Shillong, 15 Nailur:
U MLA ka UDP na West Shillong u Bah Paul Lyngdoh, u la ther ia ki MLA ka Congress ha kane ka jylla kiba la lapmiet ka leit tang sha Delhi khah khah haduh ba ki Air Hostess ha Eroplein ruh ki la ithuh kyrteng lut ia ki namar ba ki leit ki wan jan man ka sngi ban kynduh ia ki heh ka AICC.
Haba shim bynta hapoh ka iing dorbar thaw ain halor ka jing bym shaniah shuh, pyrshah ia ka sorkar u Dr Mukul Sangma mynta ka sngi, u Bah Paul u la ong ba ka long kaba thamula ba ki MLA ka Congress kiba don ha kane ka jylla ha jaka ban pynleit jingmut ban leit jurip ia ki jaka ha ka jylla, ki la leit pynban sha Delhi haduh ba kim don por ban don ha jylla.
“Ki Air Hostess ki la ithuh lut ia ki MLA ka Congress na Meghalaya namar kham bun ka por ki pynlut ban kiew ban hiar na Shillong sha Delhi ha liengsuin ban kynduh ia ki heh ka AICC tang namar ba ki MLA jongka ki bunkam ban rah NC ia u Myntri Rangbah jongki”, la ther u Bah Paul.
U la ong ba kane ka pynshisha ba wat ki heh ka AICC na Delhi ruh ki la wan khari khari sha kane ka jylla namar ba ki para MLA ka Congress kila bunkam ban rah NC ia u Myntri Rangbah uba dei u nongialam jongki.
“Kaba lyngngoh ka long ba kane ka sorkar MUA-II ka don 44 ngut ki MLA ha ka iing kaba 60 ngut, hynrei ka dang don hapdeng ka jingsynjor”, la ong u Bah Paul.
U la ong ba kane ka sorkar ka lah ban don ka jingbun paid hynrei ki number kim lah ban pynthikna ia ka jingkhlain bad ka paw ba kane ka sorkar don ki nongialehkai ba pyrshang ban thep ia ka bol sha ka kol lajong haduh ba kam don por shuh ban pynleit jingmut ban trei na ka bynta u paidbah.
U Bah Paul ula ong ruh ba kane ka sorkar ka lah ban neh haduh san snem hynrei kan nym don ka jingkynmaw eiei ia ka namar ba ka shu long tang kum ki riew madan khlem ki kam ba seisoh. “Don ki briew ba im palat shi spah snem ruh, hynrei ngim kynmaw eiei ia ki hynrei don kiba im tang 30 snem hynrei ki dei ki khlaw wait bad ngi kynmaw ia ki”, la ong MLA ka UDP.
↧
Ki Airhostess ki ithuh lut ia ki MLA Congress, ong u Bah Paul
↧