Kumno kan jia, ha ka iatynjuh bor mynta ka sngi

Shillong, 14 Nailur:
Mynta ka janmiet, u Dr Mukul Sangma u la lum kyrkieh ia ka jingialang ka Congress Legislative Party (CLP) ha iing sah jongu ban pynthikna ba ka sorkar ka dei ban jop ia ka jingiatynjuh bor lashai ka sngi. Hynrei katkum ka jingtip, bun ki MLA ki bym leit sha kane ka jingialang kaba pyni ba ka lah ban don eiei lashai ka sngi ha ka jingiatynjuh bor bad ka liangpyrshah.
Haba iakren bad uwei u MLA ka Congress, u la iathuh ba u la ioh jingtip ban don ka CLP, hynrei um lah ban leit namar ba um sngew khlain bha ka met.
U la ong ba ia ka jingiatynjuh bor lashai ka sngi, ym lah ban tip kumno kan jia namar ba kum u MLA ha ka liangsynshar um lah ban ong eiei kumno ban long.
“Ka jingiatynjuh bor kan long hapdeng ka liangpyrshah bad ka liangsynshar bad ma ngi ba don ha ka liangsynshar, ngim pat tip kumno kan jia lashai”, la ong une u MLA ka Congress.
Hynrei ha kawei ka liang, la ioh jingtip ba ki don ki MLA ka Congress kiba pyrshah ia u Dr Mukul Sangma, ki la shah tyrwa kam ba heh ha u Dr Mukul Sangma ba kin ai biang ia ka jingkyrshan ia u. “Ki don kumba ar ne lai ngut ki MLA ka Congress hi kiba shah tyrwa kam heh kum ka kam myntri sorkar ha u Dr Mukul lada kin kyrshan ia u lashai ka sngi ha ka jingiatynjuh bor”, la ong ka tyllong khubor ba la iohlum.
La iathuh ba na ka liang u Myntri Rangbah u la bthah ia u Lamphang ka Iing dorbar u AT Mondal ba u dei ban shu leh beit da ka Voice Vote ne shu niew khlieh briew ban tip ia ka jingbun paid lashai ka sngi, namar ba tang shu ailad ban ia thep vote, la sngewthuh ba ka sorkar ka don hapdeng ka jingma ba shyrkhei wat ban khyllem ruh.