Dawa u MLA Sohra ban thaw thymmai ka bor pyniaid MCCL

Shillong, 12 Nailur:
U MLA ka Sohra u Bah TW Chyne u la dawa tyngeh na ka sorkar jylla ba ka dei ban pynthymmai noh shi syndon ia ka bor
pyniaid ka Mawmluh Chera Cement Limited (MCCL) namar ba ka la don hapdeng ka jingkyn-rum kynram haduh ba la pyntlot iar ia kane ka
karkhana ba pawnam ka jylla.
Haba wanrah ia ka phang halor kane, u Bah Chyne u la ong ba kane ka
karkhana kaba la sangeh treikam naduh u snem 2006, ka la iakynduh
shibun ki jingeh namar ba ka daw ka long na ka jingbym iaid beit ka rukom pyniaid.
Naduh ba la wan ka karkhana thymmai ha u snem 2005, kane ka karkhana kam pat lah ban treikam namar ba ka jingphiel ka sorkar ban pyniaid ia ka. “Mynta ka karkhana thymmai ka la lah ban pynmih dewbilat haduh
2000 ton hynrei ka dewbilat ka sahkut ha stok namar ba ym pat lah bandie sha iew”, la ong u MLA ka Sohra.
U la ong ba ka daw ka jingbym lah ban die dei namar ba ka sorkar ka la leh sting ban pan ia ka jingbit na ka Central Pollution Control Board ban die ia u dewbilat, watla ka la lah ban treikam.
“Ka sorkar ka dei ban thung noh sa u Additional Chief Manager uban don hashen ban peit ia ka jingtreikam ka karkhana namar ba tan u Manager ka la khia than ka kam”,la ong u MLA ka Sohra.
Haba jubab halor kane, u Myntri Rangbah u Dr Mukul Sangma u la ong ba ka sorkar kam shym la shong thait ban pynkhie im biang ia kane ka karkhana.
“Namar ka jingsnew khia ka sorkar, ka la mang pisa T. 85 klur ban pynkhlain ia kane ka karkhana”, la ong u Dr Mukul.
U la ong ba ha ki snem ba la dep, ki sorkar ki la shu ai baishun ia ki jingdonkam kane ka karkhana.
Ha kajuh ka por, u Myntri Rangbah u la ong ba ka sorkar ia mynta, kam don eiei ka jingthmu ban aiti ia ka karkhana sha ki riew shimet bad kan peit hi shwa ia ka.