Shillong, 12 Rymphang: Ka jingtian bishar ha Supreme Court ka la long mynta ka sngi ka 12 tarik u rymphang halor ka jingmudui ka Khasi Hills Autonomous District Council pyrshah ia ka rai jong ka High Court ka Meghalaya ha kaba ia dei bad ka jingpynmih hukum jong ka ha ka 13 tarik u kyllalyngkot kaba dei ruh ka hukum jong ka High Court ia ka sorkar jylla ba kan thaw-aiñ na ka bynta ki Rangbah Shnong.
Haduh mynta ki khubor kiba la ioh lum don ki la ong ba ka Supreme Court ka la rai ban pynsangeh shuwa ia katei ka hukum hynrei don pat kiba la ong ba ka Supreme Court ka la sngew iahap ban pynksan ia ka KHADC, hynrei haduh mynta ym pat lah ban ong eiei naba ia ka hukum da ka jingthoh yn pynmih lashai ka sngi. U nongiasaid-aiñ jong ka District Council ha katei ka jingtian bishar u dei u Vijay Hansaria uba dei ruh u nongiasaid aiñ ba la rangbah ha Supreme Court uba la don hangtei la kumba 30 snem eiei, bad ha kajuh ka por u dei ruh u President jong ka Legal Assistance Forum, India.
Ki tyllong khubor kiba la iohlum la iathuh ba mynta ki briew jong ka District Council ki dang don ha Delhi na ka bynta ban ap ia katei ka jingthoh kaba kin ioh lashai ka sngi bad mar sien ioh ia ka jingthoh la ong ba kin wan mareh noh bak sha Shillong. Katkum ka jingtip ba la iohlum la ong ba kiba don ha Delhi mynta na ka District Council ki long u bah Banteidor Lyngdoh (Bah Paidang) MDC ka Mawkynrew, u bah Neil Antonio War MDC ka Laitumkhrah, u bah Welljune Syiemlieh u Secretary ka KHADC, u bah R.Wanñiang Joint Secretary.
La ban kdew ba ha ka 13 tarik u kyllalyngkot ka High Court jong ka Meghalaya ka la pynmih ia ka rai kaba la hukum ia ka sorkar jylla ba kan thaw-aiñ na ka bynta ki Rangbah Shnong kata ba ki Rangbah Shnong ki dei ban don ka kyrdan pule, ki dei ban ioh tulop bad dei ban shim ia ki kum ki shakri paidbah. Ka KHADC kam sngewhun ia katei ka rai ka High Court naba ka shim ba katkum ka jingpynkupbor ka 6th Schedule dei ma ka ban peit ia ka synshar khadar ha ki it ki Hima ym ka sorkar jylla bad da katei ka jingbym sngewhun ka la mudui kylla ia katei ka rai sha ka Supreme Court.
↧
Jop ka KHADC ha Supreme Court, pyrshah ia ka High Court
↧