Shillong, 09 Rymphang:
Ka jingialang bah jong ki Rangbah Shnong hapoh ka lama ka Synjuk Ki Nongsynshar Shnong ka Bri u Hynniew trep (SNSBH) kan long lashai ka sngi ka 10 tarik Rymphang por 11 baje ban iakren iathir shwa ba kin leit ban iakynduh ia ka jingkhot jong u Myntri Rangbah u Mukul Sangma ha ka por 3 baje janmiet.
Haba iakren bad u General secretary ka SNSBH u Bah RL Blah u la ong ba ka jingiakynduh lashai ka sngi, ki nongkitkam ka Synjuk ki khmih lynti ba ki Rangbah Shnong kin iapoi bun namar ba ka jingiakren kan long halor ki mat kiba donkam bha.
“Ngi khmih lynti ki nongkitkam Shnong kin iapoi bun bha namar ba ka mat ka long kaba donkam bha ban iakren lashai ka sngi”, la ong u Bah Blah.
U la ong ba tang ki Executive Member ka SNSBH kin don ym duna 30 ngut eiei bad la khmih lynti ba ki nongkitkam shnong kin ia wan ym duna ia ka 500 ngut eiei ha ka jingialang lashai ka sngi.
“Ngi khmih lynti ba ki nongkitkam shnong kin iawan poi ym duna ia ka 500 ngut eiei”, la bynrap u Bah Blah.
U la ong ba ka jingialang kan iakren iathir bha ia ki kam kum ka jingbuh kyndon ka sorkar ia ki nongtrei sorkar ban bat kam rangbah shnong, ban long dkhot, ha ki seng. “Ngim pat lah ban ong kum kano ka rai ngin shim lashai, namar ba kan shong ha ka jingialang baroh ban shim ia ka rai”, la ong u Bah Blah.
Kham mynshwa, ha ka jingpyllait khubor, ka SNSBH ka la pynpaw ia ka jingpyrshah jur ia ka jingpynmih kyndon ka sorkar ia ki nongtrei sorkar ban bat kam shnong, ha ki seng bhalang, bad ka la dawa ba dei ban ia laitluid kumba ju long namar ba ka kam Rangbah Shnong, ka dei ka kam shakri lem, ka bym ioh tulop eiei.
Kiwei pat ki lad khubor, ki iathuh ba ki Rangbah Shnong bad ki Khlieh nongsynshar shnong ka thaiñ Ri-Bhoi kiba la thmu ban pynlong da ka jingialang paidbah ha madan Paham Syiem, Nongpoh bad katei ka jingialang la ong ba ki don jingthmu, na ka bynta ban pan rai na u paidbah ba kin yn ym ai shuh ka jingiatreilang bad ka sorkar, ki la buhteng shwa ia mynta shipor. Katei ka rai ki Rangbah Shnong Ri-Bhoi ka dei hadien ba ka sorkar ka la khang lad ia ki nongtrei sorkar ba kin bat kam shnong ne kam seng kaba ka sorkar ka la pynbna kham mynshuwa.
Hynrei kham hadien ka sorkar ka la pynkylla noh ia katei ka rai jong ka bad ka la pynkylla noh da kaba ong ba ka shah ia ki nongtrei jong ka ban long rangbah shnong lane ban kitkam seng hynrei ki dei pat ban da pyntip shuwa sha ka sorkar shuwa ban bat kam lane ban pyntip noh lada don kiba la don lypa ha ka kam. Watla ka sorkar ka la pynkylla noh ia katei ka rai hynrei ki Rangbah Shnong ka Ri-Bhoi ki la pynbeit ba katei ka jingialang jong ki kan iaid beit kumba la pynbeit naduh mynshuwa.
U Rupang u la ioh jingtip ba mynta ka sngi ka la don ka jingialang hapdeng ki nongsynshar shnong ka ri Bhoi lem bad ki sengbhalang ha katei ka thaiñ ban ia kren ha kaba ia dei bad katei ka jingialang. Ha katei ka jingialang la shim ia ka rai ban pynkynriah noh shuwa namarba ka sngi ban long jingialang paidbah ha madan Syiem ka ia tyngkhuh noh bad ka jingialang kaba la khot da ka Synjuk Ki Nongsynshar Shnong ka Bri u Hynniewtrep kaba la khot jingialang lashai ka sngi ha Commnitty Hall ka Wahingdoh. Katkum ka jingtip ba la ioh lum la ong ba watla la pynsangeh noh shuwa ia katei ka jingialang bah hynrei kikhlieh nongsynshar ka Ri-Bhoi ki la rai ba kin pynlong beit ia kum katei ka jingialang kaba la pynbna mynshuwa hynrei kaba sah mynta ka dei beit tang ka tarik ba kin buh biang da kawei bad ia kane la ong ba ki sengbhalang ruh ki la aiti beit ha ki Rangbah Shnong ba kin buh tarik.
↧
Mynta yn iatai ki Rangbah Shnong, shwa ban ia kynduh Mukul
↧