Mih U CEM barim ka JHADC na ka seng Congress

Jowai, 25 Risaw:
U ma Modonbai Rymbai, uba ju tip kum u ma MB Rymbai MDC na Khliehtyrshi uba la ju long ruh kum u CEM ka JHADC ha u snem 2013-14 u la weng noh ia lade na ka seng Congress mynhynnin ka sngi.
Ia ka shithi iehnohkam, u ma MB Rymbai u la aiti ha u President jong ka Jowai Block Congress Committee ka Jowai Block, u ma Awhoi Andrew Shulla uba dei ruh u CEM ka JHADC.
Ka jingmih noh u ma Rymbai naka seng Congress ka long ka jingduh kaba khraw ia ka seng Congress, la ong ka tyllong khubor.
“Ka Shnong Khliehtyrshi naduh u ma KS Rymbai, MDC barim haduh u pyrsa jong u, u ma MB Rymbai kadei ka shnong ba khlain bha jong ka seng Congress”, la ong u wei na ki nongkyrshan ka seng Congress na ka shnong Jowai.
Ka tyllong khubor ka la iathuh ruh ba u ma Rymbai u lah ban kyrshan ia u kyrtong ka NPP, u ma Wailad Shylla u kyrtong na Jowai Constituency u ban ia khun pyrshah ia u Dr. RC Laloo ha kane ka Election ka ban sa long ha u 2018.
Haba iakren bad u ma Rymbai, u la ong ba ka jingmih noh na ka Congress kam don kano kano ka daw, hynrei kadei tang na ka daw shimet jong u.