Sei ia ka metiap u samla ba la jah 6 bnai

Jowai, 15 Rymphang:
Arsngi hadien ba ki ba haiing hasem jong u Samla ba la jah 6 bnai mynshwa ki la ujor sha ki pulit, ki pulit kila pyntip ba don ka metiap kaba la ioh tam naduh u bnai September na Lumshnong East Jaintia Hills, mynta ka sngi ki ba haiing hasem jong u Riki Phawa ki la leit ban pyntikna lada dei ne em u briew jong ki sha tnad Lumshnong.
Lyngba ki jain ki nep ba u phong bad ruh ki dur ki dar ba la buh bad shon da ki pulit la lah ban pyntikna ba udei u Riki Phawa bad ki la sei noh ia ka met iap jong u mynta hi ka sngi ban ioh pyndep ia ka niam ka rukom lashai ka sngi ha shnong jong u ha Kyndongtuber.
Katkum ka khubor, utei u Riki Phawa u la jah naduh u ‘Nailar 2015 bad ki pulit ki la lap ia ka metiap jong u kaba sdien phasi ha kawei ka jaka hajrong dieng ha Lumshnong ha ka 2 tarik u September. Ha ka 3 tarik la pyndep ia ka Post Mortem bad ka Post Mortem ruh ka la pynthikna ba u la iap na ka daw ba u Phasi ia lade.