Shah kura u kthaw ha u pyrsa kurim

Shillong, 14 Nailur:
Uwei u rangbah uba la tip kyrteng kum u bah Perbak Kharpomtiah u la ujor sha ki pulit ba ha ka miet 12 tarik mynta u bnai ha ka por 11:30 baje , u pyrsa kurim jong u uba la tip kyrteng kum u Baniainehskhem Kharkongor u la wan rung ha phyllaw ing jong u ha Lum sohra, Laitumkhrah ryngkat ka jinglong khlem akor. U la ujor ba ha katei ka miet utei u pyrsa jong u –u la wan wad ia ka khun jong u kaba dei ka lok kaba u la ia phet, hynrei haba la iohi ia katei ka jinglong khlem akor jong u, utei u kthaw u la ong ia u ba un wan pat ha ka por mynstep.
Tang mar ia ong kumta utei u pyrsa jong u – u la kem ding bad u la tim da ka sih ka sang ryngkat ki ktien khlem akor, bad u la kura ia la u kthaw na shadem , ong katei ka jingujor u bah Perbak sha ki pulit. U bah Perbak u la batai sha ki pulit ba hadien ki khun shynrang jong u kiba la tip kyrteng kum u Kyrshanlang Tariang bad u Madeshwa Tariang ki la iohi ia katei ka jingjia bad ki la patan ia u kynum jong ki shabar jong ka phyllaw ing.