat ka seng long kmie mynta ka sngi, hapoh ka jing ialam u Rangbah Kyntoit jong ka Dong Mawlyndep Bah W.Nongrum, ki la lah ban pynlong ia ka jing pynkhuid shnong, kum shi bynta ban pynkhuid ia ka Kyntoit Mawlyndep ban lait na ki jing jaboh khnang ba ka kyntoit hi kan long ka ba khuid ba suba, ka jing khuid ka long kaba don kam khnang ban lait na shibun ki khniang jing pang.

Shillong: Ka Synjuk Ki Khlieh Nongsynshar, Ki Trai bad Nongtrei Parmaw Par Shyiap,Ri lumpdeng, East Khasi District kynthup ia ka thain Mylliem, Elaka Laitkroh, Elaka Laitlyngkot bad kiwei de ki Shnong kiba hap hapoh ka Sohra bad Pynursla Civil Sub-Division, ki kyrpad ia ka Sorkar ban pyllait noh ia ki par maw par shyiap, kiba pyntrei da ka kti briew tang da ki lyngka ki tyrnem, khlem ki mashine ne ki kor ki bor ka juk mynta na ka ain Meghalaya Minor Minerals Concession Rules (MMCR) 2016.

Ia kane ka jingialang la pynlong myn hynnin ka sngi ha iing Dorbar jong ka shnong Mawkdok.

U General Secretary u bah Egenstar Kurkalang u la ong ba, ki paidbah ki mynjur pat de ban iatrei lang bad ki Dorbar Shnong bad ki bor Sorkar ban bud ryntih ia ki kyndon bad ki jingbthah na ki bor ba dei khmih ban pynneh pynsah iaka mei mariang, ban sumar ia ki umbam umdih, ki wah ki phud sait jaiñ, ki lyngkha rep ki nala um ki surok kali ban ym pynjot pathar iaki lum ki wah bad kiwei kiwei ki jingdonkam ki paidbah naka bynta ka bit ka biang lang haka imlang sahlang.
Ia ka jingialang la pyniaid da u Bah W. Nongrum Sordar Shnong ka shnong Mawkdok la ai jingkren maitphang da u Sordar barim ka Shnong Swer u Bah Soldron Nongrum bud sa ka jingkren jong u president jongka Synjuk Bah Pailastar Kharkongor ha kajuh ka por u ba dei u Sordar Elaka Laitkroh bad la kren khadduh ka jingkren jong u Bah Egenstar Kurkalang u ba dei ruh u General Secretary jong ka Synjuk.
La ioh ruh ia ka jingai jingmut jong ki Sordar bad Rangbah Shnong kiba don haka jingialang kumjuh naki paidbah nalor ka jingdon lang u Sordar Elaka Laitlyngkot, ki Sordar Shnong ki Matabor, ki Rangbah Shnong bad ki riew rangbah bad kumba 500 ngut ki paidbah jong kiba bun ki shnong katei ka Thain.
Ki paidbah jong kane ka thaiñ kiba iatyngkhuh jingeh naki jingkhang tih maw tih shyiap ba la pynjari lyngba ka Forest Department jongka Meghalaya, ka la wanrah ia ki jingeh kiba khraw ia ki hajar tylli ki long iing,haduh ba kim ioh shuh ban siew bai skul khun, kim ioh bai siew bai tda kumjuh ban pyndap ia ka bam ka dih ne ia ki jingdonkam ha iing ha sem namar ki la ia shong khlem kam khlem jam,namar kiba bun ki paidbah kane ka thaiñ ki dei kiba juh im daka jingbylla tih maw tih shyiap.
Lyngba kane ka jingialang pynpaw ruh ia ki jingeh ba khraw ban bud katkum ki kyndon jong ka Meghalaya Minor Minerals Concession Rules (MMCR), 2016 ba ki nongtrei maw ne nongtrei shyiap ki dei ban ioh ia ka Mining Lease ne Quarry Permit, namar kiba bun hi ki paidbah ba duk ba rit baria ha ki par kiba rit kiba pyntrei da ka kti khlem ki Machine ne ki kor ki bor ka juk mynta kim lah kot bor ia kiba bun ki jingsiew ne ki jinglut,bad kim sngewthuh hi ruh ia kane ka rukom bad lehse kane kan ktah ruh ia ka hok laitluid jong ki trai halor ka khyndew ka Shyiap.

