Ngi pdiang sngewbha ia ki jingmut ka Liangpyrshah, ong U Mukul

Shillong, 15 Nailur:
Haba iohi ba ka sorkar kan neh, u Myntri Rangbah u Dr Mukul Sangma haba pyni nia ia ka jingshah kynthah ha ki liangpyrshah, u la ong ba ka jingai jingmut jong ki dkhot na ka liangpyrshah ki long kiba kordor ha kaba ka sorkar kan shim ban pyntreikam ha ka jingtreikam ka sorkar bad kyrpad ba kan weng noh ia ka jing tyrwa bym shaniah shuh ia ka sorkar.
Ha ka jingjubab jongu, kaba neh kumba 2 kynta tam eiei hapoh ka iing dorbar, u Myntri Rangbah u la ong ba kubur ba ka jylla ka don hapdeng ka jinghiran pisa hynrei kam poi sha u pud ban kynduh jingeh namar ba ka sorkar ka don ki buit ki lad ban thawlad ban pynlait na ka jingeh.
U la ong ba ka jingkhang dewiong ka NGT ka lah ban buh jingeh ia ka sorkar namar ba ka duh khajna kumba 6 spah klur hynrei ka sorkar ka don ka lynti ban weng ia kane ka jingeh. Ha kajuh ka por, u la ong ba lada ki briew kiba im mynshwa na u dewiong, ki duh ban phah skul ia ki khun ki kti tang hadien katto katne por ba la khang dewiong, shaei pat ki buh ia ka pisa ba ki la kamai bun snem. “Lada ka long ha kane ka dur, ka pyni ba ka jingtih dewiong ha kane ka jylla kam ai jingmyntoi eiei”, la ong u Dr Mukul Sangma.
U la ong ba ka sorkar kam shong kli kti ban iakhun na ka sorkar India ban pynlait ia ka jingtih dewiong ha kane ka jylla khamtam ban pynbna da u President ka ri ban pynduh ia ka Para 12 A ban pynlait ia ki trai par dewiong na ka jingkam trai ka sorkar pdeng katkum ka Coal Nationalisation Act 1973.
“Haduh mynta, ngi dang iakhun bad buddien bad ka sorkar India halor kane ka kam”, la ong u Dr Mukul. Ha kawei ka liang u la pdiang ia ka jingai jingmut ki dkhot liangpyrshah ban pynthymmai ia ka rukom thungkam ha ki tnad sorkar. U la ong ba ka long kaba shisha ba ka la don ka jingthungkam hi ha ki man ki tnad sorkar da ki ophisar ha kaba ka sorkar ka donkam ban pynbeit ia kane. “Ym tang ki politishian kiba thungkam ha ki tnad sorkar hynrei kiba bun ki ophisar ruh kiba thungkam ia la kiba haiing hasem. Ngi donkam ban pynbeit ia kane ka jingdkoh hynrei bunsien ban pynbeit ia kane, ngi kynduh ia ki jingeh”, la ong u Myntri Rangbah. Halor ka jinglong ka suk ka sain, u Dr Mukul u la ong ba ka jylla mynta ka la mad biang ia ka lyer ka suk ka sain ha kaba lada leit sha Garo Hills haduh mynmiet ruh lah ban iaid khlem don shuh ka jingma.
Halor ki skhim IBDLP, u la ong kane ka skhim ka la kyntiew ia ki kam kynshew jong ki paidbah nongshong ha ka kam kamai jongki naduh ka ri jingri, ka thung siej, ka jingthung dieng akar, ka jingshna surok lyngba ka jingiasoh lang bad kiwei ki skhim kum ka MNGRES ha kiba bun ki shnong. Hadien ba la kren jrong bha, u la pynwai da kaba kyrpad ia ka liangpyrshah ban weng noh ia ka jing tyrwa bym shaniah, pyrshah ia ka sorkar namar ba na ka liang jongu bad ka sorkar ba u ialam, ka shah shkor ia ka jingai jingmut jong ki liangpyrshah.