Pdiang ka iing dorbar ia ka GST

Shillong, 09 Nailur:
Ka iing dorbar thawain ka Meghalaya mynta ka sngi, ka la pdiang ia ka Goods and Services Tax (GST) ka sorkar pdeng. Ia ka rai ban pdiang halor kane la wanrah da ka myntri tnad ain ka kong Roshan Warjri ha kaba ka iing ka la pdiang.
Haba kren hadien ba la wai ka dorbar, u myntri khrong khajna, u Zenith Sangma ula ong ba ka GST kan pynduna ia ka jingban khia ka khajna ia ki paidbah. U la ong ba ka GST kan dei ka khajna kaban pynlong ia ka India kawei ka iew. Ka dei kawei ka khajna ia ki mar ki mata bad ki kam, naduh ba la shna ha ki karkhana haduh ki nongpyndonkam.
U Zenith u la ong ba ka GST kan ai jingmyntoi ia ka Meghalaya ban ioh 18 percent na ka Revenue Neutral Rate kaban pynduna ia ka jingban khia ki khajna.
U la ong ba ka sorkar pdeng kan buria haduh san snem ia ki jylla lada ki shah ktah ne duhnong na kane ka GST. Na baroh ki mar ki mata, ka GST ka la pynlait noh ia ka petrol bad ka kyiad ban pynhap ha ka.
Katba u Myntri Rangbah ka jylla u Dr. Mukul Sangma u la pynpaw ia ka jingkmen ban pyntreikam ia ka GST 122nd Amendment Bill, 2014 ha kane ka jylla. U la ong ba ka GST kan dei ka lynti iaid kaba khraw ka India ha ka jingthaw thymmai ha ka rukom shim khajna.