Shillong: Ka jingialang jong ki Dorbar Kur Khasi hapoh ka lama ‘Steering Committee jong ki Dorbar Kur’ kala phah shithi sha u CEM ka KHADC haka 19tarik Naitung 2019,halor ka jingialang ba la pynlong ha ka 3tarik Naiwieng 2018, ha ka Hall jong ka Bharat Scouts and guides ba la leit ban iashim bynta da ki Rangbah kur jong ki kur khasi bapher bapher.Bad kumba 40 kur tam ki la wan bad pynlong ia katei ka jingialang bah.

Dei namar ka jing i donkam ban ia pyrkhat halor ka Amendment bill jong Khasi Social custom of Lineage Bill 2015 bad 2018 haba la ioh jingtip ba ka KHADC ka la pynkhreh ruh sa ia ka Clan Bill,namar hadien ba la peitbniah, la shem ba kitei ki Amendment jong ka Lineage Act kin iatyngkhuh bad ki kam jong ki kur.Bad hakatei ka jingialang ,ka komiti ka la rai ban ai jingmut lang sha ka District Council bad ban kyrpad ba kan buh ha ki rynsan paitbah khnang ba ki kur kin iohlad ban kdew ban ai jingmut ha shwa ban pynlong ain iaka.
Katei ka jingialang,ka la rai ruh ban aibor ia ka Steering Committee ban peit bad ai jingmut sha ka KHADC lada donkam bad ka la leit rah ruh iaka jing kyrpad ha u CEM jong katei ka por ban aipor ia ki kur bakin ioh ban iathir bha iaka tei ka Bill,hynrei, kim shymla ioh jubab eiei,hynrei,ki la kynnoh, ba la rah beit beit sha ka Iing Dorbar ban pass ia ka.
Ka tei ka komiti, ha kane ka kynti jong kane ka EC ba mynta,ka la ioh ban peit biang iaka tei ka Bill 2018, ryngkat ka jingtwad jingmut lem naki riew rangbah bad naki longkmie kiba sngewthuh shaphang ka kur ka jait,ki la phah ki jingai jingmut bad ki mat kiba ki idei ban don hakatei ka amendment bill 2018 bad bankhmieh bniah ha shwa ban pynlong ain iaka.
Shuh shuh,ki la kyrpad ruh ban ai por ia ki ba kin thir bha bad ban ai iaki jing ai jingmut jongki na ka bynta ka Khasi Social Custom of Lineage namar ba ki dang don hapdeng ka jingpynkhreh, ong ka kyrwoh ba la ai lyngba ki nongkitkam ka Steering Committee jong ki Dorbar Kur,kata u bah K.Ryntathiang Chairman bad u bah H.S.Suting Genl.Secretary katei ka committee.

U Vin Diesel, 52, ula mynsaw hynnin ka sngi, haba ula hap na ka jingjrong kaba haduh 30 phut, katba u dang ak ia ka phlim Fast & Furious 9, kaba dei ban pynmih la shem snem.

La iathuh ba ka jinghap U Diesel, ka long ha ka por, ba u ak ia ka phlim, kaba u dei ban hap na ka jingjrong kaba 30 phut bad ba u don uwei u cable, uba u dei ban bat, hynrei la sngewthuh ba utei u cable, ula synjor bad U Diesel, ula hap da ka khlieh sha madan, ha ka por ba u ak phlim ha Warner Bros Studios, Leavesden.
La kit mar mar ia U Diesel sha Royal London Hospital, na ka bynta ba un shah sumar.

U Boris Johnson, ula shah jied mynta ka sngi, kum u myntri rangbah duh ba thymmai jong ka England, ha kaba ula pynliem ia U Jeremy Hunt.
U Boris, uba dei u nongialam ba ha khlieh duh jong ka seng Tory, u hap ban pynurlong ia ka 100 sngi, ba ka Britain, kan hap ban mih noh na ka European Union, lane ha ka 31tarik Risaw 2019.

U Boris, ula kren shai mynta ka sngi, ba un pyn urlong ia ka Brexit ha shwa ka 31tarik Risaw 2019.

