Khang ka shnong ia ka TopCem ba khang lynti

Shillong,10 Rymphang:
Ha ka 9 tarik mynta u bnai ha ka por 4:45 baje eiei janmiet u bah Minot Syiemlieh u Rangbah Shnong ka Chiruphi, EJH ryngkat kumba 5 ne 6 ngut ki nongshong shnong u la leit sha ka jaka ka kompeni dewbilat ka M/s TopCEM Cement Limited kaba don ha Chiruphi bad ki la pynpra kumba shi mitar shiteng ka kynroh jong katei ka kompeni,. Ka daw la ong ba ka dei namarba katei ka kompeni ka la ker kut lut ia ki lynti iaid jong u paidbah katei ka shnong uba ju iaid lynti na katei ka jaka.
Hadien ki heh jong katei ka kompeni ki la ki ujor sha ki pulit ka Khliehriat PS , hynrei mynta ka step ki nongshong shnong ka Chiruphi ki la mih ban khang syndon ia ka khyrdop bah jong katei ka kompeni dewbilat bad ki la dawa ba ka kompeni ka dei ban plie ia ka khyrdop jong ka kaba ju iaid lynti ki nongshong shnong khamtam ki khynnah skul bad ki ba leit trei bad ki la dawa ruh ba ka kompeni ka dei ban weng noh ia ka jing ujor pulit jong ka pyrshah ia u Rangbah Shnong bad kiwei pat ki nongshong shnong. Kham hadien ki Majistor bad ki pulit ki la khot jingialang ia baroh ar liang bad ha katei ka jingialang ka kompeni ka la kohnguh ban plie biang ia ka lynti iaid ki paidbah bad ban weng noh ia ka jingujor pyrshah.