Shillong, 10 Jylliew:
Ka sorkar jylla ka la don ka jingthmu ban pyntreikam noh ia ka Meghalaya Compulsory Registration of Marriages Rules, 2015 la pyntip u Secretary jong ka tnad Excise, Registration, Taxation & Stamps Department. Katkum ki kyndon, ki ophis ban pynrung kyrteng ha ka ain shong kha la dep ban jied ha East bad West Khasi Hills, East bad West Jaintia Hills, Mairang bad Sohra Civil Sub-Division. Ia ki ophis ban pynrung kyrteng ha kane ka ain ha kiwei pat ki District bad ki sub divisions yn sa pyntip kham hadien.
Hapoh ki ain ki kanun, ki shijur kiba la ia dep shongkha kata naduh ka 5 tarik u Risaw 2015 October, 2015 kin hap ban thep ia ka dorkhas (ka kot ban pyndap kyrteng ha ka dor 10 tyngka kaba lah ban ioh na ka ophis ban pyn rung kyrteng ia kiba la ia dep shongkha na ka ophis u Deputy Commissioner jong ki district bapher bapher bad kin hap ban wanrah ia ki dur passport size hapoh 60 sngi naduh ka por ba la dep ban ia shong kha.
Hadien ba la dep pynbiang, na ka ophis kan sa ai ia ka certificate shong kha khlem da hap ban siew dor sha ki nongthep kyrteng kum ka jingpynshisha ia ka jingdep thep kyrteng jong ki. Ki nongiapoi kurim hadien ka 15 tarik u Risaw 2015 khlem da thep lang ia ka dorkhas bad palat ia ka 60 sngi kin shah dain kuna 100 tyngka u wei u bnai bad 1000 tyngka na ka bynta u wei u bnai hadien ba la palat 120 sngi.Na ka bynta ki jingtip ba bniah lah ban ioh ki ophis treikam jong u Deputy Commissioner lane na ka ophis Civil Sub-Division.