18 tarik, yn bishar ka KHADC ia u Syiem Sohra

Shillong, 11 Jymmang:
Ka KHADC kan shong bishar halor ka jingujor pyrshah ia u Syiem Sohra ha ka 18 tarik mynta u bnai ha ka por 11 baje mynstep. La iathuh ba ha katei ka sngi la khot baroh arliang mamla ia u Syiem bad kumjuh ruh ia ki nongujor bad ia ka rai pat yn sa leit ban pynbna ha Sohra hi. Lah ban kdew ba kham mynshuwa u EM ba peit ia ka tnad Elaka u bah Latiplang Kharkongor u la ong ba ka KHADC kan bishar ia baroh ki jingujor pyrshah ia u Syiem Sohra bad lada lap ba ka long kaba shisha yn sospon ia u.
Lah ruh ban kdew ba ki la don bun ki jingujor pyrshah ia u Syiem Sohra ha District Council kaba kynthup ia ki nongshong shnong hapoh ka Hima Sohra bad kumjuh ruh ka la don ka jingujor na ka seng KSU kaba la kynnoh ba ka la don ka jingai pata khyndew kaba bun bha da u Syiem sha ki bar jylla ha Majai.