Tied u pyrthat, mynsaw 5 ngut ki khynnah skul ha Jowai

Jowai, 14 Nailur:
Mynta ka sngi shwa ban wai skul, u pyrthat u la tied tyngeh ha kaba 5 ngut ki khynnah skul ka Marian Hills Secondary School, Jowai ki la mynsaw uwei u la pynsaw jur bha la iathuh ka khubor na katei ka skul.
Kane ka jingjia kadei ha ka por kumba 3 duna eiei janmeit ha kaba san ngut ki khynnah skul katei ka skul ki la mih na kamra class ban leit shabar ne leit pynjhieh hynrei ha katei ka por u pyrthat u la tied jrain bad 3 ngut na kitei ki khynnah skul ki la kyllon khlem tip briew ha madan, katba ar ngut na ki pat ki la shu tyrsain ki kti.
La iathuh ba uwei na kitei ki khynnah udei u khun jong u Nonghikai katei ka skul hi uba sah ha Tpep Pale Jowai.
Ia utei uba la mynsaw jur la ioh kyrten kum u Arsuni Suchiang ubym la tip briew wat haduh ban da poi sha Hospital. Katba ar ngut kynthup ia u Donaldson Dkhar na dong Mihsngi ki la sdang ban tip briew naduh ka por ba la rah ia ki sha jaka ai jingsumar ha Mission Hospital Jowai.
Ha kane ka jingtied jur u pyrthat mynta ka sngi bun ki tiar ki tar ki la duhnoh. Ha New Hill ha jan kane ka Skul, kawei ka dukan Electronic ka la duh noh ia ka Computer na kadaw jong utei u pyrthat. Ki tiar kiba la duh noh ki kynthup naduh ki TV, ki Computer bad kiwei kiwei ki tiar batreikam da ki bording.