Khreh lum jingialang ki kynhun pyrshah, ba ai laisen ka KHADC ia ka Agrovet

Shillong, 10 Rymphang: Kham mynshuwa u Rupang u la ioh jingtip ba ka Khasi Hills Autonomous District Council ka la dep ban ai laisen ia ka kompeni ri Syiar ka Meghalaya Agrovet kaba don ha ri-Bhoi District, la ioh jingtip ba ia ka laisen khaii ka KHADC ka la dep ban ai sha katei ka kom peni ha ka taiew ba-ar jong u kyllalyngkot mynta u snem. Hynrei ki kynhun kiba ieng pyrshah ia ka jingai laisen ia katei ka kompeni kim shym la ioh jingtip eiei haduh kine ki sngi ruh bad ki la ong ba kim iohi ba katei ka kompeni kan sdang treikam bad namar ka jingbym pat treikam jong ki nangmut ba kam pat ioh laisen na ka KHADC.
Hadien ba la ioh jingtip ba ka KHADC ka la dep ban ai laisen u nongialam ka KSU u bah Peter Kylla u la ong ba un lum noh ia ka jingialang kyrkieh jong ki kynhun kiba don ha ka liang pyrshah khnang ban shim noh ia ka rai ba kin iaid shakhmat namarba ka KHADC kam sngap ia ka jingdawa jong ki. Lah ban pynkynmaw ba ki kynhun kiba ieng pyrshah ia ka Meghalaya Agrovet ki ieng ha ka nongrim ba katei ka kompeni ka pynjaboh ia ka tyllong umbam umdih jong kiba bun ki shnong, katba ki don pat ki kynhun kiba ia shah ia katei ka kompeni kiba la hun ia ka jingpynthymmai jong ka ia ka rukom treikam kaba ki la ong ba kam pyntuid shuh ia ki jaboh sha ki tyllong umbam umdih.
Lah ruh ban kdew ba ka KHADC ka la khot paidbah ban pynsngew paidbah halor katei ka kompeni ban sngap ia ka rai ki paidbah la ki kwah ne em ban ai laisen ia katei ka kompeni hynrei na ka liang ki kynhun pyrshah ki la kynnoh ba ym shym la khot ia ki hynrei la khot pynban ia ki shnong ki bym shah ktah ha katei ka jingpynjaboh ka kompeni.