Nongstoin, 20 Iaiong:
Ki khatar tylli ki shnong kiba don ha ka thain Mairang bad ki ba hap ruh hapoh ka Mairang C&RD Block, ki la shah ktah jur ha ka jingsyllad naphang ka eriong er ngit kaba la wan ban jia ha katei ka thain mynha ka sngi saitjain jong ka taiew bala lah, ha kaba katei ka eriong ka la lied bad pied naphang ia ki iing ki sem ha katei ka thain bad na baroh kitei ki shnong ka shnong Nongkhlaw kala shah bun palat ki long iing kaba la kot haduh 170 tylli ki long iing kiba la shah pynjulor ha katei ka eriong.
Shuh shuh na ka liang jong u Nongthoh khubor haba pyrshang ban wad jingtip na ka ophis jong ka Mairang C&RD Block la ioh jingtip ba ha katei ka jingjia ym shymla don kano kano ka jingiap briew hynriew don tang kiba la shu mynsaw katto katne ngut, bad la ioh jingtip ruh ba na ka liang jong ki briew jong ka Mairang Block ki la dep ruh ban leit khmih ia kitei ki shnong na ka bynta ban pynioh lem ia ki lad jingiarap na ki bor sorkar.
Ha kaba iadei bad katei ka jingjia kum shi bynta ban pynpaw lem ia ka dak jong ka jingiadon bynta lang na ka bynta ban sngewlem sha kitei ki lanot shah ktah eriong hynne ka sngi u bah Lambok Nongrang Chairman ka Block Development Monitoring Committee (BDMC) Mairang Block ha ryngkat u bah R.Nongsiej President ka Mairang Assembly Youth Congress, ki la hiar sha ka shnong Nongrmai WKHD bad noh jingiarap ruh da u khaw sha ki lanot.
Ki long iing kiba la shah ktah ha katei ka eriong ha katei ka shnong kidon haduh 36 tylli ki iing kynthup ia ki bala kham jur bad kiba shuh malu mala, ha katei ka jingleit noh jingiarap jong u tei u rangbah sha ki tei ki lanot erong ha katei ka shnong la iadon lang ruh ki paitbah katei ka shnong, u pastor D.W.S.War , u sordar ka shnong Nongrimai u bah S.L.Nongrang , ki riew rangbah bad ki wei ki wei.
U bah Lambok u ba dei ruh ha kajuh ka por kum u general secretary ka shnong Pyndengumiong Mairang bad kum u kyrtong u ban ia khun na kabynta ka election shiteng samoi sha ka KHADC na ka party Congress haba kren ha ka jingialang ba lyngkhot ha katei ka sngi u la ong ba katba ngi dang im ha kane ka pyrthei ngin nym lah lait na kum kine ki jingjia lyngba ki bor jong ka mei mariang kaba wan ban lyngshop na ha ka jingim ka jong ngi.
Shuh shuh u la ong ruh ba haba don kum kitei ki jingjia na ka liang jong ki bor pyniaid shnong ki dei ban pyntip mar mar u BDO bad sha ki briew ka sorkar khnang ba ki lad jingiarap kin poi kham kloi bad u la ai ruh ia ka jingaiaroh sha ki bor pyniaid katei ka shnong ba kila leh ruh ia kaba kum kata bad u la ong ba na ka liang jong u ruh mar ia ioh jingtip ia katei ka jingjia u la don kajingmut ban leh ei ei na kabynta jong ki.
“ Dei lyngba ka jingia sngewthuh lang bad ki riewrangbah jong ka shnong nga la kut jingmut ban ai noh da u khaw sha baroh ki long iing kiba la ia kynduh ia katei ka jingeh bad ka ba pynlong ban ai jingiarap da u khaw ka long ba namar phi dang iabunkam ban ia shna bad maramot ia ki iing bala pra kumta phim don por shuh ban leit bylla sngi te kumta u khaw u long u ba kordor ia phi bad kane ka dei ka jingai kaba rit hynrei ngeit skhem ba u Blei un nang kyrkhu ruh ha ki sngi bad ki por kiban dang” bynrap biang u bah Nongrang.
↧
12 tylli ki Shnong ha thain Mairang, ki la shah ktah ha ka eriong
↧