Shah kem ki ar ngut, kiba shu thaw pisa suk napoh Hotel

Shillong,14 Jylliew:
Ki pulit ki la ioh jingtip ba ka don ka jingiathaw pisa kaba jur ha kawei ka Hotel kaba la buhrieh noh ia ka kyrteng jong ka kaba don ha Khyndailad ha kaba ka don kawei ki don ki kynhun kiba lum pisa na ki paidbah da kaba kular ban siew pat ia ki ha ka dor kaba heh.
Tang mar ia ioh jingtip mynta ka janmiet ha ka por 5:30 baje ki pulit Special Cell na ophis u SP bad na Sadar PS ki la leit ban khynra ha katei ka Hotel bad ki la ioh kem ar ngut ki briew kiba la tip kyrteng kum u Sajan Dey, 35 snem karta uba na Mokandapur, West Bengal bad ka Sudipta Das na Jail Road,Shillong.
Kitei ki briew ki la sdang ia katei ka kam lum pisa naduh ka 13 tarik mynta u bnai ha katei ka hotel bad ia katei ka jinglum pisa ki la ai kyrteng kum ka Multi Level Marketing Scheme kaba ki khot ka ‘Wedding Collection’. Ki pulit ki la lap ba katei ka kynhun pyniaid kam don ia ki kot ki sla ban pynshisha ba ka kam jong ki kaba la ithuh da ka aiñ.
Ha katei ka jingleit khynra ki pulit ki la ioh kurup 160 tylli ki phom ba la dep pyndap bad 190 kibym pat dep pyndap bad kawei ka rejistar kaba batai shaphang ka skhim jong ki,la ioh kurup ruh ka pisa T.43 hajar tyngka kaba ki la ioh lum na ki briew kiba la thep pisa hangtei. Kitei ki briew ki pyni ruh sha ki paidbah ba ki pyndonkam ia ka website www.weddingbazar.co.in kaba dei ka website ka bym treikam satia.
Hadien ba la ioh kem ia kitei ar ngut ki pulit ki la rah ruh sa ar ngut kiwei pat ban tohkit,kitei ki ar ngut kiwei pat ki dei ka Nupur Deb na Polo bad ka Malaika Baidya na Pynthorumkhrah. Kipulit ki la rejistar kum ka kam thok ia katei ka kam bad ka jingtohkit ka dang iaid shakhmat. Ki pulit ki la maham ia kipaidbah ba kim dei ban shah thok ha kum kitei ki kynhun thaw pisa bad ki la kyntu ia ki paidbah ba ki dei ban pyntip pulit lada ki lap ia kum katei ka jaitkam.