Shillong,17 Nailar:
Ki nongshong shnong jong ka Maw kisyiem kiba la wad jingtip lyngba ka RTI ia ka rukom pyntreikam ka Soil and Water Conservation ia ka Cherrapunjee Ecological Project ha katei ka shnong kim shym la sngewhun satia ia ka jubab ba ki la ioh na katei ka tnad. Katkum ka jubab ba ki ioh ka long ba ka Soil ka la pynlut T.2,95,820 tyngka ban thungdieng ha ki ar tylli ki jaka kata ha Tih-U-Sir kaba don ka jingheh kaba 4.5 hectare la pynlut T.1,90,170 tyngka katba ha Lum U bnai pat kaba heh 2.5 hectare la pynlut T.1,05,650 tyngka bad katei ka kynthup naduh ka bai tih thliew bad ka bai thungdieng.
Ha ka ripod jingtoh kit pat (Enquiry report) jong u majistor ka Sohra Civil Sub-Division ka tnad Soil ka la ai jubab ba ka la pynlut T.20 tyngka na bynta kawei ka thliew thungdieng ha ka snem kaba nyngkong kata u 2010-2011 bad la pynlut pat T.12 tyngka ban thung ia uwei u tynrai dieng ha ka snem kaba ar. Ka jingpynlut baroh khoit katkum katei ka ripod ka long T.2,97,420 tyngka bad ia ka jingthungdieng la thung ha ki lai tylli ki jaka ba la aid a ka shnong kata ha Tieh –U –Jir 4.5 Hektar bad la thung 5900 tylli ki tynrai dieng, ha Law U Bnai ka jingheh ka long 1.5 hektar bad la thung 1995 tynrai ki dieng bad ha Mawthlong pat kaba heh 1.0 hektar la thung 1330 tynrai ki dieng.
Halor katei ka jubab jong ka Soil ki 4 ngut ki longkmie kiba wad RTI ki la ong ba ka jingkam jong ka Soil ba ka la thungdieng haduh 7 hektar ka jaka ka de ka bym nongrim naba ka Mawkisyiem kam don jaka thungdieng kaba heh haduh 7 hektar. Shuh shuh ki la kynnoh ba ha kitei ki jaka ba ka Soil ka la kam ym shym la don dieng hynrei ki don tang ki khlaw kiba rim kiba la don lypa. Ha kaba iadei bat bad ka pung um dih ba ka Soil ka la jubab ba ki don ar tylli ki pungum kawei ha Kjat Lumbah kaba la pynlut T.50 hajar tyngka bad kawei pat ha Mawap kaba la pynlut T.50 hajar tyngka , na ka liang ki nongwad RTI ki la kynnoh ba kim shym la don kita ki pung umdih kumba la jubab da ka Soil.
Kawei pat ka mat ba ki la kynnoh ka long ba katkum ka jubab ba ki la ioh ka long ba ki don haduh 12 ngut ki nongshong shnong kiba la ioh T.14,000 tyngka na ka Soil ha ka skhim kaba kin hap ban bujli noh da kiwei pat ki jingri ha ka jaka ka kam ri blang, hangtei ki la kynnoh ba ki briew kiba ioh ia ka skhim bujli ia ka kam ri blang dei ki briew ki bym ju ri blang mynno mynno ruh bad ki bym ithuh hi ruh ia ka kam ri blang, hynrei ka jingioh jong ki ka la pynlyngngoh ia ki nongwad RTI haba kim dei ki briew kiba ri blang bad kaba pynlyngngoh shuh shuh ki la ong ba ki briew kiba la ioh ki dei ki bahaing hasem bad ki nongtrei jong u Rangbah Shnong barim u bah Aron Diengdoh. Nangta la iohi ruh lyngba ki kot ki sla ba ka Soil ka la ai jingiarap sha 10 ngut ki briew ba kin ri sniang bad la ai T.5000 tyngka marwei bad ha katei ka thup kyrteng ki juh ki briew kiba la ioh ia ka kam bujli ri blang kiba la ioh T.14,000 tyngka ki ioh ruh ia ka skhim ri sniang kaba T.5000 tyngka.
↧
Ong ka Soil ba thungdieng 7 Hektar ha Mawkisyiem
↧