Shillong, 9 Rymphang: La 8 snem mynta ka Reliance Mobile kompani kam shym la lah ban siew ia ka pisa jong u bah Bakongsan Khar kongor uba dei u kon traktor uba shong ba sah ha Bañiun, Upper Shillong. Utei u rangbah u la shim kontrak ban pynieng ia u Tower Mobile jong ka Reliance uba don ha Nongshyrngan, Pynursla, u la trei ia katei ka kam ha u snem 2008 bad u la pyndep ruh ha ujuh utei u snem. Katei ka kam pynieng Tower kaba u la shim ka dei ka jinglut kaba T.8,06804 tyngka (phra lak hynriew hajar phra spah saw tyngka) bad haba ia kheinlang bad ka bai kit bai bah baroh ka poi T.10,34,804 tyngka hynrei T.2.28 lak tyngka la siew noh sha u kum ka bai kit bai bah, bad katei ka T.8 lak tam kaba sah um shym la ioh shuh la phra snem mynta.
U bah Kharkongor u la ong ba ha kitei ki 8 snem kiba la iaid mynta ka Reliance kompeni ka la pynkyllain ia katei ka pisa jong u ha kaba la pyn mareh ia u shiphang sha Shillong bad shiphang sha Guwahati da kaba ong ba kin siew dep noh ia ka pisa jong u hynrei haduh mynta la shu pynking ia u khlem siew shi naia ruh lait noh tang katei ka bai kit bai bah kaba T.2.28 lak tyngka. U la iathuh ba u la pyntip pulit ruh ha kaba iadei bad katei ka kam bad katba u tip u la ong ba ki pulit ki la ioh kem ia uwei u briew bad ki la ap ruh ha Pynursla ia ki heh ka Reliance ha ka por ba ki leit sha katei ka thaiñ hynrei hadien ba ki la ioh jingtip ki la phet noh na Dawki bad leit sha Shillong.
Ha kaba ia dei bad katei ka kam ka Hynniewtrep Achik N7ational Movement (HANM) kham mynshuwa ka la leit buh da ka jingthoh sha ka Reliance ba ka dei ban siew dep noh ia pisa utei u rangbah hynrei katei ka jingthoh jong ki kam shym la iaid kam kumta mynta ka sngi ka HANM hapoh ka jingialam u President Rangbah jong ka u bah Lamphrang Kharbani ryngkat ka jingiadonlang u kontrak uba dei ioh pisa u bah Bakongsan Kharkongor ki la leit ban ia kynduh ia ki heh jong ka Reliance kompeni kiba la wan khnang naduh Kolkata bad Delhi na ka bynta ban ia krne halor katei ka kam.
Ha katei ka jingiakynduh bad ki heh ka Reliance u bah Lamphrang Kharbani u la ong ba nyngkong kitei ki heh ba kynthup ia u Sumangal Changkakty (Circle Sec/ F&A Head NESA) ki la sdang ban pynkyllain ia ka jingiakren da kaba ong ba ia ka kam shna tower la shim kontrak da kawei ka kompeni kaba la tip kum ka Purekoke bad ki la bthah ban leit pan ia ka pisa na kata ka kompeni namarba utei u rangbah u la shim kontrak na katei ka kompeni bad ki la ong ruh ba kin iarap ma ki ban pyniakynduh ia katei ka kompeni. Hynrei u bah Lamphrang u la ong ba ka HANM kam shym la ailad satia bad ka la kynnoh beit ba katei ka jingsah pongding ka ram utei u rangbah haduh 8 snem dei na ka daw ba ka Reliance hi kam shim khia watla u la leit ban wad thop shi thop. Shuh shuh u la ong ba shano yn leit wad ia katei ka kompeni kaba tang ka ophis ruh kam don hangne ha Shillong.
“Ka kam ka dei jong ka Reliance, ngim tip ia kata ka Purekoke , ka dei ka Reliance ban shim ia ka jingkitkhlieh, ngi ai por 15 sngi ia ka Reliance ba kan siew dep ia katei ka pisa lym kumta ngin ithuh ia kiwei pat ki kompeni bad ngin leit ban khang tala lut ia ki Tower ka Reliance ha kane ka jylla bad ngin sdang hi ruh da kaba khang tala nyngkong ia tei u Tower ha Pynursla” ong u bah Lamphrang Kharbani haba ia kren bad ki nongthohkhubor hadien ka jingiakynduh ia heh Reliance.
U President ka HANM u la ong ba ki heh jong ka Reliance ki la kular ban wanrah ia katei ka kompeni Purekoke hangne ha nongbah Shillong hapoh ka 15 sngi ba kan siew dep syndon ia ka pisa utei u rangbah, “Ngin ap ia ka 15 sngi lym kumta ngin leit ban khang tala lut ia ki Tower Reliance. U la ong ruh ba katei ka seng ka la ia kren halor ka jingthud palat ka Network Reliance ha kane ka jylla hynrei u la ong ba ki la jubab ba ka jingthud ka dei na ka daw ba ki dang pynkhreh ban wanrah noh da ka 3G bad 4G kumba long lem kiwei pat ki kompeni bad u la ong ba ki la kular ba hapoh 2 bnai kan biang lut nadong shadong.
↧
T.10 lak ka bai pynieng tnum mobile ha Pynursla, sahram u kontrak ia ka Reliance
↧