Shillong, 08 Nialur:
Da kaba khmih lynti ba ka jingthmu jongki ban pynkhyllem ia u Lamphang ka Iing dorbar u AT Mondal kan urlong ha kane ka kynti, ka UDP ka la kyrmen ba ha kane ka kynti ka jingthmu jongki, kan long kaba seisoh ym kum ha ka por ba la dep.
Haba kren hadien ba la wai ka jingialang ka Parliamentary Party (PP) ka UDP mynta ka sngi, u General secretary ka UDP u Dr Jemino Mawthoh u la ong ba ka jingialang ka la rai ban kyrshan beit shrup ia ka No Confidence Motion (NC) ban rah da u secretary ka kynhun liangpyrshah ka Meghalaya People Forum (MPF), u James K Sangma lashai ka sngi sdang ka dorbar synrai ka iing dorbar pyrshah ia u Lamphang.
“Ngi la iarai ban kyrshan tylli ia ka NC ban rah da u James K Sangma lashai ka sngi ha iing dorbar”, la ong u Dr Jemino.
Katkum ka jingong u Dr Jemino, ka jingrah ia ka NC lashai ka sngi, kan long kaba kham pher bha ym kumba la jia ha ka dorbar ba la dep. “Ka NC kaban rah lashai kan long kaba kham ktik bha ym kum kaba la dep ha ka dorbar mynshwa”, la ong u General Secretary ka UDP.
U Dr Jemino u la ong ba kumba ka paw ha ki lad pathai khubor, ka HSPDP ruh ka la rai ban kyrshan ia ka NCM lashai ka sngi bad kyrmen ba baroh ki MLA liangpyrshah kin iasnoh lang ban kyrshan ia kane ka mat.
Hynrei ha kajuh ha ka por, u Dr Jemino u la ong ba kyrmen ba ki MLA ka liangsynshar ruh kin iakyrshan lang ia kane ka NC ka liang pyrshah khamtam haba ka Congress ka don mynta hapdeng ka jingiapait iapra.
“Ngi kyrmen ba ki MLA ka liang synshar kin kyrshan lang ia kane ka NC bad kan dei ka NC kaban kham pher”, u la ong bad bynrap, “Ha kato ka por (dorbar ba la dep), ka long kumto, mynta ka lah ban long da kumwei”,.
Ka UDP ka don 8 ngu ki MLA, ar ngut ka NPP, 4 ngut ka HSPDP ka dang long tang 14 ngut bad ban pynkhyllem ia u Lamphang ka donkam ia ka jingkyrshan ki MLA shimet bad na ka Congress.
↧
Ka NC mynta kan long kaba kham pher, ong u Dr Jemino
↧