Shillong, 15 Jylliew:
Da ka jingkyntait u President ka ri ban soi ia ka Bill ban ailad ia ki Parliamentary Secretary ka sorkar AAP ha Delhi; ka la don ka jing artatien kaba khraw, ba U Lat ka Jylla, un nym nud shuh ban soi ia ka ain shipor lane ka Ordinance, kaba la soi da ka sorkar MUA, ha kaba iadei bad ka jingthung ia ki Parliamentary Secretery.
Wat la ka ain, ka khang tang ia ki 21ngut ki MLA jong ka seng AAP; hynrei, wei, haba la soi da U President ka Ri, kumta la don kiba shim, ba katei ka ain kan trei kam syndon ha baroh kawei ka Ri nangne shakhmat bad halor katei hi ka phang, ka don ka jingthikna, ba ki kashari ha ka Ri baroh kawei lane wat ki Lat hi ruh kumjuh, kin nym nud shuh ban dang tuklar lane ban ia tyngkhuh ia ka ain, kaba la dep soi da ka muhor jong U President jong ka Ri, uba long u khlieh duh jong ka synshar khadar.
Hynrei na ka liang u Parliamentary secretary ba peit ia ka Tourism u Bah Kennedy C Khyriem um patiaw eiei ia kane bad u la ong ba ka ain Delhi ka iapher bad ka jylla Meghalaya namar ba ka Delhi kam dei ka jylla ka dei tang ka Union Territory katba ka Meghalaya ka dei ka jylla ba pura.
“Ka Delhi kam dei ka jylla ba pura, ym kiwei ki jylla. Ki parliamentary secretary ki don ha man ki jylla kum ha Assam bad ha kiwei ki jylla”, la ong u MLA ka Mawphlang haba iakren bad u Nongthoh khubor.
U Bah Kennedy u la ong ba u la dep iakren bad u Myntri Rangbah ka jylla u Mukul Sangma halor kane hynnin ka sngi hynrei u la ong ba kam nym don eiei ban sheptieng.
“Ngi la iakren bad u Myntri Rangbah hynnin ka sngi bad u la ong ba kan nym don kano kano ka jingktah ha kane ka jylla”,la ong u Bah Kennedy.
Hynrei katkum ka jingtwad na ki katto katne ngut ki briew halor kane, ki la pynpaw ba ka jingkyntait u President ban soi ia ka Bill ki PS ha Delhi, kan sa don kumjuh ka jingktah ha kane ka jylla ha kaba u Lat ka jylla un nym soi ia ka Ordinance ka sorkar jylla.
Lada u Lat um soi ia ka Ordinance, kan don ka jingma kaba khraw ia ki MLA kiba bat kum ki Parliamentary secretaries ha kane ka sorkar MUA-II ioh kin shah trei ha ka ain mait kyrteng.
Haba pyrshang ban twad jingmut na u Parliamentary secretary ba peit ia ka tnad Soil and Water Conservation, u Bah Comingone Ymbon u la ong ba um pat kwah ban kren eiei halor kane ka jingmih ia mynta.
“Ngam pat kwah ban ong eiei halor kane ka kam”, la ong u Bah Ymbon haba iakren bad u nongthoh khubor.
Na ka liang u Bah David Nongrum uba bat kum u chairman ka Meghalaya Tourism Corporation (MTC) u la ong ba ka shuki kaba u shong, kam hap satia ha ka kyrdan Parliamentary secretaries bad um don eiei ban khuslai.
“Nga long tang u chairman, ngam don grade ha ka jingthung ka sorkar kumba leh ia ki parliamentary secretary”, la ong u Bah Nongrum.
↧
Lah ban nym soi U Lat ia ka Ordinance ki PS ha Meghalaya
↧