Lashai, yn ia tai ki liang pyrshah ha iing dorbar

Shillong,12 Nailur:
Hadien ba la wanrah ia ka jing tyrwa bym shaniah shuh, pyrshah ia u Lamphang ka iing dorbar thawain u AT Mondal, ka ban iatynjuh bor ha ka 16 tarik, mynta, ka liangpyrshah ka la rah ruh sa ia ka jing bym shaniah ia ka sorkar MUA-II ba ialam da u Myntri Rangbah u Dr Mukul Sangma, halor ka jingbymlah ka sorkar ban ai ia ka jingiada ia ki riew kynthei kiba la shah thombor ha baroh ki liang.
Ia kane ka jingbym shaniah shuh ia ka sorkar la phah da ka United Democratic Party (UDP), National People’s Party (NPP) bad Hill State People Democratic Party (HSPDP).
La phah ia kane ka jing bym shaniah, sha u Lamphang ka iing dorbar hynrei na ka liang u Lamphang ka iing u Mondal mynta ka sngi u la ong ba ban pdiang ne ban nym pdiang ia kane, yn sa bishar ha ka dorbar ban long ha ka sngi Balang.
Kane ka jingpynshai u Lamphang ka long hadien ba u James K Sangma u la pan jingshai na u Lamphang, halor kane ka mat bymshaniah shuh ia ka sorkar ban rah ha iing dorbar.
“Ka NC bym shaniah shuh ia ka sorkar yn sa iakren ha ka sngi Balang”, la ong u Mondal haba pynshai halor ka jingpan jingshai u James mynta ka sngi hapoh ka iing dorbar.
Kane ka jingwanrah da ka jing ia tai bym shaniah shuh, pyrshah ia ka sorkar kan long ban
pynsmiej shuh shuh ia ka shuki jong u Myntri Rangbah u Dr Mukul Sangma.
Na ka liang ka khubor ba la ioh, la iathuh ba ki don ki MLA ka liangsynshar ki ban kyrshan ia ka jing bym shaniah shuh jong ka liangpyrshah ha kane ka kynti hynrei ka jingkylli ka long ba ki nud ne em ban pyni hapoh ka iing dorbar lada jia ba hap ban shu niew khlieh ne shu rah kti.
Na ka liangpyrshah, ka la kam ba ka la don number kaba biang ban ia pyni bor bad dei na kata ka daw, ba ki la wanrah da ka jing bym shaniah shuh ia ka sorkar hadien ba ki la sngew skhem ban rah ia ka thong.
Haba iakren bad u James K Sangma u ban rah ia ka jing bym shaniah shuh, u la ong ba ka daw ka jingwanrah ia kane ka jingbym shaniah shuh ia ka sorkar ka long namar ba ka sorkar ka la phiel ha baroh ki liang khamtam ban iada ia ki kam thombor ia ki kynthei.
“Ngi la rai ban rah da ka NC pyrshah ia ka sorkar namar ba ki paidbah ka jylla ki la sngew ba ka sorkar ka la phiel”, la ong u James bad bynrap, kum ki nongmihkhmat ka dei ka kamram ban peit ia ki jingeh jong ki paidbah.
“Ka sorkar ka la phiel ban iada ia ki nongshong shnong khamtam ki kynthei”, u la ong u James.
Haba kylli ki don ne em na ka liang synshar ban kyrshan ia ka NC, na ka liang u James u la ong ba ym ban tip hynrei ka kamram jongki ka long ban rah ia ka sur jong ki paidbah hapoh ka iing dorbar.