U Johnson, u jop da 66.4 per cent na ki dkhot jong ka seng Conservative, katba U Hunt, u ioh 33.6 percent.
U Boris Johnson, u shimti ia katei ka shuki hadien ka jing iehnoh kam jong ka Theresa May, kaba dei ka myntri rangbahduh barim jong ka England.

Shilong:Ka Public Accounts Committee ka la lum ia ka jing ialang ba kongsan ban ioh jingtip ia ki rukom trei kam ki tnad ba pher ba pher mynta ka sngi, kum juh ruh ka PAC ka la pan jing khein na ki tnad bapher bapher.

Kat kum ka kaiphot ba la pynsngew da u Zenith Sangma, u wei na ki dkhot jong ka PAC u la iathuh ba baroh ki shnong bad ki longiing kiba don ha ka jylla ki dei ban ioh ia ka bor ding ki ba dei ha Khasi Hills, Jaintia hills bad Garo hills.

Ha khasi bad Jaintia hills la don haduh 2211 ki shnong ha kaba 1546 tylli ki shnong ladep pynioh ia ka bor ding katba ha Garo hills pat ladon haduh 2748 tylli ki shnong bad la dep pynioh ia ki 1923 tyll ki shnong kiba la ioh ia ka bording. ki basah kin sa pyndep lyngba ka “Subhagyas Mission” Ka jing thmu jong ka sorkar ka long ban pynpoi bording ia ki 6000 tylli ki shnong.

Halor ka tnad kam jngoh kai pyrthei u H.M Shangpliang u la iathuh ba ki don ki jaka ki bym shem la pynseisoh eiei ia ka jylla kum ka jaka lehkai golf ha ka shnong Pongtung kaba don hapoh jog ka shnong Pynursla kaba la dep ban tei ia katei ka jaka leh kai haduh 2.klur tam, hynrei haduh mynta ruh kim pat lah ban pyndonkam ia ka bad ka long tang ka jing pynlut ia ka pisa bad kawei pat ka long kum ha Sohra ruh ki don ki jaka kiba ki shu shna khlem da pyndon kam ia ki.Na ka liang ka PAC ka la ai por ia ka tnad ba kan pynkhreh kumno ba kan pyniaid kam ia kine ki jaka ki ba ki la dep tei. La kyrmen ruh ia ka Crowborough Hotel ba kin lah ban pyndep bad ban plie noh ha u snem u ban wan namar ka la slem palat.

Ha kaba ia dei bad ka tnad ka koit ka khiah, na ka liang ka PAC ka la pynpaw ba ha Ganesh Das Hospital, ki tiar ki dawai baroh ki la biang lut ban sumar ia ki long kmie ki ba wan ban kha khyllung bad ki ba wan ban sumar ia ki khyllung ha ka hospital.Ka tnad ka don jing thmu ba kan thaw ia ka NICU na ka bynta ki khyllung bad kumjuh ruh ka ICU na ka bynta ki kmie, ynda lada dep ka iing thymmai ha u bnai Nohprah 2019.Na ka liang ka DHS kan wan rah shuh ia ki briew ki ban trei ha katei ka tnad.

Ha ba iadei bad ka tnad PWD ka tnad ka la pynshai ba ia baroh ki surok ki jingkieng ki ba la shah pynjulor ha u slap kin pynbha noh khamtam ia ki surok ha Mawsynram,Mawshun. Ia ka surok kaba dei na Trongpleng haduh Dangar la dep pyllait ia ka pisa kaba 4.5klur.

Ka tnad ialehkai ka la pynshai na ka bynta ban pynlong ia ka National Game 2022 ki jaka ki ban pyndonkam ki long ba ha Shillong bad Garo hill na ka liang ha Shillong ki la iaid shakhmat, hynrei na ka liang ha Garo kim tip katno ruh ka jaka ki donkam.

Ha shwa ban pynlong ia ka jing ia tynjuh bor ha iing dorbar, U HD Kumaraswamy, myntri rangbah ka Karnataka, ula kren shai, da kaba ong “Hynnin ka sngi, ka telebishon channel, ka pynmih khubor, ha kaba ka ong ba ka sorkar Jylla, ka sdang sa ka jing pynduh ding ilektrik.

