Kem ki pulit SWAT ia u snar ka ANLA

Nongstoin, 28 Iaiong:
Hynnin ka miet ki pulit ka SWAT jong ka Shallang, ki la ioh ban kem sa ia u wei u snar ka kynhun Achik national liberation army (ANLA) na ka wei ka jaka ha ka Shallang West Khasi Hills.
U bah S.Nongtnger SP ka WKH haba iakren bad ki nongthoh khubor u la iathuh ba ia u tei u snar ka ANLA bala shah kem la tip kyrteng kum u Bindas u ba la ju khot sin ruh ia u kum u Jhola u ba dei na ka Shnong Mangsang.
Shuh shuh u tei u heh pulit ka District u la iathuh ruh ba u tei u Jhola u dei ruh u ba don kti lang ha ka jingiather kuli hapdeng ka ANLA bad ki pulit kaba la jia ha ka 17 tarik u bnai January 2016 ha Nongwaldro.
Ka jingtohkit ia u tei u snar kan dang iaid sha khmat bad ki pulit ki la register case ruh pyrshah ia utei u snar ka seng.