Mawkyrwat, 13 Jylliew: Da ki hajar ngut ki paidbah ki la ia tuid sha ka shnong Mawsaw ha South West Khasi Hills hynnin ka sngi ban ia shim bynta ha ka jingiaid paidbah ban pynrem ia ka jingpyniap dusmon U Tekstarly Lyngkhoi ia ka samla kaba dang 18 snem ka rta ha katei ka shnong. Kane ka jingiaid paidbah ka long kum ka dak pyrshah ia katei ka jingleh kam sniew jong u tei u briew u ba la nud ban shim wat ia ka jingim briew kumba la kynnoh ha kaba mynta u don ha kti jong ki pulit.
Ha ka jingialang hadien katei ka jingiaid paidbah, ki nongkren na ki kynhun bapher bapher na ka tei ka thain ban pynrem ia u nongleh ia kane ka kam sniew kaba la pynsuh jer ia katei ka thain baroh kawei. U Bah F. Nong rem, President ka KSU Mawkyrwat u la ba ka jingialang la shim ia ka rai ban dawa na ka Juvenile Justice Board (JJB) ba ka dei ban phah iit bniah bha ia ka rta jong u Tekstarly Lyngkhoi namar ka Seng kam ngeit ba un dang dei u khynnah bad u dei ban ioh ka jingpynshitom katkum ka ain.
Halor kane ka seng ka la leit ban ia kynduh ia u superintendent jong ki pulit jong ka South West Khasi Hills District ban dawa ba dei ban da phah iit bniah ia ka rta ban lap ia ka jingshisha . Ka KSU ka dawa ba ka Preliminary Assessment ka dei ban pynkloi noh ban lap ia ka rta ba shisha jong u tei u nongleh kam sniew namar katkum ka jingtip kaba la ioh na ki briew ka thain Mawsaw ka long ba u la tam ia ka 18 snem,
Na ka liang jong ka KSU, Women’s Wing kan pynlong ia ka jingthang mombati ha ka jan miet jong ka 15 tarik mynta u bnai ha Mawkyrwat kum ka dak jong ka jingsngewlem na ka bynta katei ka khynnah kaba la ngat ha kane ka jingjia kaba sngewsih bad ka Seng ka khot ka wer ia baroh ban wan ia shim bynta kum ka dak ka jingsngew lem na ka bynta katei ka samla.
↧
Phah iit bniah ia ka rta u nong pyniap ia ka samla ha Mawsaw:KSU
↧