Pdiang U Bah Ronie lada bynshet myntri, ym thikna ban hap U Bah Rowel

Shillong,  18 Nailar:
Katba ki myntri ki don hapdeng ka jing sngew diaw ioh duh shuki hynrei ki MLA ki don ka jingkmen ban ioh shuki, lada jia shisha ba u Myntri Rangbah ka jylla u Dr Mukul Sangma un bujli bad thung myntri thymmai ha kane ka sorkar.
Haba iakren mynta ka sngi bad u MLA ka Mylliem u Bah Ronie V Lyngdoh u la ong ba lada u Myntri Rangbah u bynshet ia ka kam myntri ruh um don jingeh ban shimti namar ba ka kam long ban shakri ia ki paidbah.
Hadien ba la mih ka khubor hamsaia ba kan sa don ka jingpynkhreh bujli myntri da u Myntri Rangbah lada ai bor ka AICC, u Bah Ronie u la ong, “Lada bynshet myntri ruh ngan shakri beit, namar haba nga long MLA ruh nga shakri hi ia u paidbah, ka kam jong ngi ka long ban shakri”.
Hynrei ha kawei ka liang, u la kyntait ba kan don kano kano ka jingbuli myntri namar ba kam pat don kano kano ka jingiakren ne ka jingiasyllok wat la kane ka dei ka bor laitluid jong u Myntri Rangbah iano u mon ban thung myntri bad iano u mon ban weng.
“Ka dei ka kam jong u Myntri Rangbah ban thung ne ban weng myntri hynrei kane kam dei ka party shimet, ka dei ka party jong uba bun balang bad haba don kum kata, tharai u dei ban iasyllok bad ki nongialam”, la ong u Bah Ronie.
Ha kawei ka liang u Symbud Myntri Rangbah u Bah Rowel Lyngdoh u la ong ba um bna eiei ne ioh kyntien na u Myntri Rangbah ba un bujli myntri ne thung myntri.
“Lah ban shah pynhap ma ngi ruh, leit tip mano, ka dei ka kam jong u Myntri Rangbah ban thung ban weng myntri, ban ai kam bad ban weng noh iano”, la ong u Bah Rowel.
U la ong ba kum u MLA ka party um shym la ioh jingtip eiei halor kane namar ba lehse ka dei ka mon jong u Myntri Rangbah lada u sngew ba u donkam ban leh ia kata.
“Lehse lada ka long kaba shisha, u President ka MPCC u lah ban tip ia kane hynrei ngam pat tip eiei”, u la ong.
U la ong ba ha ka jingwan jong ki AICC kim shym la kren eiei halor kane ka jingbujli myntri haba ki wan ha kane ka jylla hynrei la shu iakren beit ia ki kam ka party.
“Ki heh ka AICC kim kren eiei ia ka jingbubli myntri hynrei ka shong ha u Myntri Rangbah ban leh namar ba ka dei ka mon jongu”, la bynrap u Bah Rowel.