Shillong, 09 Jylliew:
Ka Khun Hyn niewtrep National Awakening Movement (KHNAM, Youth Wing bad ka KSU Jaintia Hills, ki dawa na ka sorkar jylla ban khot sha ka miej ia kren ia ka kynhun kieng atiar ka Hynniewtrep National Liberation Council (HNLC). “Ngi kyntu ia ka sorkar jylla bad kumjuh ia baroh ki nongthawain ha ka sorkar jylla ban khot ia ka HNLC ban ia kren khang ban ioh wanrah ia ka jingsuk” la ong u President ka KHNAM-Youth Wing u Thomas Passah ha ka sngi Palei. U Passah u la ong ba la dei ka por ba ia ka HNLC kaba dei ka kynhun kieng atiar na Ri Lum Khasi ban khot sha ka jingiakren ia suk kumba la leh ia ki kynhun kieng atiar ha Ri Lum Garo kum ka ANVC, UALA bad kiwei kiba la pyndem noh ia ki tiar ialeh ban pynthikna ia ka jingshong suk shong shngain bad ka roi ka par ha ka jylla..
“Hynrei ka jingpyni bad jingeh dohnud u Myntri Rangbah u Dr Mukul Sangma ka pyni ba u pyrkhat tang ia ki kynhun kieng atiar ha Garo Hills,” u la ong shuh shuh. U tei u nongialm ka KHNAM u la pynrem jur ia ka kynhun myntri jong ka sorkar jylla kiba shu shong sngap jar, wat la ka nongrim ka don na ka bynta jong ki ban leh eiei khang ban wanrah ia ka jingshong suk ha ka jylla. “Na ka jingiohi ia ka jinglong bad jingleh kyllut ka sorkar ka pyni ba u Myntri Rangbah u leh hi marwei ia ki kam baroh ha ka jylla” la ong shuh shuh u Passah. Ka KHNAM ka pynrem jur ruh ia ka jingkren u Myntri Rangbah u ba la pynpaw ban ym khot ia kren bad ka HNLC.
U Passah u la ong ruh ba u Myntri Rangbah ka Jylla u la pynkylla khongpong ia ka jingkren kaba u khlei ha u bnai Rymphang ha kaba u la pynpaw ba sorkar jylla ka la phah ia ka jingtyrwa ban jied ar ngut ki ksiang ban thaw ki lad ki lynti ban ioh ia kren ia suk bad ka HNLC . Ka Myntri ba dei peit ia ka tnad kam poh-ing ka Kong Roshan Warjri ka la pynthikna ba la dep phah ia ki kyrteng jong ki ar ngut ki ksiang sha ka tnad ba dei peit ia ki kam pohing ka ri India, bad pynkynmaw ruh ia ka jingkren ka sorkar kaba long kum ka dak jong ka jingplie ia ka jingkhang iakren ia suk.
Na ka liang Ka Khasi Student’s Union Jaintia Hills District Unit ka la kyntu iaka Sorkar jylla ban shimkhia kloi ban khot iakren iasuk ia ka Seng HNLC kaba long tang ma ka marwei ka Seng kieng atiar jong ka bri Hynniewtrep.
Ha ka kyrwoh khubor ba la pyllait da ka KSU Jaintia Hills District Unit ka la ong ba ka Meghalaya ka donkam ia ka jingshngain bad ka jingsuk(peace and security) hakhmat eh lada ka sorkar ka kwah ban kyntiew shisha iaka kam jngoh kai pyrthei. Ban shu theh pisa ia ka phlim Rock on 2, ka dei tang ka kam pynlut phut suda. Ka sorkar Congress kam dei ban leh arsap ne leh shiliang ha ka ba kan khot iakren iaka HNLC, namar ka jingduhnong kan dei ia ka Meghalaya hi kumba ka long mynta ka ioh ka kot ka la hiar arsut.
↧
Khot iakren ia ka HNLC, ong ka KHNAM, KSU Jaintia
↧