U myntri rangbah, u pynmih ia ka jingshong dum. Ka bha ia nga, ba ngan long myntri rangbah bad katei ka jait syrnot? Mynta nga la khreh ban hiar shuki, da kaba suk mynsiem” ong U Kumaraswamy.

U Rahul Bose, uwei na ki aktor ba paw jong ka bollywood, ula sah ha ki khyndiat sngi ba ladep, ha ka hotel ha Chandigarh bad hadien ba ula dep ialehkai gym, ula kwah ban bam kait bad ula pan ar tylli ki kait, hynrei, ula kyndit ba ka dor jong kitei ki kait ka long T.442.50 pisa.

U aktor jong ka phlim Dil Dhadakne Do, ula lyngngoh bad ula pyni sha ki nongbud jongu, ia katei ka bai kait, kaba u hap siew ha katei ka five star hotel. La iathuh ba katei ka bai kait, ka don ruh sa ka GST, ba u hap siew u aktor, uba 51 snem ka rta.

Ka Lok Sabbha, ha ka Sngi Hat majai, ka la mynjur ban pynkylla ia ki ain kiba iadei bad ki nongniah kali bad katei ka trei kam, na ka bynta ban dain kuna, ia kito kiba pynkhein ia ki ain niah lane kaba la tip kum ka Motor Vehicles (Amendment) Bill 2019. Katei ka ain, ia mynta kam pat trei kam, namar ba kan hap ioh ruh ia ka jing mynjur jong ka Rajya Sabbha.

Ki kyndon ki long kumne harum –

U Maxim Dadashev, ula khlad noh, na ka jing mynsaw kaba jur, na ka jing ia kura pyrshah ia U Subriel Matias, ha ka Sngi Thohdieng ba ladep. U Dadashev, u don 28 snem ka rta.

U Dadashev, uba dei u nong Russia, ula shah sumar kyrkieh, halor ka jingshitom kaba na ka jabieng jongu, hadien ba ula shah pynrem ha ka jingiakhun IBF light welterweight ha ka round kaba 11 ha Maryland.
U nonghikai jong U Dadashev, U Buddy McGirt bad U Donatas Janusevicous, ki iathuh ba ka jingkhlad U Dadashev, ka dei hadien ka jing ia kura ha ka miet Sngi Thohdieng.
La iathuh ba ka shyieng kaba sha ka mon jong U Dadashev, ka la kynriah bad katei ka ia tyngkhuh bad ka jabieng bad ka pynmih ia ka jinglang snam. U nongialehkai ka Russia, u shah rem ha ka kylla kaba 11 jong ka jingialeh, haba ula shah kura bunsien.

Ka Priyanka Gandhi Vadra, ka la kyntait ban shimti kum ka nongialam ba thymmai jong ka seng Congress.
Ka Priyanka Gandhi, 47, ka kyntait ba kan shim ia katei ka kam, kaba ha khlieh jong ka seng bad ka kwah ba kan trei ha kane ka kyrdan kaba ka bat mynta.
La iathuh ba ka jingleit jongka, ha ki khyndiat sngi ba ladep, ban ia kynduh ia kiba ha iing jong kiba shah pyniap ha Sonbhadra, kaba ha Uttar Pradesh, ka pyni ba ka dei ka riewnud ban ia pyni bor bad ki kynhun pyrshah. Ka Priyanka Gandhi, ka la sah miet ha ka iing sorkar, haba ki bor District, kim shym la shah ba kan leit sha katei ka shnong, ha kaba ki la don 10ngut kiba shah siat iap, na ka jing ia kajia khyndew.
La iathuh ba ka seng Congress, ka la tyrwa sha ki nongialam kiba don ha ki Jylla, ki myntri rangbah bad ki dkhot ka Working Committee, ba kin jied ia u nongialam thymmai bad ha ki envelope, ba la phah sha ki nongialam seng ha Delhi, ki don ki kyrteng jong U Mallikarjun Kharge, U Sushil Kumar Shinde, U Digvijaya Singh, ka Kumari Selja, U Mukul Wasnik, U Sachin Pilot bad U Jyotiraditya Scindia.
Haduh mynta ka seng Congress, kam pat kwah ban jied kyrkieh ia u nongialam jongka bad la iathuh ba kan ap, ba un wan phai U Rahul Gandhi, uba don mynta ha America, ha shwa ba kin shim ia ka rai kaba thymmai. La sngethuh ba ia mynta, un don shwa u President ba shipor bad utei un shimti ban jied ia u nongialam ba pura jong ka seng.

