Shillong, 17 Nailar:
Ka Meghalaya People’s Committee on Aadhaar (MPCA) ka la rai ban pynher jingthoh sha ka Supreme Court ka ri pyrshah ia ka jingshah pynbor jong ki paidbah ha kane ka jylla ban leh ia u Aadhar.
Haba kren sha ki nongthoh khubor mynta ka sngi, u nongialam ka MPCA u Pastor PBM Basaiawmoit u la ong dei ban pynsangeh noh mardor ia ka jingthmu ban pyntreikam ia u Aadhar ha kane ka jylla namar ba ka long pyrshah ia ka hukum ka Supreme Court ka ri kaba la kren shai ba ka jingleh ia u Aadhar ka dei da ka mon ym ban leh beit.
“Ngi la rai ban phah da ka jingthoh sha ka Supreme Court halor ka jingiai pyrshang ka sorkar jylla ban pyntreikam ia u Aadhaar, khnang ba kan leh ia kaba donkam halor kane ka kam”, la ong u Pastor Basaiawmoit.
U la ong ba ha ka jingthoh ban ai sha ka Supreme Court, yn pyn sngew ia ka jingthmu ka sorkar ban pyniadei ia u Aadhar bad ka National Population Register (NPR).
“Ka jingthoh kan kynthup ia ka jingpynmih jingpynbna jong ka ophis ka Higher and Technical Education (DHTE) kaba la pynbna ba u Aadhaar u dei ban don beit haba pyndap phom baibam nalor ka jingkren jong u Deputy commissioner, West Jaintia Hills District uba batai ban ialam bakla halor u Aadhaar,” la ong u Pastor Basaiawmoit.
Katba u pastor Kyrsoibor Pyrtuh u la ong ba kane ka kynhun kan thoh sha ka Supreme Court ban pynsngew ia ka jingpyndonkam jubor da u Aadhar namar ba ka ktah ia ka hok shimet jong u briew.
U la ong ba wat ha Rajya Sabha u myntri u V Naidu u la ong ba u Aadhar um dei ba dei ban leh beit hynrei ka shong ha ka mon jong u briew bad lada donkam ka sorkar kan ai ia ka jingbthah sha baroh ki tnad sorkar.
↧
Sha Supreme Court yn ujor ka MPCA ba shah pynbor Aadhar
↧