Kynthah U President ka INTUC ia u Modi

Shillong, 28 Naitung:
U President ka Indian National Trade Union Congress (INTUC) u la kynnoh ba ka sorkar NDA ba ialam da u Narendra Modi ba kam khein snep ia ki nongbylla ha ka ri.
Haba kren sha ki nongthoh khubor, u Dinesh Sharma u la ong ba da ki spah ngut ki nongbylla, ki nongrep bad ki briew kiba duk ki la pyniap hi, namar ba ka sorkar pdeng kam salia ia ka jingeh jongki.
U la kynnoh ruh ba ka sorkar pdeng ka siew 27000 klur sha ki nongrep ha ka ri, hadien ba la shah thalain da ki paidbah.
U la dawa ba ka sorkar ka dei ban siew buria T.10 lak ia ki nongbylla kiba pang bad dei ruh ban rejister ia baroh ki nongbylla ha ka ophis u Labour Commissioner.
U la ther ia ka sorkar NDA halor ka jingbym iarap eiei ia ki briew ba shah ktah ha ka jingshlei um ha Assam. Katba u General Secretary ka Union, u Mehboob Hussain u la ong ba kin trei ban pynkhlain ia ka Congress ha ka ri khnang ba kan wan biang ha ka bor ha u snem 2019.
Kane ka kynhun kaba wan jngoh sha kane ka thain kan leit iakynduh ia ki nongialam ka Congress ha kane ka thain.