Hadien ka 19 Jymmang, yn jia aiu, ia ka Congress ha Meghalaya?

Shillong, 14 Iaiong:
Ka result jong ka elekshon ha Assam, kan sa mih paidbah, ha ka 19tarik Jymmang 2016, hynrei ha shwa ba kan mih ka rai jong u paidlang katei ka Jylla, la iohi, ba u myntri rangbah ka Jylla, U Mukul Sangma, ula ong ha ki nongthoh khubor, ba u lah ban hiar shuki noh, kum u myntri rangbah, lada ka seng Congress, ka lap, ba ki don, da kiwei pat kiba kham bit ban ia u. Ym tang katta, ula ong shuh shuh, ba un nym mih satia ialade na ka seng Congress, namar ba katei ka dei ka seng, kaba ki kmie ki kpa jongu, ki dei ki nongialam jong katei ka seng sain pyrthei. Kam kut tang katta, ula ong shuh shuh, ba ka jing ia khun ha ka elekshon ha Assam, kan long kaba ia khaid hapdeng ka Congress bad ka BJP, ha kane ka kynti kaba mynta.
Ki pyrman sain pyrthei, ki shim, ba katei ka jingkren jong U Mukul Sangma, ka long kaba thew jngai bha bad la shim ruh, ba U Sangma, haba u kren kumta, u don ka jingkren lypa, ia ka lyer jong ka jingkylla, ka ban wan ha Assam, hadien ka 19tarik Jymmang 2016, kaba lah ruh ban pynkylla ia ka dong shatei lam mihngi baroh kawei kynthup ia ka Meghalaya.
Kat haduh mynta, ki lad khubor, ki iathuh ba ki don ki MLA jong ka seng Congress, kiba dei ruh ki myntri sorkar, kiba la nang pynkhreh bha ialade, na ka bynta ka elekshon 2018, ha kaba kin lah ban iakhun da ka shap jong U Lotus. Uwei na ki nongialam jong ka seng BJP, u iathuh ha u nongthoh khubor, ba ka jingiakren, ka la sdang iaid mynta bad ki katto katne ki heh Congress, kiba dei ruh ki MLA bad ki myntri jong ka sorkar Jylla.
La iathuh shuh, da ki tyllong khubor, ba U Mukul Sangma, u don ruh ka jing ia dei kaba jan bha bad U Himanta Biswa Sarma bad kiei kiei ki kdew jngai, ba hadien ka 19tarik Jymmang, kan lah ban sdang thaw dur thymmai biang ka sain pyrthei jong ka Meghalaya ruh kumjuh.
Hynnin ka sngi, ha ka jingiakren bad ki nongthoh khubor, U Myntri Rangbah ka jylla u Dr Mukul Sangma u la ong ba un nym iehnoh ia ka Congress namar ba ki kmie ki kpa jongu ki don ka jingiadei kaba jan eh bad kane ka party.
“Ki kmie kpa jong nga ki dei kiba nyngkong eh ban iasoh sha ka Congress ha ka jylla ha ka por ba ki seng riewlum ki khlain bha kane ka jylla” la ong u Mukul Sangma hynne ka sngi ha ki nongthoh khubor.
Katkum ka jingong jong u Myntri Rangbah, haba u Capt Sangma u ialam ia ka jingialehkai ban ioh ia ka jylla Meghalaya, ki kmie ki kpa jongu ki dei ki nongialam ka Congress bad ki la pynkhlain ai ka party hapdeng ki jingeh.
“Kam dei namar ka bor kam dei namar ka shuki ba nga don ha ka seng Congress,” u la ong.
U la ong ba watla u iajan bad u Purno A Sangma haba u phet noh na ka Congress ban thaw ia ka NCP, hynrei u jied ban don beit ha ka Congress.
U la ong ba um long u Myntri Rangbah tang na ka bynta ka thong jongu. “Nga don hangne na ka bynta ka thong ia ki paidbah bad ka jylla. Ka jingthmu jong nga ka long ban pynlait ia ki paidbah na ka jingpang jingshitom, ka jingsahdien bad ka jingduk namar ba nga dei uwei uba la dei u langknia jong ka jingsahdien”, la ong u Myntri Rangbah.
U la ong ba ki briew ki rung sha ka sain pyrthei namar ba ka synshar paidbah ka ai ia ka lad ia baroh ban pynbeit ia ka bym dei.“Lada kiwei kim leh, hato kam dei ba ngin pyrshang da mangi? ka la don ka jingthmu naduh ba sdang”, u la ong.
“Ka jingthmu jong nga ka long ban pyndonkam ia ka lad bad ka kabu kaba la ai ia nga da ka party ban iaid shakhmat ia ka bor ba la ai da u paidbah. Ka bor jong u paidbah la pynshong nongrim ha ki jingkular ba ngi la khlei kum ka party”, la ong u Mukul.