Shillong: Ka HYC War Jaiñtia Circle mynta ka sngi, ka la leit jurip ia ka Nongtalang CHC Hospital hadien ba la ioh jingujor na u paidbah.
Ha katei ka jingleit jurip hapoh ka jingialam u Sport Secretary u Bah B.Shylla, ryngkat ka jingsynran lang ki nongkitkam ka HYC Jaiñtia Hill, u President u Bah Mewst Rabon, u General Secretary, u Samla Romingstar Lamare, la lap ba ym shym la don doctor satia lait noh tang kawei ka Doctor Kynthei. Hadien ba ki dkhot ka seng ki la ap 2kynta tam ban ioh ban iakren bad katei ka doctor, hynrei kam shym la treh satia ban iakren bad ka seng.

Shuh shuh ka seng ka la lap ia ki sawdong sawkuiñ katei ka hospital, ba la dap da ki jaboh kiba ijli, wat tang ban peit ruh bad katei ka la buh jingma ia ki nong wan thiah pang. Ym tang katta ka seng ka la lap ruh ba ki paiñkhana paidbah kiba don shapoh hospital kim don wat ia ka jingkhangbah ruh. Kumjuh ruh wat ki paiñkhana kiba don ha phyllaw katei ka hospital kim treikam satia, namar ki bor pyniaid hospital ki khang tala ia ki.

Shuh shuh ka seng, ha kine ki sngi ba la dep, ka la ioh jingujor na u paidbah halor ka jingleh mon u doctor Bniat u ba trei ha katei ka hospital, ha kaba u wan trei tang kumba shiteng kynta ne duna shi kynta ha ka shisngi namar u ialeh ban iabeh sha ka clinic lajong. Haba ka seng kala leit jurip mynta ka sngi la lap shisha ba utei u doctor bniat um don ha ka kamra treikam hapoh katei ka hospital.

Shillong: Mynta ka janmiet ka KSU Mawprem circle ryngkat ka KSU Upper Shillong circle,ki la ialeit khynra ia ki nongdie bad nongdih drug ha ki thain Jhalupara bad cantonmen area bad la ioh kem kumba shiphew ngut ki nongpyniaid iew ia u ne u mar bad ryngkat bad ki tiar. Hadien kane la aiti noh sha ki pulti jong ka Jhalupara.

Shillong: Ka seng KSU Mawprem circle ka leit noh synñiang da ka song pisa ba T.10,000 hajar ia ki jingtrei ïingmane Katholic Mawprem Parish. Ha katei ka jingleit la ialam u samla Aresstone Thabah, kum ka dak ka jingdap ka jing rakhe ia ka lyngkhuh sngi iap ba 184 u paiem Tirot Sing syiem.

Shillong: Ka Daranggre Nokmas Welfare Association jong ka thain Nongalbibra, ha South Garo Hills, ka la leh burom mynta ka sngi, ia U Conrad K Sangma, myntri rangbah ka Jylla, namar ba ula jop ia ka thma jingkhang dewiong jong ka National Green Tribunal (NGT).

