Her Delhi ki heh UDP, ban pynkhyllem ia ka sorkar U Mukul

Shillong, 15 Iaiong:
Hadien ba la mih ka jingjia ha Arunachal Pradesh ha kaba ki MLA ka Congress ki la phet iing ban thaw sorkar bad ki MLA ka BJP, ka jinglong jingman ka sain pyrthei ka lah ban wan pur ha kane ka jylla ruh.
U nongthoh khubor u la twad jingmut na ki katto katne ki MLA liang pyrshah, ki la pynpaw ba kaba kongsan ban pyn khyllem ia u Dr Mukul Sangma kum u Myntri Rangbah, ka shong na ki MLA ka Congress ban leh ia kaba donkam.
U President ka BJP Meghalaya u Bah Shibun Lyngdoh u la ong ba na ka liang ka party ha kane ka jylla, kam lah ban leh eiei namar ba kam don MLA tang uwei ruh hynrei, u la kubur ba la don ki nongialam seng riewlum kiba la iakynduh ia ki nongialam ka BJP ha nongbah Delhi ha kine ki sngi.
“Ngim lah leh eiei na ka liang ka party  na kane ka jylla namar ba ngim don MLA uwei ruh hynrei, ki nongialam seng riewlum na kane ka jylla ki la iakynduh ia ki heh ka BJP ha nongbah Delhi halor ka jinglong jingman ka sain pyrthei ha kane ka jylla”, la ong u Bah Shibun.
Katkum ka jingtip ki nongialam ka UDP na kane ka jylla kynthup u Bah Paul Lyngdoh, bad kiwei ki la dep iakynduh ia ki nongialam ka BJP ha Delhi bad ki la iakren shaphang ka jinglong jingman ka sain pyrthei ha kane ka jylla.
Katkum ka jingong u Bah Shibun ka jing iakren ka lah ban long shaphang ka jingpynkhyllem noh ia ka sorkar ba ialam da u Myntri Rangbah u Mukul Sangma.
U President ka BJP u la ong ba ka jingkren jong u Nalin Kohli ha ka por ba u wan ha kane ka nongbah, ka long kaba dei ba kane ka sorkar Congress kan sa khyllem noh namar ki daw iing jongka hi.
“Ki daw iing jong kane ka sorkar kum ki kynrum kynram ha KHADC, jingthung Parliamentary secretaries bad kiwei, kin sa pynkhyllem hi ia ka sorkar”, la ong u President ka BJP.
U la ong ruh ba ka sorkar Congress ha kane ka jylla kam ju nud ban shim pisa pura na ka sorkar pdeng hynrei ka shim beit tang 40 percent na ka 100 percent.
“Nga la dep kren ia kane sha ki lad pathai khubor bad kim ai jubab eiei bad ka paw ba ki leh shisha. Nga la ioh jingtip kaba biang na Delhi ia kane ka jingleh ka sorkar Congress ha kane ka jylla”, la ong u Bah Shibun.