40 snem tang ka surok khyndew, ong u MDC Mawkynrew

Shillong,15 Iaiong:
La 40 snem mynta ki paidbah ka thaiñ Mawkynrew ki la ia kynduh jingeh tang na ka daw ka jingbym biang ka surok kaba long u budlum ha ka ioh ka kot jong ki. Kumba long haduh mynta ki paidbah na ki 5 tylli ki shnong kim shym la ioh surok rong haduh mynta ruh wat la ka jingdawa jong ki ka lalong na ka por sha ka por.
Kitei ki 5 shnong ki kynthup ia ka shnong Madan Thangsning, ka Mawber, ka Synñia Sya, ka Umsning bad ka Tangling, kitei ki shnong ki dang hap ban iaid lynti lyngba ki surok khyndew kiba khohruh khohram kaba pynkynduh jingeh ia ki khamtam ha ka por lyiur. Halor katei ka mat ki nongialam shnong kitei ki 5 shnong ba kynthup naduh ki Sordar, ki Rangbah Shnong, ki Secretary shnong kiba la don kumba 20 ngut eiei kiba la ialam da u MDC jong ki u bah Banteidor Lyngdoh ( bah Paidang) myngta ka sngi ki la leit ban ia kynduh ia u myntri ka tnad PWD u Ma Sniawbha lang Dhar ban kyrpad na un pynioh surok noh kham kloi ia katei ka shnong.Haba ia kren bad u bah Paidang hadien ka jingiakynduh jong u ryngkat ki nongialam shnong ia u myntri u la ong ba katei ka jingleit dawa surok rong kam dei shuh ka sien kaba nyngkong hynrei wat ha ka por shuwa ba un long MDC ruh u la leit ban tied jingkhang na ka por sha ka por bad haduh kane ka khyllipmat ruh kaba u la long MDC la ar snem mynta. U la ong ba ha ka jingiakren u myntri PWD u la ong ba ym shym la lah ban pyndep kloi ia katei ka kam namarba ka sorkar jylla ka dang hap ban ap pisa na ka sorkar pdeng bad kam don pisa nalade , u la ong ruh ba u myntri u la ai ka dak kaba jyrngam ba shen kitei ki shnong kin sa ioh surok rong noh bad na ka liang jong u ruh u la ong u hap ban iai shah namarba ha ka jingtreikam ka shimpor ia ka bui, ba kan iaid lynti na kawei ka kamra sha kawei pat.