Ki MLA, ki sngew lada neh U Mukul kim jop elekshon shuh:Rowel

Shillong, 13 Jylliew: Balei ki iakhih ban pynkhyllem ia u Dr Mukul Sangma na ka shuki Myntri Rangbah, ka jubab na u Symbud Myntri Rangbah u Bah Rowel Lyngdoh ka long, “Don kiba sngew ba sngew ba u Dr Mukul u la leh baheh palat, don kiba ong ba um lah ban pyndep ia ki kam, don kiba sngew ba lada neh u Dr Mukul kin nym jop elekshon shuh ha u 2018”.
Ha u Bah Rowel shimet, u Dr Mukul u dei uba treikam kum u Myntri Rangbah hynrei ki MLA kim sngew tynnad namar bun kiwei pat ki daw bad ka jingiakhih napoh napoh ka iaid mynta ban weng noh ia u Dr Mukul na ka shuki nongialam ha ka party Congress.
“Ka shong ha ki MLA, lada kim shaniah shuh bad lada kiba bun ki kwah ban bujli ia u, kin lah ban pynkhyllem ia u”, la ong u Bah Rowel.
Watla um kren shai la u don bynta ne em ha ka kam iakhih ban pynkhyllem ia u Dr Mukul, hynrei u Bah Rowel u la ong ba baroh ka shong ha ki MLA ban rai ia u nongialam.
Imat ka jingialap jong ki MLA ban ioh bun paid ka dang iaid hi napoh napoh ban weng ia u Dr Mukul hynrei ka jingkylli ka long lano kane ka jingiapun kan bthei ne kan sa jah noh syndon pynban namar ba u Dr Mukul u la pynkhreh bun ki buit ban tem ia kane ka jingiakhih.
U Bah Rowel u la iathuh ba ha ka jingshisha u president ka MPCC u Bah DD Lapang u la dep khot jingialang hynrei ka la pulom noh namar ba bun ki myntri sorkar ki bun kam ba wan u Myntri Rangbahduh ka ri u Narendra Modi ha kane ka nongbah.
”Naduh ba la pynsangeh noh ia ka jingialang ba wan u Modi, u president ka MPCC u Bah Lapang um pat khot jingialang shuh haduh mynta”, la ong u Bah Rowel.
Katkum ka jingong jong u Bah Rowel, ka jingialang la khot ban iakren ki kam ka party hadien ba la mih ka kynrum kynram ban pynkhyllem ia u Dr Mukul Sangma na ka shuki Myntri Rangbah.
Ha kawei ka khubor, la ioh jingtip ba u Bah Lapang bad u Mukul ki don mynta sha nongbah Delhi ban iakynduh ia ki nongialam ka AICC ban iakren ia ka jinglong jingman ka sain pyrthei ha kane ka jylla.
La sngewthuh ba kin iakynduh ruh ia u nongpeit ba dang shu dep thung thymmai ka AICC u Dr CP Joshi.