Ngam pat iakren ban rung BJP, ong u Bah Hopeful

Shillong, 10 Jylliew:
U MLA shimet u Bah Hopeful Bamon uba kyrshan ia kane ka sorkar MUA-II ba ialam da ka Congress hapoh ka jinglong Myntri Rangbah u Mukul Sangma, um pat pyrkhat eiei ban rung BJP ne sha kawei pat ka seng sain pyrthei.
“Ia mynta ngam pat don eiei ha ka jingpyrkhat ban rung BJP ne sha kiwei ki seng sain pyrthei”, la ong u Bah Bamon.
Ha ka jingiakren bad u nongthoh khubor mynta ka sngi, u Bah Bamon uba long u chairman ka Meghalaya Transports Corpration (MTC) ha kane ka sorkar, u la ong ba ia mynta, u dang neh beit kum u MLA shimet khlem kano kano ka party.
“Nga dang neh beit kum u MLA shimet, ngan sa peit hadien kaei kaba dei ban leh”, la ong u Bah Bamon.
Ha kine ki sngi, la mih bun ka khubor ba kiba bun ki MLA khamtam na Jaintia Hills kiba la don ka jingiakren ban pyniasoh sha ka seng sain pyrthei ka BJP hadien ba ka lawei jong ka seng Congress ka la don hapdeng ka jingkah lyoh.
Halor ka jingtreikam jong u Dr Mukul, u Bah Bamon, u la ong ba kum u briew uba don ha ka sorkar, u iohi ba kum u Myntri Rangbah u Mukul Sangma u don ka bynta ba u biang ha ka rukom treikam hynrei ki don bynta kiba bym biang satia.
“Ngam lah ban ong, ki don ki bynta kiba u biang, ki don ki bynta ki bym biang”, la ong u Bah Bamon.
U la ong ruh ba ka jingiakhih jong ki MLA ka Congress pyrshah ia u Dr Mukul Sangma kam don eiei ka jingiadei bad u kum u MLA shimet, namar ba ka dei ka kam jong ka party Congress.
Haba kylli hato u don eiei ka jingphah khubor na ka liang kiba pyrshah ia u Dr Mukul, u Bah Bamon u la ong ba haduh mynta, ym pat don ba kren eiei ia u. “Haduh mynta, kim ong eiei, ka jingiakhih jongki, ka dei ha ka seng Congress”, u la ong.