Shillong,15 Nailur:
Ka KHNAM State Youth Wing ka la leit ban jurip ia ka jingdon ki nongñiah kali bar jylla ha kane ka nongbah Shillong ban tip hato ki don ne-em ia ki laisen bylla ne ka Labour License. U President ka KHNAM YW u bah Thomas Passah u la iathuh ba tang 3 tylli ki jaka ieng kali ba ki la leit jurip kata ka Laban, Mawprem bad Polo ki la lap ba katba kylli Labour Laisen kitei ki bar jylla ki kyrngah khlieh, “Ym don uwei ruh uba ngi kylli u ban don ia ka Labour License” ong u bah Thomas haba ia kren bad u Rupang.
Ula ong ba 3 tylli kitei ki jaka ieng kali ba ki leit kylli u la lap ba ki don kumba 90 ngut eiei ki nongniah kali bar jylla kiba ki la kylli hynrei uwei ruh ym don uba ioh laisen na District Council. La kylli na u bah Passah hato kitei ki bar jylla ki dei kiba naei, “Ym tip ki dei kiba naei ruh, ki dei kiba bha ne kiba sniew, kumno ngin tip haba tang ka Labour License ruh kim don” u la ong. Na kata ka daw u bah Passah u la ong ba ka long kaba donkam ia baroh ki bar jylla kiba niah kali kamai hangne ha kane ka jylla ba kin don ia ka laisen khnang ban tip ia ka tynrai naei u wan, u dei shnong naei.
Hadien katei ka jinglap jong ka, ka KHNAM Youth Wing ka la leit ban ia kynduh ia u EM incharge ka tnad Labour ka KHADC u bah Donkupar Sumer ba un shimkhia ia katei ka kam namar ba katei ka lah ban pynshlur ia ka jingwan rung kyrthep ki mynder sha kane ka jylla ha ka dur jong katei ka kam niah kali bad nalor kata u la ong ba ka ktah ruh ia ka pla tyngka jong ka Council. Ha katei ka jingiakren bad u EM u bah Passah u la ong ba u bah Don Sumer u la ong ba ka District Council ka shem jingeh bha ia katei ka kam namar ka jingduna palat ki pulit Enforcement hynrei u la ong ba un shimkhia bad ban leh eiei.
Haba ia kren bad u bah Don Sumer pat u la ong ba un sa khot ia baroh ki bar jylla kiba niah kali kamai ha kane ka jylla bad un khot ruh ia ki trai kali kiba dei ki Khasi ba ki dei ban pynthikna ba u nongbylla jong ki u dei ban don ia ka Labour License bad ia kane ka kam u la ong ba un khot lang ruh ia ki Association jong ki kali kamai ban iarap ban pynithuh ia ka jingdon jong ki bar jylla ba niah kali kamai.
Haba la kylli katno uwei u nongniah kali u hap siew sha ka District council na ka bynta ka Labour License, u la ong ba ki Skill ki hap siew T.200 tyngka na bynta ka 179 sngi katba ki Unskill pat T.100 tyngka na bynta ka 179 sngi. La kylli biang kumba ka long mynta katno ngut ki nongniah kali kiba die ki bar jylla kiba la dep ioh Labour License u EM u la ong ba kumba ka long mynta u dei uba dang shu shimti thymmai ia katei ka kam bad un dang hap ban bishar bniah shuwa ia ki rikod.
↧
90 ngut ki nongniah kali bar jylla kim don Laisen
↧