Shillong,16 Nailar:
Ki 4 ngut ki rangbah na ka shnong Tiehsaw, Nongstoiñ ba kynthup ia u bah Thom borlin Lyngdoh, u bah Draibingstar Wanniang, bah Wireless Tongwah bad u bah Spaibinal Wanniang ki la pynshai paidbah ia ka jingjia kaba la jia ha Civil Hospital Nongstoiñ, bad ki la kynnoh ruh ba ka doktor jong katei ka hospital ka la byrngem byrsit ia ki da kaba ong “Sa peit aiu kan jia ia kine ki maram” bad mar kumta hi ki la ong ba ka ujor pyrshah ia ki.
Katkum katei ka jingpynshai jong ki , ki la ong ba ka Dr.I Rynta thiang ka la pharep im im peit peit ia ki da kaba kynnoh ba ki leit byrngem ia ka ryngkat ka tap durkhmat hynrei ki la ong ba ka dei ka jinglamler ka bym shongnia haei haei ruh hynrei ka dei tang ka jingnion beiñ ia ki duk ki suk ki rangli ki juki.
Ki la pynshai ba ha ka 03 tarik u naitung,2016 ha ka por mynmiet kawei ka kynthei kaba la tip kyrteng kum ka Ibapyn suklin Wanniang ka la ioh pang kynsan bad ka shu ring ka kti ka kjat,bad ha katei ka por kiba ha ing hasem ki la khotlang ia ki para marjan marpa bad la pynkit wut wut sha Civil Hospital, Nongstoiñ (Mawiawban), hynrei haba la poi ha Hospital ki la ong ba ka Dr.I Ryntathiang ka la wan tim wan tla bad ka la kren khor ia ki da kaba ong “Nga isih ia ki riew rynjaw rynjaiñ kin wan phah sumar aiu hangne pynkit noh sha ing wut wut ba kane ka nongpang kan iap noh namar tang shu peit nga la ithuh ba la shu leh myn leh (acting) namar la 20 snem nga la sumar briew nga tang shu peit nga la tip lut”.
Kitei ki 4 ngut ki la ong ba da ka jingtieng bad ka rit mynsiem ki la phet iamrem noh kumta ki la pynkit noh sha St.Joseph Dispensary jong ki Sister bad tang mar ia poi hangtei ki la ong ka la ioh jingsumar bad ka la kham iohbor. Hadien katei ki la ong ba ki sngew sheptieng ia kata ka jingpang leh myn leh ne ka jingpang Acting kumba la ong ka Doktor da ka jingmut ioh ka dei kum ka jingpang Cancer ne ka jingpang khyllah aiu re bad kumta ki la leit biang sha Civil Hospital ban kylli na ka Doktor yn phah sumar shano ia katei ka jait jingpang lane da ki dawai aiu lah ban pynjem hynrei ki la ong ba katei ka doktor ka la khie shit kynsan puk bad ka la phet da kaba ong “Sa peit aiu kan jia ia kine ki maram”.
Ki la ong ba ma ki ruh ki la phet iamrem noh namarba ki dei shisha ki maram hynrei tang mar kumta hi ki la ong ba ka la ujor FIR ia ki kumba la paw ha ki kotkhubor. Ki la pynpaw ruh ka jinglyngngoh ba ka rta jong katei ka doktor ka dei 33 snem hynrei ka jingkren jong ka pat ka la ong ba ka sumar briew la 20 snem karta kaba mut ba ka la sumar briew naduh ba ka dang don 13 snem karta , “Naduh 13 snem karta ka la pass MBBS hato kum katei ka long mo kaba shongnia” ki la ong ha ka kyrwoh khubor.
↧
“Sa peit aiu kan jia ia kine ki Maram”
↧