Shen yn rai ka bor District, la yn khang ne plie biang ia ka skul St.Peter’s

Shillong,15 Iaiong:
Mynta ka sngi ki heh jong ki tnad sorkar bapher bapher ki la leit ban jurip ia ka St.Peter’s Higher Secondary School ban peit hato la katei ka skul ka dang long ne em, kaba bit ban dang pynlong skul ha katei ka juh ka jaka. Katei ka jingleit jurip ka dei ban peit hato la ka long ne-em kaba shngaiñ ia ki khynnah skul ba kin bteng ia ka jingleit skul jong ki ha katei ka jaka bad ia ka ripod jong ka jingleit jurip shen ka bor District jong ka East Khasi Hills kan pynmih ia ka hukum ba khadduh jong ka.
Ki tnad sorkar kiba la leit ban jurip ha katei ka sngi ki la leit ban ring dur ban shondur ia katei ka skul kaba ing khong bad ia ka ripod jong ka jingleit jurip jong ki kin sa phah sha ki heh jong ka tnad jong ki bad katei ka ripod kan poi sha ka u Deputy Commissioner ka East Khasi Hills ban ia nujor ia baroh ki ripod ba la lap bad ba un pynmih ia ka rai la yn khang ne yn plie ia katei ka skul.
Ki tnad sorkar kiba laleit ban jurip ki la leit ha la ka jong ka jong ka bynta, don kiba la wan ban peit beit thik ia ka ing ne ka Building, don kiba la wan ban peit beit thik tang ia ka bording bad don ruh kiba la wan ban peit la katei ka jaka ba ka skul ka ieng ka long ne-em kaba bit ban dang bteng ia ka jingpynlong skul.
Ki tnad sorkar kiba la wan ha katei ka jingleit jurip ki kynthup ia ka Majistor ka T.S.R Marak ka EAC,Shillong, u bah P.Dkhar u Executive Engineer PWD Electrical Division,Shillong, u R.Sohkhlet T.P.OMUDA/EE, u bah F.B Chyne u EE ka Shillong Municipal Board, u B.Khongwir JE Area III, R.L Kharkongor Area Manager Area III (MeECL), bah Khraw K Syiem Secretary Shnong ka Cleve Colony, bah L.Buhphang na Cleve Colony ka jaka ba katei ka skul ka ieng bad u bah N.Thohrem u Officer Incharge ka Laitumkhrah Beat House.
Haduh mynta ym pat tip kaei ka ripod ba kitei ki heh sorkar kin leit ban ai sha ka ophis jong ki, hynrei katkum ka dak kaba paw na ka jingiakren jong ki la sngewthuh ba kin ai da ka rong saw na ka bynta ban plie biang ia katei ka skul naba ki la shim ba kan ym long kaba shngaiñ ia ki khynnah skul ba kin leit shong ha katei ka juh ka bynta jong ka iing kaba la pluh.
U nongthohkhubor uba la leit ryngkat bad kitei ki heh sorkar ha ka jingleit jurip jong ki u la sakhi ba hapoh ki kamra katei ka skul ki waiar bording bun kiba la ingkhong, ki jaka ba shong klas ki khynnah ka long kaba iap op naba la pyndonkam beit da ki pakha bad kitei ki pakha ruh bun kiba la ingkhong lut.
Katkum ka jingbatai jong ka Majistor kaba leit ban jurip ia katei ka ing skul ka la ong ba u Principal katei ka skul u kwah ban sdang skul noh ha ka lah sngi u Blei, ka ban wan kata ha ka 18 tarik u iaiong hynrei ka la ong haba shu peit ia ka skul kam pat I iahap ban pynlong skul ha ka lah sngi u Blei, hynrei ka la ong ba dang hap ban ap pat ia ka ripod jong ka jingleit tohkit kaba yn phah sha u DC.
Haba ia kren pat bad u Principal /Headmaster katei ka skul uba dei ruh u trai u Patrick A Thorose u la ong ba u kwah ban pynlong skul ha ka lah sngi u blei hynrei namar ba ki bor tohkit na ka Distrik ki la wan u la ong ba un hap ban ap kaei ka jinglap jong ki. La kylli na u Thorose hato lada ki bor Distrik kin khang noh ia katei ka skul lada ki lap ba kan ym long kaba shngaiñ na ka bynta ki khynnah pule ha katei ka skul un leh kumno, “Ia mynta ngi dang hap ban ap ia ka ripod, hynrei lada ki khang te ngi ruh ngi la don hi ka jingpyrkhat na ka bynta ki khynnah skul ba kin ym duh ei ia ka jingpule jong ki mynta shisnem, mynta phi la iohi la poi sa u bnai iaiong, shaei kin leit ki khynnah, ngi la pyrkhat hi ban wad jaka noh shawei shipor mynta kat bym pat biang ki jingdonkam baroh” ong u Thorose.