Iap 29 ngut, lah ban dang kiew, lait im 9 ngut kynthup 3 ki CRPF

Jowai, 15 Jylliew:
Haduh 29 ngut ki briew ki la khlad hashen, 9 ngut ki la mynsaw jur, 2 ngut ki la shitom jur bha ha ka jingjia kaba la jia hynnin ka miet ha Sunapur, East Jaintia Hills ha kaba ka bus Night Super ka la hap sha synrang kaba jylliew haduh kumba 500 phut eiei.
Napdeng ki 29 ngut kiba la iap, ki pulit, ki BSF bad ki paidbah na katei ka thain ki dang lah ban sei tang 9 tylli ki metiap nalor kitei ki 9 ngut kiba la mynsaw. Ia kiba mynsaw la pynkit sha Khlieh riat CHC bad la [bteng sla 7] kynriah pat sha NEIGRIMS ha ka janmiet.
Na ka liang u SP ka EJH, u bah S. Thamar u la ong ba nalor kitei ki 29 ngut kiba la tikna ba ki la iap kin dang lah ban don kiba shah ban shapoh katei ka Bus kaba la pra lyngkhot lyngkhai.
Na ka liang u heh ki BSF, u ME Zingkhai, uba dei u Dy. Commandant, Jowai Sector u la iathuh ba ki don haduh kumba 10 ngut ki CRPF kiba don hapoh katei ka bus. 3 ngut ki la mynsaw jur- uwei leilei u la khein baroh ar ki kjat katba 7 ngut kiwei pat la suba ba ki la iap hashen bad la ithuh tang ia uwei napdeng jong kiba la khlad.
Ha ka por shiteng shisngi, ki CRPF jong ka F67 BN ki la wan haduh shi platoon ban wan kam ia ka metiap jong ki briew jong ki, hynrei ym shym la lah satia ban ithuh lait noh tang ia uwei uba la tip kum u Sunil Sharma.
Namar ka jingjylliew katei ka synrang bad ki BSF kiba la wan iarap, ki pulit bad kumjuh ki dkhot jong ka State Disaster Response Force jong ka tnad Civil Defense ka sorkar Meghalaya (Homeguard) ki la wan ban iarap, hynrei napdeng ki 5 ngut kiba la hiar shapoh, 3 ngut ki la mynsaw noh namar ka jinghap ki maw na jrong.
Kitei ki kynhun ai jingiarap ki la hap ban pyndonkam da ki tyllai ban hiar bad ban kiaw hapdeng ka jingma kaba khraw kaba la pynmynsaw ia kitei ki 3 ngut ki dkhot ka SDRF.
Ia ki metiap ruh ym lah satia ban sei na katei ka jaka, la hap ban sei shaduh rud wah Kupli bad da ki lieng jong ki paidbah bad ki BSF la kit ia ki 9 tylli ki metiap lyngba katei ka wah shaduh Borsora ban kit pat ha ka kali sha Khliehriat CHC ban leh ia ka post Mortem,.
Ia kiba mynsaw la pynkit ia ki, da 108 Ambulance, ki Ambulance na Star Cement, Topcem Cement bad ruh da ka Ambulance ki BSF kiba la wan poi naduh hynnin ka meit.
Kane ka jingjia kaba sngewtriem ka la jia hynnin ka meit ha ka por 9:30 pm. Katei ka bus kaba don ia u No. AS01-EC-7494 kaba dei ka Arhans Coack kaba niah da u Jakir Hussain ka la hap sha synrang ha Mandir Sunapur. Ha ka por ba ka hap, ym shym don kali satia ba duh nadien bad ym don ruh ba iohi laitnoh tang 3 ngut ki Pandit kiba don ha katei ka Mandir.
La ngeit ba u Driver bad u Driver Spare nalor ar ngut ki Handiman ruh ki la iap ha katei ka jingjia.
Ia kitei kiba mynsaw la tip kyrteng kum u Sonu Singh jong 34 Bn CRPF na Rajasthan, u Indra Kumar na Bihar, u Sunil Kumar jong 34 Bn CRPF, U Dillip Kumar na Bihar, U Siprul Haque na Silchar u ba tang marwei hi u bym shym la mynsaw ha kate ka jingjia bad u Yugraj Singh na Manipur. Ar ngut kiwei pat ym shym la lah ban ioh kyreng namar kim tip briew shuh.
Katkum ka list jong ki Passenger kiba la ioh da U Rupang, ki don 34 ngut ki Passenger nalor ki arngut ki driver bad ar ngut ki Handiman, lane ki nongiarap.
Ym shym la don pat ki riew kynthei lane ki khyllung hapoh katei ka bus kat haduh ba la thoh ia kane ka khubor.
Mynta ka meit la lah ban ithuh thikna tang ia uwei napdeng ki 9 ngut kiba la iohsei uta udei u CRPF uba la tip kyrteng kum u Sunil Sharma jong ka 124 Bn. Ka jinghap katei ka Bus ka long kaba shyrkhei haduh ba ka la pra hi pom bad bun na ki ba la iap kim don jain kim don nep shuh. Wat ka patlun, ka sopti ruh kim don shuh, kane ka la long shisha kaba lyngngoh haduh katta katta.