Mynta ka sngi sdang ba san sngi, ka dorbar synrai

Shillong, 8 Nailur:
Ka dorbar synrai jong ka iing dorbar Jylla, kan sdang lashai ka sngi.Katei ka dorbar, kan don ki sngi treikam jongka, tang san sngi.
Ki liang pyrshah jong ka dorbar Jylla, ki la rai ban leit rah ia ka jing tyrwa bym shaniah shuh ia u lamphang dorbar, halor ka jingkynnoh, ba um shym la lah satia ban pyniaid beit iaid ryntih ia ka iing dorbar Jylla.
Ha kane ka sien, yn wan rah ia ka jing bym shaniah shuh ia u lamphang dorbar Jylla,da ka seng UDP, ka NPP bad ha kaba yn kyrshan lang ruh da ka seng HSPDP, ong ka khubor.
Ka kyrwoh, ba la ioh pdiang na ophis ka dorbar Jylla, ka iathuh ba namar ba ka 13tarik Nailur, kan dei ka shuti, kumta ka dorbar Jylla, ka la pynbeit ba ia ki kam, kiba dei ban iakren ha katei ka sngi, la buh noh, ha ka 12tarik. Ka 12tarik, kan dei ka sngi, ba la mang ia ki dkhot, ba kin wan rah ia ki mat jingiakren jongki halor ki phang ba ki sngew donkam ban ia kren ha iing dorbar Jylla.
Ka dorbar kan sdang ha ka 9tarik mynta u bnai bad hadien kata, kan bteng biang ha ka 12tarik kaba dei ka Lah Sngi U Blei.
Ha ka 14tarik, ka dei ka sngi, ba ka sorkar kan leit rah ia ki jingdawa pisa na ka iing dorbar bad ha ka 15tarik, yn ia kren beit ia ki mat ban leit rah da ki dkhot jong ka iing bad yn pynwai noh ia ka dorbar ha ka 16tarik Nailur, ong ka kyrwoh na U bah Andrew Simon Commissioner & Secretery jong ka iing dorbar Jylla.
Ki liang pyrshah, kin leit rah ia ka jing tyrwa bym shaniah shuh ia u lamphang dorbar lashai ka sngi, ha kaba kin hap ban ia ieng lang baroh, ban pyni ha khmat jong ka iing, ba ki don ia ka jingkyrshan kaba biang jong ki dkhot, ban dawa ia ka jingpynhiar shuki noh ia u lamphang ka iing dorbar Jylla.