Slem ka Shillong Medical College ba slem ka jaka

Shillong, 11 Jymmang:
U Myntri Rangbah u Dr Mukul Sangma u la ong ba ka jingslem ban ioh ia ka Shillong Medical College bad ka Tura Medical College ka dei tang namar ba slem ban ioh ia ka jaka. Haba kren hynne ka sngi sha ki nongthoh khubor, u Dr Mukul u la ong ba ka Shillong Medical Collge, ka la dei ban ieng mynta hynrei namar ba slem ban kynriah ia ka TB hospital kaba don ha Mawprem, sha Umsawli sha Mawdiangdiang kaba don ka Sor Thymmai.
“Tang shu dep ban kynriah ia ka TB hospital, yn sa pyntreikam noh ia ka Shillong Medical College”,la ong u Dr Mukul bad kumjuh ruh ia ka Tura Medical College, kaba hap ban shna dur thymmai namar ba hap ban kynriah na ka jaka kaba rim kaba la thmu ban tei ia ka. Ha kawei ka liang,u la ong ba ka jingshah pynduh jingithuh ka NEIGHRIMS ia ka kyrdan Post Graduate na ka Medical Council of India (MCI) ka dei katkum ka jingshem kaba ki la leh ia ka jingbishar bad shim jingkhein bin pa bin. Hynrei kane kam mut ba la pynduh junom hynrei kin sa ioh biang ia ka jingithuh hadien ba ki lah ban pynbiang ia ki jingdonkam.
Ha kawei ka liang,haba kren halor ka jingiarap ia ki lanot eriong, u la ong ba ka sorkar ka don ka pisa ban ai jingiarap ia ki lanot eriong bad ka jingong ba kam don pisa ka dei kaba bakla. Haba kren hynne ka sngi sha ki nongthoh khubor hadien ba la wai ka jingialang, u Dr Mukul u la ong ba kito kiba la pynbiang ia ka kaiphod, lyngba ka jingujor ejahar sha ki pulit da kaba iathuh ia ki jingjia, kin sa phah sha ka sorkar ba kan pynlait ia ka jingiarap.
U la ong ba ka sorkar ka la pynlait ia ka jingiarap sha ki bank beit jong kito kiba shah ktah ha ka jingjia, ym shuh kum ha ki por mynshwa.