Shillong, 16 Rymphang: Ka Khasi Students’ Union (KSU) ka la dawa ba u Myntri Rang bah ka jylla u Mukul Sangma u dei ban tuklar ia ka jingshah pynngat ain thmu pyniap briew u nongniah ka kali kamai Mahindra Max tang namar ba ka leit tyngkhuh ia ka kali jongu.
“Ngi kyntu ia u Myntri Rangbah, uba sngap jar jar mynta, ba un tuklar ia kane ka kam, kum u kpa ka jylla ba un map ia ka jingbakla jong u nongniah ka kali Maxx” la ong ka KSU ha ka jingpynlait khubor mynta ka sngi.
“Ka jingmap jongu Myntri Rangbah kan pynthanda ia ka jingeh ba kiba haiing jong u nongniah kali kamai, namar ong ka ktien, ban bakla dei ka jinglong briew, ban map dei ka kam blei”, la ong ka KSU.
Lah ban kdew ba u Bah Jeskalur L Mawdoh u nongniah jong ka Mahindra Max, (ML-04A-3374) la pynngat ha ka kyndon 307 ka Indian Penal Code (IPC) hadien ba ka kali jongu, ka la iatakhuh bad ka kali ba shong u Myntri Rangbah ka Honda Accord (ML-01-0001) ba niah da u P Lyngdoh ha ka 11 tarik mynta u bnai ha Laimer, Shillong.
“Kaei kaba kham sngew diaw, ka long ba u pulit ophisar u Myntri Rangbah u sted wut wut ban pynngat ia u Bah Mawdoh ha ka mukotduma pyniap briew ha ka kyndon 307 IPC,” la ong ka KSU.
Ka la ong ba u Bah Mawdoh u dei u nongkamai ia ka longiing ban pyndap ia ka jingdonkam ba man ka sngi, bad u Myntri Rangbah u dei ban map noh ia u”, la bynrap ka KSU.
↧
U Mukul u dei ban map ia u nongniah kali, ong ka KSU
↧