Plie ka ophis U SP, ia ka Police Booth ha Civil Hospital Nongstoin

Nongstoin, 9 Nailur:
Ka ophis jong u Superintendent of Police Nongstoin, ha ka sngi Thohdieng jong ka taiew kala ioh ban plie paidbah ia ka tnad treikam jong ki pulit (Police Booths), hapoh ka Civil Hospital Nongstoin, ha kaba u Circle Inspector Nongstoin u bah D. Mawlein u la long kum u kongsan ban plie paidbah ia katei ka tnad treikam ha katei ka hospital.
Na ka liang jong u bah Mawlein haba ai jingkren ha katei ka sngi u la ong ba ka jingthmu ban buh ia katei ka tnad treikam jong ki pulit ha katei ka Hospital ka long ban pynsuk ia ki paidbah bad ia ki nongtrei katei ka hospital haba ki donkam ka jingiarap na ki bor pulit kum ha ki jingjia aksiden bad kiwei kiwei ki jingjia kiba hap ban donkam ia ki pulit, ha kaba ki paidbah kim da donkam shuh ban pynbun kam ialade ban leit shapoh Police station
Shuh shuh u la ong ruh ba ka jingdon jong ka tnad treikam jong ki pulit ha katei ka Hospital, kan wanrah ruh ia ka jingshngain ia ki nongtrei katei ka hospital bad kumjuh ia ki nongwan ap bad thiah pang.
Ha ka jingshisha kam pat da don katta ka jingpyrkhat na ka tnad pulit ka WKH lane u khlieh jong ka Hospital ban buh noh ia kane ka tnad treikam jong ki pulit ha kane ka Hospital hynrei hadien ka jingiohi ia ki katto katne ki jingjia ba sngewsih bad ki ba ktah ruh ia ka long rynieng jong ki briew kiba ai ka jingsha kri ia ki wei pat ki para briew kumta hadien kane ngi la ia shong pyrkhat na kaliang ka ophis jong u SP ka WKH, bad la sngewdei ban buh noh ia katei ka police booth ha kane ka hospital” ong u bah Mawlein.
U la bynrap shuh shuh da kaba ong ba watla katei ka tnad treikam kam pat dei ka kaba pura (full-fledged) hynrei na ka liang jong ka ophis head quarter ka la mynjur da kaba ai ia ka jubab sha ka ophis SP Nongstoin ban iaid beit ia katei ka jingthmu, bad baroh ki pulit ki ban don ha katei ka tnad trei kam kin long haduh 5 ngut ha kaba la shu shim bad sei na Nongstoin police station.
U bah Mawlein u la kyntu ruh ba nangne shakhmat kan long ruh kum ka jingpyntip sha ki paitbah ba kane ka police booth bala buh ha katei ka hospital kam dei eh tang na kabynta ban peit ia ki jing jia aksident bad ban ai jingtip ia ki briew kiba mynsaw hynrei ki police kin peit ruh ia ki briew kiba wan shah sumar ha poh ka Hospital kim dei ban leh ia kino kino ki kam ki ban pynsngewsih ia ki nongsumar.
Nalor u kongsan ha katei ka sngi iadon lang ruh u ophisar ba ar ka Nongstoin Police Station G. Momin, u Dr.W.W.Phira DM&HO West Khasi Hills, u Dr. W.Nongkhlaw specialist Civil Hospital Nongstoin, Dr.R.Laloo ( Jr.Sp o/o DM&HO Nongstoin) , I kong .C.Niangrai DTO , Nongstoin bad ki wei ki wei.