Shillong, 05 Jymmang: U Secretary ka Hima Nongspung u Bah Micheal Nongspung u la ujor sha ka Deputy Commissioner ka Ri-Bhoi district halor ka jingkynnoh ba uwei u Bishnu N Sangma uba dei na Barigaon, Kamrup district ka Assam, u la wan shim jaka ha thain New Balakhawa kaba hap hapoh ka Hima Nongspung.
Ha ka jingujor ba la phah sha ka DC u Bah Nongspung u la ong ba u Bishnu u la shim ia ka jaka kaba heh palat ar akar bad u la pom ia ki dieng baroh.
“U Bishnu N Sangma u la shim ia ki jaka khlem ka jingtip ne ai bor ka Hima bad ha ka 3 tarik mynta u bnai, u la pom lut ia ki dieng”, la ong u Bah Micheal.
U Secretary ka Hima Nongspung, u la ong ba kane ka jingleh jong u Bishnu ka long pyrshah ia ka Ain Bat Khyndew ki trai jaka ne ka Meghalaya Land Transfer Act 1971 kaba la khang pyrshah ia uno uno nabar jylla ban shim jaka khlem ka jingbit na ki bor ba dei peit.
“Une u Bishnu u la wan kam ia kitei ki jaka ha ka 22 tarik Lber ba la dep khlem kano kano ka jingtip ka bor hima kaba dei ka nongpeit ia ka jaka puta”, la ong u Bah Micheal.
Ia kane ka jingujor la dep phah kham mynshwa ruh sha ka DC Nongpoh hynrei namar ba kam shym la leh eiei, na ka liang u Bah Nongspung u la phah kopi noh sha ka myntri kam pohiing ka jylla, sha u Chief Secretary bad ruh ia ka District Council.
↧
Ujor u Secretary ka Hima Nongspung ba kam jaka u Sangma na Assam
↧