La pynlong ia katei ka jingialang ha Pathalgittim jong ka Nongalbibra, ha ka jingdon ryngkat U Ma Lahkmen Rymbai, myntri ka pule puthi, U Thomas A Sangma, Adviser jong u myntri rangbah, U Marcuise N Marak, u shabuk sorkar, nangta U Bah Macmilan Byrsat, Bah Pius Marwein, U Jigur Myrthong baroh lai ngut ki MLA bad nangta sa ki Deputy Commissoner jong ka South bad ka East Garo Hills District.
Haba kren ha ka jingialang paidbah, u myntri rangbah, u ong ba ka sorkar, ka la ioh ia kaei kaba ka la kular sha ki paidbah ka Jylla bad ula ong ruh ba mynta, ym don shuh ka jingkhang dewiong. Ula ong ba ha jingkhang dewiong, u paidlang ka jylla, ula mad ia ki jingeh kiba har rukom, hynrei ka sorkar Jylla, ka la iakhun dohiap, na ka bynta ban weng ia katei ka jingeh ba ki paidbah kin kiew ka kamai kajih.
U Conrad, u ai burom ia ka jingtrei shitom U Amit Kumar, U Advocate General, lem bad ka kynhun jongu, u myntri rangbah ka Jylla, ula ong ba ia ka dewiong, kaba la tih beain, yn die da ka Coal India Limited, kaba long katba kum ka ain jong ka MMDR Act, 1950.
U ong shuh shuh ba ia ka jingkhang dewiong la weng noh bad ia ka jinglong trai ia ka khyndew ka shyiap la pynneh. U myntri rangbah, u ai burom ia ki nongkhaii dewiong ha Khasi, Jaintia bad Garo Hills, ba ki la ia trei tyngeh ban iakhun ia ka jingkhang dewiong ka NGT.
Nalor U Karnesh N Sangma, President ka Daranggre Nokmas Welfare Association, uba la kren, ki la don kiwei ruh kiba shim bynta ha ka jingkren ha katei ka sngi bad kitei ki kynthup ia U Ma Lakhmen Rymbui, myntri ka pule puthi, U Rakkam A Sangma, MLA Rongara-Siju, U Amit Kumar, Advocate General bad sa shibun kiwei de.

Shillong: “Shi lak ka pisa ki siew ha ki Rangbah Shnong la ioh NOC ki bar jylla ban thied jaka ha khappud” la ong ka President ka Mahila committee, ka Ringku Moni Marak jong ka shnong Pillagatta, kaba hap ha ka Killing Ribhoi District, ha ki nongpathai khubor mynta ka sngi.
U Dilip Sangma u Rangbah Shnong ka shnong Abir u la ong “Ha u bnai lber ka Kaikha Saprina, ka pynbeit ban die ia ka jaka ha ka shnong Abir ha ki briew ki ba dei na ka jait bynriew Naga kiba thmu ban thied ia ka jaka jong ka kong Kaikha, kumta ki la pynbeit ia ka jing ia lang bad nga ha ka sien ka ba ar ki wan ban pan NOC hynrei nga la kyntait ban ai NOC ba kim dei ki nong Meghalaya. Nga la leit ong ia u Syiem ka hima Marwet na ka liang u Syiem ruh ym shem la shah ban ai NOC.”
U Dilip u la bynrap da kaba ong “Ka sien ba lai ki wan katba nga dang shong ha baranda. U Prof.ka Nehu u Zavier Mao ryngkat bad ki briew jong u ki la wan biang bad ki la pan biang ia ka NOC namar ba ngam ai. hynrei ki ki la byrngem ia nga.Hadien ka 4 sngi ki la wan bad ki tyrwa da ka pisa ia nga hynrei nga la kyntait ban ai NOC.”
“Ngi ki briew ki ba sah ha khappud ngi sah ha ka jingshongsyier ba kine ki briew kiba dei ki nong Naga ki la wan ban byrngem ia ngi ba kin shim ia ka jingim jong ngi lada ngim ai ia ki jaka jong ngi ha ki bad na ka liang jong nga haba nga la leit ban ia kren ia ki,ki la ong ia nga ba ngam dei ban kren eiei ba ngi la dep ai 5 lak ia u Deputy Syiem jong u Syiem ka Hima Marwet u bah Biko Syiem ryngkat bad u Robert Sangma. Ka jing thombor jong ki jait bynriew Naga ki pan NOC lyngba ka jingbyrngem byrsit ia ki nongshong shnong ha ki thain Killing, kaba dei ki jaka khappud bad ka jing ioh NOC ka long tang na ka daw ba ki don katto katno ki Rangbah Shnong ki ioh shi lak kawei ka NOC” la ong ka Predident ka Mahila Commitee ka Ringku moni Marak
Na ka liang ka trai jaka ka Kaikha Saprina, ka la dep aiti ia ka jaka ha ka shnong bad na ka liang ka shnong, ka la pynpaw shai ba ka jaka ka dei jong ka raid bad ym shah ban die iano iano ruh, lait noh ia ki trai muluk kiba dei ki khasi bad Goro.
Na ka liang u Dilip Sangma u buh ruh ka jingkyrpad ia ki briew ba halor ba kin iarap bad ban peit lang ia kine ki jingjia ha kaba ma u bad ka ing jong u ruh kam shong shngain shuh.