Ka Block-I & II, sha Meghalaya, ym don kot shuh, ong u Dr Don

Shillong, 12 Nailur:
U Nongialam liang pyrshah u Dr Donkupar Roy u la ong ba ka sorkar kam dei ban leh bunkam ban wad ia ki kot ki sla ban kam ia ka Block-I &II namar ba kine ki dei lypa ki jaka ka Meghalaya.
Haba iashim bynta hynne ka sngi halor ka kam khappud hapoh ka iing dorbar thawain, u Dr Don u la ong, “ka Block I &II ka la dei ha Meghalaya katkum ka jingpynbna ka sorkar Assam ha u snem 1972. Ka sorkar kam donkam kot kam donkam sla shuh ban pyni ha ka Assam ban kam ia kine ki jaka”, la on u Dr Donkupar.
U la ong ba ia kiwei kiwei ki jaka, ka sorkar ka lah ban wad ia ki kot ki sla ban pynkhlain ia ka jingkam trai ia ki jaka hynrei ym shuh ia kine ki ar tylli ki jaka.
Halor kane, u Myntri Rangbah ka jylla u Dr Mukul Sangma u la ong ba ka sorkar jylla ka la pynbiang nadong shadong ia ki kot ki sla ban pynkhlain ia ka jingkam ia ki jaka ba iakajia bad ka Assam.
U la iathuh ba ka rai ba la shim da ka iing dorbar ban dawa na ka sorkar pdeng ban thaw da ka Boundary Commission mynshem snem, kam shym la lah ban urlong namar ka jingpyrshah ka Sorkar Assam.
“Ha ka jingialang ba la khot da u Myntri tnad kam pohiing ka ri ha Assam hapdeng u Myntri Rangbah ka Meghalaya bad ka Assam, ka sorkar pdeng ka la hukum ia baroh ar liang mamla ban iapynbeit noh ia u pud u sam da kaba iakren snewthuh jingmut”, la ong u Dr Mukul Sangma bad bynrap, ngi hap ban wad da kiwei ki lynti halor kane ka kam’.
U la ong kum ka jingbuddien halor kane, na ka liang jongu, u la thoh shithi sha u Myntri Rangbah ka Assam ha u bnai Nailar ban pynlong noh ia ka jingiashong jingialang ban iakren pynbeit halor u pud u sam.
Hynrei haduh mynta, ym pat ioh jubab eiei na ka sorkar Assam halor kane ka bynta. “Imat ka sorkar Assam ka shem shitom ban pule ia ki kot ki sla ba la ai da ka Meghalaya bad na kata ka daw, ka sa slem ban jubab ia ka jingthoh jong ngi”, la ong u Dr Mukul.
U la ong ba katkum ki kot ki sla ba la phah da ka sorkar Meghalaya, kin long kiba khlain ban kam ia ki jaka ban hap sha Meghalaya.
Ia kane ka mat, la iashim bynta u MLA ka Rambrai u Bah KP Pangiang, u MLA ka Nongkrem u Bah Ardent M Basiawmoit.